4
1 Tamakaya aliꞋyate kava vayaꞋmogatama aliꞋya vayatamimo-gamina fatago kavakeꞋya humateho. Tamakaya ago havimainae kava kanotamia ikapinaga nagoke maine.
Nunamu hutama havigetama fatago kate tokiyaꞋage hutama vaiye ho.
2 Tamakaya nunamuna atafa hutama tokiyaꞋage hu-linetama tamau kalo-kalola ohutama efi efi hutama tamakesa havitama musena hiho. 3 Kalaisifena nayoma hu falakitenaya mono kea nagaya huhaleꞋna hua yateti nagaila navaleꞋya kina hunatageꞋna mainoanagino Anumaya KotiꞋa kama yakinatesigeꞋna ani kema nagoꞋene huhaleꞋna hisua yafena nunamuna havigeho. 4 Anumayamona haisia avamete kanaleꞋya huꞋna aepaꞋaene huhaleꞋna hisugeꞋya havisaya yafe Anumayamotega ke hutama havigeho.
5 Tamakaya kanale havi haviꞋyaꞋamima hanea vea kana hutama Yisasi kema nohavisaya veapima mainutama fatago hutama mainetama afaꞋa omaitama Yisasi kea hamapaiho. 6 Hamapaisaya kemoꞋa mukiꞋa kanafina hagageꞋya hamaisifa kegeꞋya nehutama mukiꞋa veapima kenonaꞋamima hugahena kanale kegeꞋya hutama hamapaisae.
PoloꞋa Tikikusigani Onesimusigania hunategeꞋana Kolosi umainaꞋe.
7 TikikusiꞋa nagaya mukiꞋa navagea tamahapaigahie. Ani kanoa nagaila nenahaiya nenafuꞋe, Anumayamo aliꞋyatela efi efi huno kanale aliꞋya kanogita tokaetaꞋa aliꞋyana neꞋaluꞋane. 8 Tamakaya tagayama nemauna tavagea tamaha-painagetama havitama muse hisageno tamaipamoꞋa kanale hisiafene huꞋna hutogeno tamakaitega umaine. 9 Onesimusina agaiꞋene Tikikusiganina hunatesugeꞋana ugaꞋe. OnesimusiꞋa efi efi huno kanale aliꞋya alino maigeno nenahaiya nenafuꞋa, tamakai kumateti kanogino maleꞋma folote humainea yamo kea tamahapaigaꞋe.
PoloꞋa Kolosi mainaya veafe huno falu fala humatene.
10-11 AlisatakusiꞋa nagaiꞋene nofipi mainea kanoene MakiꞋa Panapasina akuꞋamoꞋene YisasiꞋa nago agia YasatusiꞋene huꞋya falu fala hulamatae. Ani vayaꞋmoꞋyage Yuta vayapitila nagaiꞋenena Anumaya KotiꞋma kava yagaisia yafena vaiyatete huꞋya hamanepaiꞋya nagaila aluya huꞋya naya hageno naipamoꞋa kanale humaineafe Makifena nagaya agoꞋma humainoa kele nehavianagitama tamakaiteꞋma uvaꞋyi hisigetama avaletama ali kayone huteho.
12 EpafalasiꞋa tamakai kumate kanogino tamakaila huno falu fala hu nelamate. Ani kanoa Yisasi Kalaisi aliꞋya kanogino mukiꞋa kanafina tamaya hisia yafena Anumaya Kotitega mage huno havinege “Anumaya Kotina hau-mainea kavafena havilama huteꞋya hetiꞋya tokiyaꞋage veaꞋne fatago huꞋya maisae.” huno havinegeane. 13 Havinegeno tamakayaene Leotisia veaꞋnene Hielapolisi veaꞋnene tamaya hisia yafena tusiya huno aliꞋyana aligeꞋna agelama huteꞋna tamakaitela huhaleꞋna nehue. 14 LukuꞋa tahau tayamopafi nelahaiya tota kanotiene TemasiꞋene huꞋana falu fala hulamataꞋe.
15 Leotisia kumate mainaya tafu-tagana-gamiꞋene Nifaene agai nopi melitalu huꞋya Yisasife haviꞋya amakupi malenaya veaꞋnene hu falu fala humatogi hamapaiho. 16 Tamakaya mani avoma hapalitama havitetama Leotisia maineꞋya Yisasife haviꞋya amakupi malenaya veate atalegeno vinageꞋya amakaiꞋene hapaliꞋya havisageꞋya amakaiꞋma amaminoa avona tamakaila tamamisagetama hapalitama haviho. 17 Tamakaya Akipusina mage hutama hapaiho “AnumayamoꞋma kaminea aliꞋyana kava yagaika tokiyaꞋage huka mukiꞋa alio.” hutama hapaiho.
18 Mani kea nago kanoa hapaugeno kae-maleneanagi nagaya PoloꞋna nagaiꞋniꞋa nayapiti “KanaleꞋya hutama mainao?” huꞋna hu falu fala hulamate keꞋnia negaove. Nagaya nofipi mainogi tamakesa havitama namiho. Anumaya KotiꞋa kayone hisia yamaꞋamoꞋa tamakaiꞋene hanesie.
KeꞋnia male haꞋno hie.
NagaiꞋni nagia PoloꞋnae.