Kolosi
PoloꞋa Lomu kumate kina nopi maineno Kolosi kumate maineꞋya Yisasife haviꞋya amakupi malenaya veaꞋmogamitega mani avona kae-malegeꞋana Tikikasigani Onisimasigani aliꞋana momaminaꞋe. YisasiꞋa faliteno hetino iꞋkapinaga haitegeno PoloꞋa 30Ꞌa kafu agava maineno Kolosi kea kae-malene.
1
1-2 Nagaya PoloꞋnae Anumaya KotiꞋa agaiꞋa haiya avamete huno Aposolo kanoa hunatenegeꞋna mainoafe nagaiꞋene Timoti nenafuꞋene Kolosi kumate mainetama Yisasife havitama tamakupi malenaya neꞋafugatama mani avona kaetaꞋa nelamamuꞋe. Anumaya KotiꞋa Nelafa kayone hisia yamaꞋaene tamaipa falu hisia yamaꞋaene tamamisie.
Kolosi kumate anagaꞋmoꞋya tamage huꞋya Yisasite amametitia humainae.
TaꞋagaya mukiꞋa kanafina Yisasi Kalaisina NefaꞋa, Anumaya Kotifena havinegeta tamakaifena tusiꞋa muse hutaꞋa havinegoꞋe. 4-5 TaꞋagaya tamavagea ago havilinoꞋe. Anumaya KotiꞋa tamagelafa humainea kemoꞋa, Yisasife kanale mono kea, tamahapaiya kea ago evaꞋyi higetama YisasiꞋa hulatenea yafe havitama tamakupi maletama tamametiti hutama mukiꞋa Yisasife haviꞋya amakuꞋa amitafa humainaya veaꞋmogamife tamahau tamayamopafi nelamahaiye. Anumaya KotiꞋa tamamisia yana iꞋkapinaga talo tala humaleneafe tamametiti nehaya yapiti aniꞋama nehaya yamoꞋa falote hia yafena taꞋagaya Anumayamotega tamakaifena muse nehutaꞋa ke hutaꞋa havinegoꞋe. mage hutaꞋa Anima YisasiꞋa hulatenea kanale mono kea mukiꞋa kotega kagino ala huno veapina alino kanale auꞋava yana ali falote humaineafe tamakaite eaꞋamo Anumaya Koti kayone hisia yafema havilama haya kanafi aepa heno tamakaipina aniꞋa huno kanale auꞋava yana ali falote humaine. EpafalasiꞋa mani mono kea huhaleno higetama havilinae. Ani kanoa taꞋagaila taꞋaya huno Yisasi Kalaisi aliꞋyana alige alige nehia kanogino taꞋagaiꞋene nagopi aliꞋyana neꞋaluna kanogino agaifena aluya huno nenahaiye. Alu Aotage AvamuꞋmoꞋa veafema tamahau tamayamopafi nelahamaiya yana tamaminegetama aniꞋa kavaꞋma nehaya yafena EpafalasiꞋa ago taꞋahapai-maine.
PoloꞋa Kolosi veala alino tokiya vaimatesia yafe Anumaya Kotitega havinege.
Ani yafe hagote kanafina taꞋagaya ani kea havitetaꞋa ani yupa aepa hetaꞋa tamaya hutaꞋa Anumaya Kotitega havigetaꞋa tamakaifena taꞋagela kaniotamatenoꞋe. Mage hutaꞋa havigoꞋe “Alu Aotake AvamuꞋmoꞋa kanale amaku amakesa amamino Anumaya KotiꞋma nehaiya auꞋava yana hamapaisigeno amakupina hiya hinageꞋya havisae. 10 Hiya hisigetama tamakaya kama vaiyesayana Anumayamo veaꞋne fatago hutama maisageno AnumayamoꞋa mukiꞋa maisaya auꞋava yatamihena ‘Nagai nafaꞋnemoꞋya amatea kava nehae.’ huno haisie. MukiꞋama nehaya kavala kanale yakeꞋya falote hisigetama Anumaya Koti aepaꞋa aluya hutama agetetama agaifema havilinaya yatamimoꞋa ala hisie. 11 Anumayamona tokiyaꞋage hale yamaꞋaleti aliꞋya tokiya vaimatesageꞋya hetofa veaꞋne maineꞋya mukiꞋa kana yama falote hisigenoꞋa amakuꞋamoꞋa atali talua ohinageꞋya tokiyaꞋage veaꞋne ako huꞋya amaipa muse yapi maisae. 12 TokiyaꞋage hale yapi mainaya veaꞋnene hetita maisuna tokiya taminageta tatesia kava huta anifi maisuna yafe Nelafatega tusiꞋa muse hisune.” hutaꞋa Anumayamotega havinegoꞋe. 13 Hagoteno Satani kava hulategeta hani yapi mainonageno Anumaya KotiꞋa ani yapiti tavaleno agaiꞋa hau ayamopafi nehaiya nafaꞋnemo kava yagai-mainelega tavaleno latene. 14 Kefo yatimo aigagilategeta mainonageno Anumaya Koti nafaꞋnemoꞋa anifiti kalu hetalesiafe miya hulategeta mainonageno kefo yatia aigetateno atalelatene.
PoloꞋa Kalaisi auꞋavaꞋene aliꞋyamaꞋaenefe humaine.
15 VeaꞋmoꞋya Anumaya Kotina oꞋagegahe hayanagi agaiꞋa nafaꞋnea YisasiꞋa NefaꞋene nago avamete huꞋana mainaꞋanagino YisasiꞋa Anumaya Kotina hagote nafaꞋneꞋagino* maineno mukiꞋa Anumaya KotiꞋma talo humalenea yatela alaꞋami maine. 16 Anumaya KotiꞋa hapaigeno YisasiꞋa agaiꞋa mukiꞋa yana talo humalene. Ikapinaga yaꞋene mopafi yaꞋene neꞋagona yaꞋene noꞋagona yaꞋene ensole vayaꞋene Satani AvamuꞋene ala kava vayaꞋenena agaiꞋa agima alisaga hisaya yafe YisasiꞋa talo humalene. 17 YisasiꞋa hagoteno mainegeno mukiꞋa yamoꞋa agaiꞋa humainea keleti noꞋamile noꞋamile maime ute ete huꞋya mailama humainae. 18 YisasiꞋa agaife haviꞋya amakupi malenaya veaꞋmogami amakenopa maineno kava yagaimatene. YisasiꞋa agaife haviꞋya amakupi malenaya veaꞋmogami aepaꞋa maineno mukiꞋa yamona kava yagaimateno ala kanoꞋami maisiafe uhagotemateno fali-mainefitila eteno heti-maine. 19 Anumaya KotiꞋa haigeno agaiꞋaene mukiꞋa tokiyaꞋaene kanale auꞋava yamaꞋaene nafaꞋneꞋamopi maleno hiya humalene. 20 NaꞋa humaineafe YisasiꞋa yafaga yosaleꞋma faligeno lavi-mainea kolateti Anumaya KotiꞋa mukiꞋa yamaꞋa ma mopafi yaꞋene iꞋkapinaga yaꞋene aigetateno falu hulateno “Nagoke taipale maisune.” huno humaine.
21 Nayona tamaku tamakesamoꞋa kame hutesaya kava higetama kefo yana maitama nehutama Anumaya KotiꞋenena kame hutenae. 22 Hutayanagi YisasiꞋa Nefatega tamavalesigetama kefo yatamia omalesigetama alu aotage veaꞋa maisaya yafeꞋene nagoke veaꞋmoꞋya “Kefo ya nehae.” huꞋya ohisaya yafeꞋene YisasiꞋa augafa agata aigeno yafaga yosale fali-maine. Fali-mainea yateti ago aigetamateno falu hunelamateno nagoke taipale alino lamatene. 23 Lamatenegi tamakaya YisasiꞋma hulamatenea mono kema havitama tamakupi malenaya yana atafa hutama tokiya vaiho. Havigu nago yamo tamavayu hisigetama YisasiꞋma hulamatenea kanale mono kema havilinetama tamametiti nehaya yana ataleyafenagi mai lokiya vaitama maiho. Ani kanale mono kea tamakaya havitageꞋya mukiꞋa mopale veaꞋmoꞋya havilinageꞋna nagaya PoloꞋna anima Yisasi hulatenea kanale mono kemo aliꞋya kano maineꞋna mani kea hamanepauve.
PoloꞋa Koloso veaꞋne amaya humaine.
24 Tamakai tamaya hisuafe naugafa nagata aiya nopima mainoa yafena aluya huꞋna musena nehue. Kalaisi augafamoꞋma tusiꞋa agata aimainea avamete huꞋna nagaya naugafa nagatama aiya yateti Yisasife haviꞋya amakupi malenaya veala agaiꞋa augafa maigeꞋna Yisasina agatama aimainea yana ali haꞋno nehue. 25 Anumaya KotiꞋa “Yisasina amakuꞋa aminaya veaꞋnea amaya huo.” huno hunateneanagiꞋna mukiꞋa Anumaya Koti kea huhaleꞋna tamahapaisugetama havilama hisayafene huno hunatene. 26 Hunatenegeno Anumaya Koti kea nayona falakino hanegeꞋya mukiꞋa veala hamaopainagi menia ago fufute evaꞋyi higeꞋya mukiꞋa Yisasina amakuꞋa aminaya veaꞋmoꞋya nehaviye. 27 Nehavianagino Anumaya KotiꞋa agaiꞋa haiya kava huno Yuta vea omainaya veaꞋmogami amuꞋnopi anima falaki-mainea kea, tusiꞋa kanale kea, taveligeta anima falaki-mainea kea mage huꞋya hageta havimainone “Yisasi KalaisiꞋa tagupi maineanagita tagaya haenagaꞋa agaiꞋa tokiyaꞋage hale yamaꞋaene kumatela umaigahune.” huꞋya hageta haviteta tametitia nehune. 28 Tagaya nagoke nagokeꞋmogami Kalaisifena huhaleta hamanepaita tamavaleta Anumaya Koti auleꞋma tamatesunana KalaisiꞋene aigaꞋmaeꞋya tokiyaꞋage mono veaꞋne maisae huta kanale tagu tagesaleti huge tamaveligea nehuta mukiꞋa veafena “KaꞋyetama maiho.” huta nehune. 29 Nehugeno KalaisiꞋa mukiꞋa tokiyaꞋama nagupi naminea tokiyaleti nagaya tusiꞋa kasageke yapiti himamu huꞋna aliꞋyana neꞋalue.