1 YisasiꞋa katega neꞋuno nago kanoa atenea kanalegati aulaga asu humai kano moge-maine. 2 Mo neꞋagegeꞋya agaiꞋaenema tokaeꞋya nemaiya anagaꞋmoꞋya mage huꞋya havige-mainae “Hula-ve-nelina kanomoga ta hia kefo yamo alino aulaga asu hu-maine akaiꞋafi itaꞋafoꞋamoꞋa kefo ya haꞋa yamo aulagamoꞋa asu hu-mainefi?” huꞋya havigae.

3 Havigageno YisasiꞋa mage hie “Mani kanomo itaꞋafoꞋamoꞋa akaiꞋaene kefo yama hia yamo alino aulaga asu ohunegi Anumaya KotiꞋa tokiya yamaꞋa alino kanale hu-tesigeꞋya mukiꞋa veaꞋmoꞋya agesaya yafe aulagamoꞋa asu hu-maine. 4 Menima yagema hanesiamaꞋaene hu-natenea kanomo aliꞋyana alige alige huta maisune. Hanima kisiana nago kanomoꞋa aliꞋyana oꞋaligahie. 5 Menima ma mopaleꞋma mainoa-maꞋahena nagaya ma mopafina kaꞋni aye-halesua kano mainoe.” huno hu-maine.

6 Mani kea huno nehuno avetuꞋna mopafi heteno mopaene ayegakalifeno aulagama asu hu-mainea kanomo aulagale malegaꞋmaetene. 7 MalegaꞋmaeteteno mage huno hapaiye “Kagaya Siloamu ti kotute mo sese huo. Ani li kotumo agia tagai kefina ‘Hu-tene.’ huꞋya nehae. Ani li kotute kaugosa mo sese huteka eteka eno.” huno higeno mo seseꞋma hiana aulagamoꞋa kanale higeno neꞋageno nomaꞋalega emaine.

8 NomaꞋalega egeꞋya agaiꞋa kumate vayaꞋene nayoma mani kanomoꞋa monehema aukaꞋya nehigeꞋya neꞋagaya veaꞋmoꞋyaene mage huꞋya hu-mainae “Ma kanoa nayoma felu maineno monehema aukaꞋya nehia kanofi alu kanoe?” huꞋya nehae. 9 NehageꞋya nagoꞋa veaꞋmoꞋya “Ani kanoe.” nehageꞋya nagoꞋa veaꞋmoꞋya “Alu kanogi vuohe ani augafa kanomo nehigi.” huꞋya hageno agaiꞋa nehuno “Nagaya mani kano mainoe.” huno hu-maine. 10 NehigeꞋya mukiꞋa veaꞋmoꞋya havige-mainae “HanaꞋa hanageno kaulagamoꞋa kanale hu-maine?” huꞋya havigae. 11 Havigageno mage hie “Nago kanoa, YisasiꞋe kanomoꞋa, hapa talo huteno alino naulagale maleteno ‘Siloamu ti kotutega kaugosa mo sese huo.’ huno higeꞋna naugosa mo sese huteꞋna agoana aupaꞋa naulaga age-mainoe.” huno nehie. 12 HigeꞋya veaꞋmoꞋya “Ani kanoa hanate maine?” huꞋya hageno “Nagaya oꞋagenoe.” huno hu-maine.

13 Aulagama asu hu-mainea kanomona Falasia vayatega avaleꞋya umainae. 14 YisasiꞋa hapama ali gakalifeteno ani kanomo aulagama alino kanaleꞋma hu-teneana Sapati kanae. 15 Falasia vayaꞋmoꞋya nagoꞋene mage huꞋya havigae “HanaꞋa hanageno kaulagamoꞋa kanale hu-maine?” huꞋya hageno “Hapa ali gaꞋmaeno naulagale malegeꞋna mo sese hugeno naulagamoꞋa kanale higeꞋna age-mainoe.” huno nehie. 16 HigeꞋya nagoꞋa Falasia vayaꞋmoꞋya mage hae “Ani kavaꞋma hia kanoa Sapati kanamona akave omalea yafe Anumaya KotiꞋa ani kanoa hu-tegeno omene.” huꞋya nehageꞋya nagoꞋa vayaꞋmoꞋya mage hae “Kefo yamaꞋa hanesia kanomoꞋa ani tokiya avame yana talo ohileꞋasine.” huꞋya nehageꞋya huteꞋya tolefi ali fako hu-mainae.

17 NaꞋa huteꞋya aulagama asu hu-mainea kanoa eteꞋya havige-mainae “Ani kanoma kaulagama alino lamama hu-gatea kanohena naꞋane hu-mainane?” huꞋya hageno mage hie “Anumaya Koti aune kanoe.” nehie. 18 HigeꞋya Yuta vayaꞋmoꞋya “Mani kanoa aulagamoꞋa asu hu-maineanagi menia aulaga ago agegali hu-maine.” huꞋyama haya kehena “Havige nehae.” huꞋya haviꞋya amakupina maleꞋya amametitia ohuꞋya aulagama asu hu-mainea kanomona itaꞋafoꞋamoganifeꞋene ke hageꞋya emainaꞋe.

19 AꞋageꞋya itaꞋafoꞋamoganife mage huꞋya hana-vigae “Mani kanoa atenaꞋa kanafi aulagamoꞋa asu hu-mainea nafaꞋnetani maineano? NaꞋa higeno menia aulaga neꞋage?” huꞋya hana-vigae. 20-21 Hanavi-gageꞋana itaꞋafoꞋamogania mage haꞋe “TaꞋagai nafaꞋne maineanagitaꞋa taꞋagaya ago age-mainoꞋe. Aulagama asu hu-mainea nafaꞋnema atenoꞋamaꞋa ago age-mainoꞋanagi aulagama age-maineamaꞋa oꞋagenoꞋe. Tapiga aulaga alino kali hu-teneafe tamakaya agai havigeho. Alopa ve maineanagino agaiꞋa tamaha-paigahie.” huꞋana nehaꞋe. 22-23 ItaꞋafoꞋamogania Yuta vayafe koli huꞋana mani kea hu-mainaꞋe. Yuta vayaꞋmoꞋya kea hu-lokiya vaiꞋya mage hu-mainae “NagoꞋa veaꞋmoꞋya ‘Yisasina Anumaya KotiꞋa taugafa ali-gatigahema hu-tenea kanoa ma maine.’ huꞋya hisaya veaꞋmogamina agola mono nopitila amati-talegahune.” huꞋya hu-mainaya kehe koli nehuꞋana “Agaya alopa ve mainegi agai havigeho.” huꞋana hu-mainaꞋe.

24 NagoꞋene eteꞋya aulagama asu hu-mainea kanohe ke hageno egeꞋya mage hu-mainae “Kagaya Anumaya Koti aufi tamage-lafa huka kea huo. Tagaya agonana ani kanoa kefo kavaꞋage nehia kanoe.” huꞋya hae. 25 Hageno kenonaꞋamia mage huno hie “Nagaya oꞋagenogi agaya kefo kava nehia nepi nohia nepi oꞋagenogi nagokeꞋya kanoꞋama agoana hagotenoꞋa naulagamoꞋa asu humaineanagi menia naulaga agegali nehue.” huno hie. 26 HigeꞋya mage huꞋya havigae “NaꞋa hu-ga-tene? HanaꞋa huno kaulaga alino kali hu-ga-tene?” huꞋya havige-mainae. 27 Havigageno “Nagaya agoꞋma tamaha-nepauvana tamakaya keꞋniꞋa nohaviye. NaꞋa higetama etetama nahavi-negae? TamakaiꞋenena agaiꞋaene tokaeꞋya nemaiya anagaꞋmogamipi maigahe nehao?” huno havige-maine.

28 HigeꞋya amakaya huꞋya akaya ateꞋya mage hae “Kagaikage Yisasienema tokaeka nemaina kanoa mainanagi tagaya Mosese kema nehavuna vayala anale haita mainone. 29 Tagaya ago havimainone Anumaya KotiꞋa Mosesena kea hapai-maineanagi ma kanomoꞋa hanategati emainenoꞋe tagaya agaila noꞋagonane.” huꞋya hae.

30 Hageno aulagama asu hu-mainea kanomoꞋa mage hie “Avo namaꞋyo neꞋaiye. Tamakaya alu kegefa nehae. Tamakaya hanategatipiga emainea ke ohavinayanagi naulagama alino kali hu-na-tenea kano afa kanoa omaine. Anumaya Kotitegati emaine. 31 Tagaya ago havimainone Anumaya KotiꞋa kefo kava nehaya veaꞋmogami kea nohavie. NagoꞋa veaꞋmoꞋya Anumaya Koti agi alisaga nehuꞋya agaiꞋma haiya kavaꞋma hisaya veaꞋmogami kea Anumaya KotiꞋa havigahie. 32 EheꞋma fusa kanafima ma mopama taloma hu-malenelegatiꞋma emaineana nago atenea kanalegati aulaga asu hu-mainea kanoa alino kali hu-tene huꞋya haya kea ohavinonane. 33 Anumaya KotiꞋma mani kanoma hu-tegenoꞋma omeneleꞋasina nago yana agaya ohisine.” huno hie. 34 HigeꞋya kenonaꞋa mage hu-mainae “Kagaya kefo yapiti falote huka emainananagika tagaila menia hu-lave-ligahe nehano?” huꞋya nehuꞋya mono nopitila avaleꞋya kumatega hagaꞋyu hu-talenae.

35 YisasiꞋa mono nopitiꞋma anati-talaya kea haviteno ani kanoa atiyeno mogeteno mage hie “Kagaya ikapinagati emainea kanoa vayaꞋmo atenea kanomofena havika kagupi maleka kametitia nehano?” huno havige. 36 Havigegeno ani kanomoꞋa mage hie “Ani kanoa taꞋe? huka nehapi? Nagaila naha-paigeꞋna haviꞋna nagupi maleꞋna nametiti hano.” huno hie. 37 Higeno YisasiꞋa kenonaꞋa mage hie “Kagaya agaila ago neꞋagane. Ani kanoa menima kagaiꞋenema maineno kea kea nehaꞋane.” huno hie. 38 Higeno ani kanomoꞋa mage huno hie “AyeꞋnio Alamogae menia kagaifena haviꞋna nagupi maleꞋna nametiti nehue.” huno muse nehuno aiyafi aleꞋya aye-maineno Yisasi aiyale ali-soso nehuno agi alisaga nehie. 39 YisasiꞋa mage hie “Nagaya ma mopale veaꞋmogami fako hu-ma-tesua yafe emainoe. Ali fako hisugeꞋya amaulaga asu humai veaꞋmoꞋya amaulaga agesageno amaulagama hanea veaꞋmoꞋya amaulagama asu hugahie.” huno hie. 40 HigeꞋya nagoꞋa avate maiya Falasia vayaꞋmoꞋya anima hia kea nehaviꞋya agaifena mage huꞋya havigae “Tagaifena tamaulaga asu hu-maine huka nehano?” huꞋya havigae. 41 Havigageno YisasiꞋa mage huno hie “TamaulagamoꞋa asuma hu-mainesina kefo yatamia omalesinagi tamakaya ‘TaulagamoꞋa kali kali hu-maine.’ hutama haya yafe kefo yatamimoꞋa hane.” huno hu-maine.