19
PailatiꞋa Yisasifena “Yafaga yosale nili hetama asaigeno falino.” huno nehie.
PailatiꞋa Yisasina avaleno “Nofi kaꞋyoteti haifu amiho.” huno hama-paigeꞋya haifu aminae. 2-3 AmiteꞋya ati vayaꞋmoꞋya avetaꞋnafa nofiteti tumano kula talo huteꞋya anute vai-teteꞋya ala kava kanomo fai-neꞋalia augafa haesa kena vai-teneꞋya YisasiꞋma he-tino mainele eꞋya Yisasifena “Felugae. Yuta vayaꞋmogami ala sauve kanomogae.” huꞋya nehuꞋya augosafi amayateti ainagolapeꞋya nehaeꞋya hu-mainae.
Hageno PailatiꞋa kumatega hati-lavino eaꞋyamo alitaluma hu-mainaya Yuta vayafe mage huno hie “AtiyeꞋna agoana nagoke kefo ya kanoꞋa omalegeꞋna tamakaya mani kea havisae huꞋna avaleꞋna tamakaite hati-laviꞋna neꞋoe.” huno hie. Higeno YisasiꞋa kumategama hati-lavino eana avetaꞋnafa nofitetiꞋma talo hu-malaya tumano kula anute vai-teteꞋya haesa kena fai-tetageno hati-lavino elavigeno PailatiꞋa mage huno hie “Ageho mani kanoa ma maine.” huno hama-pai-maine. Hama-paigeꞋya mono note kava vayaꞋmoꞋyaene ati vayaꞋene Yisasina ageteꞋya ala kegefafiti mage huꞋya hae “Yafaga yosale nili hetama asaigeno falino. Yafaga yosale nili hetama asaigeno falino.” huꞋya hae. Hageno PailatiꞋa kenonaꞋamia mage huno hama-paiye “Tamakaitami avaletama yafaga yosalela nilia hetama asaiho. Nagaya nago kefo yamaꞋahena ati-yoana omaleanagiꞋna ohaegahue.” huno hie. HigeꞋya Yuta vayaꞋmoꞋya kenonaꞋa mage huꞋya hapaiye “YisasiꞋa agaiꞋahena mage huno hu-maine ‘Nagaya Anumaya Koti nafaꞋne mainoe.’ hunoꞋma hiana tagaipina kahegi kemoꞋa mage hu-maine ‘ManiꞋa augafa kema hisia kanomoꞋa falisie.’ huno hu-maineafe menia YisasiꞋa mani kema hu-mainea yafe falisie.” huꞋya hae.
Hageno PailatiꞋa ani kea haviteno tusiya huno amaꞋyoa neꞋaiye. AmaꞋyo aigeno PailatiꞋa eteno kaiyekema nehavia nopinaga hai-faleno maineno Yisasifena mage huno havige “Kagaya hanategati emainane?” huno havigeanagi YisasiꞋa kenonaꞋa ohune. 10 Ohigeno PailatiꞋa mage huno hapaiye “Kagaya naꞋa higeka nagelela noꞋaline? Nagaya tokiyaꞋniene kanogiꞋna ‘Kina nopitila atalegahae.’ huꞋnama hisuana afaꞋa katalegahae. ‘Yafaga yosale nili hetama asaigeno falino.’ huꞋnama hisuana aniꞋa hu-ga-tegahae. Kagaya mani kea nohavino?” huno havige. 11 Havigegeno YisasiꞋa kenonaꞋa mage huno hapaiye “Anafinaga mainea Anumaya KotiꞋa kagaiꞋma tokiyama okamineleꞋasipa nagaila natafa ohateꞋasinagi amakayama navaleꞋya kagai kayapima natenaya vayaꞋmogamina kefo yaꞋamimoꞋa kagai kefo yakamona agaseno kasagoꞋya kefo yaꞋami hane.” huno hie. 12 Higeno PailatiꞋa anima hia kea haviteno “HanaꞋa huꞋna atalesugeno visie?” huno kafe ati-neꞋayegeꞋya Yuta vayaꞋmoꞋya ala kegefafiti mage huꞋya hu-mainae “Nagoke kanomoꞋa YisasiꞋma hia kava huno agaiꞋahe ‘Nagaya ala sauve kanoma mainoe.’ hunoꞋma hisia kanomoꞋa Sisana kameꞋa maine. Kagaya mani kanoma atalesanageno visiana kagaya tagaila ala sauve kanotia, Sisana, kanapaꞋa omainane.” huꞋya hae. 13 Hageno PailatiꞋa ani kema haya kea haviteno Yisasina avaleno hati-lavino kumatega elavino eaꞋyamo ala kaiyekema havi kanomo siale emaine. Ani siama malenaya aupaligahena Yuta vayaꞋmogami kefina Kapatae huꞋya nehae. Ani aupaligahena tagai kefina amalagu aiꞋya yafa malenaya aupaligae huta hugahune.
14 Ani kanafina Anumaya KotiꞋa amakinagomogami amaugafama ali-gati-mainea yafe Yuta veaꞋmoꞋya amakesa hao hinageꞋya havisaya yafe imu ki kanaꞋamimoꞋa aupa higeꞋya talo tala hisaya yafe yagemoꞋa euno amanutule evigeno PailatiꞋa Yuta veaꞋmogamina mage huno hama-paiye “Ala sauve kanotamimona ageho.” huno hie. 15 HigeꞋya amakaya ala kegefafiti mage huꞋya hae “AoteꞋyamaꞋae. AoteꞋyamaꞋae. Yafaga yosale nili hetama asaigeno falino.” huꞋya hageno PailatiꞋa mage huno hama-paiye “Nagaya tamakai sauve kanotamia yafaga yosale nili heꞋna asaisue hugetama nehao?” huno higeꞋya mono note kava vayaꞋmoꞋya mage hae “Tagaila nago ala sauve kanotia omaine. SisaꞋa agaiꞋage nagoke maine.” huꞋya hae. 16 Hageno PailatiꞋa “Yisasina yafaga yosale nili hetama asaiho.” huno avaleno amayapi amamine.
Yisasina yafaga yosale nili heꞋya asai-mainae.
17 Yisasina avaleꞋya vageno haeꞋya asaisaya yafaga yosa agaiꞋa ko-fino anu ayamufae huꞋya nehaya agoꞋyalega umaine. Ani agoꞋyamo agia Yuta vayaꞋmogami kefina Kologotae huꞋya nehae. 18 Ani agoꞋyafi avaleꞋya vayaꞋamoꞋya yafaga yosale nilia heꞋya asai-malenae. Tole kanolataꞋene hanaote yafaga yosale aluga aluga atupale hanaeꞋya asai-maleneꞋya Yisasina amuꞋnoꞋanifi nilia heꞋya asai-malenae.
19 Asai-maletageno PailatiꞋa nago avona kaeno Yisasina nilima he-malaya yafaga yosale asai-malene. Ani avomoꞋa mage hie “Nasaleti YisasiꞋe, Yuta vayaꞋmogami sauve kanoa ma maine.” huno kae-malene. 20 Kae-malenegeꞋya YisasiꞋma yafaga yosale asai-malenaya kaiyaga ala kumaꞋmo aupaꞋale haeꞋya asai-malayanagiꞋya mukiꞋa Yuta veaꞋmoꞋya ani avona hapaliꞋya havimainae. PailatiꞋa tagufa (3) kefiti kae-malene. Yuta vayaꞋmogami kefitiꞋene Lomu vayaꞋmogami kefitiꞋene Kaliki vayaꞋmogami kefitiꞋene kae-malenegeꞋya hapaliꞋya havimainae. 21 Haviya yafe Yuta vayaꞋmogami mono note kava vayaꞋmoꞋya Pailatifena mage hae “Kagaya ‘Yuta vayaꞋmogamina ala sauve kanoꞋami ma maine.’ huka okaeka ma ke huka kao ‘Nagaya Yuta vayaꞋmogami ala sauve kanoꞋami mainoe hunoꞋma hia kanoa ma maine.’ huka kao.” huꞋya hae. 22 Hageno PailatiꞋa mage hie “Kae-malenoa kea hai kae-malenoe.” huno hie.
23 Ati vayaꞋmoꞋya Yisasina yafaga yosale nili heꞋya asai-maleteꞋya kenaꞋa foꞋa (4) hetaꞋma vaiꞋya ali-mainae. AyaꞋaya siotaꞋaene aligahe agayana mukiꞋa analegati afetegama lavi-maineana aye ohati siota hane. 24 Ohati siota hanea yafe ani ati vayaꞋmoꞋya kea mohu mehu huꞋya mage hae “Hatata ohuta afaꞋa musufa yama nehaya yokaloa kasi nelesunageno tagasesimoꞋa alisie.” huꞋya amakaiꞋami hu-mainae. AniꞋama haya kavala Anumaya Koti kefima nayoma kae-malenaya kemoꞋa ago efalote huno tamage nehie. Anima nayoma kae-malenaya kemoꞋa mage humaineane
“KenaꞋniꞋa fako huꞋya neꞋaliꞋya nago kenaꞋniꞋa kasi yokalo-leꞋya amakasesimoꞋa aligahie.” huꞋya kae-malenayane.
Kae-malenayanagiꞋya ati vayaꞋmoya mani kavala hu-mainae.
25 HageꞋya Yisasima asai-malenaya yafaga yosamo avatela Yisasina itaꞋamoꞋene nunaꞋamoꞋene he-ti-mainaꞋe. AnakaiꞋene Kalopasina aꞋamoꞋa MaliaꞋene hamoꞋamoꞋa Magatala kumate MaliaꞋene he-ti-mainae. 26 He-ti-mainageno YisasiꞋa itaꞋamona ageteno agaiꞋenema tokaeꞋya nemaiya anagapiti hau ayamopafima hau-mainea kanomoꞋna, YoniꞋnae, itaꞋamo avate he-titaꞋa mainoꞋageno taꞋageteno itaꞋamofena “AꞋmogae namona kagaikaꞋa nafaꞋnekaꞋae.” huno hie. 27 Huteno nagaifena “Namona itakamoꞋe.” huno higeꞋna nagaya ani yupa Maliana yagaigahe noniꞋalega avaleꞋna umainoe.
YisasiꞋa ago fali-maine.
28 Ani kea huteno YisasiꞋa “MukiꞋa aliꞋyaꞋniꞋa ago aliꞋna haꞋno hue.” huno agesafinaga havimaine. Nayoma Anumaya Koti kema kae-malenaya kemoꞋa efalote huno tamagema hisia yafe mage hie “Life nenage.” huno hu-maine. 29 HigeꞋya nofi alagafiti falote hia tina nagola havate-mai keꞋayola aliꞋya havagoꞋyafa kana yana ani lipi ayeteꞋya kaꞋyote vaiꞋya ali-saga huꞋya Yisasina avayale malenae. 30 Malageno YisasiꞋa mayu mayu huno neteno mage hie “Nenafagae naha-pai-mainana aliꞋyana ago aliꞋna haꞋno hue.” huno nehuno ageꞋya ainamagino agu nafaꞋneꞋamo atalegeno vigeno fali-maine.
Ati kanomoꞋa keveleti Yisasina haohipafi aye-maine.
31 Sapati yupahe talo tala hisaya yupagino ega ala Sapati kana falote hisia yafe Yuta vayaꞋmoꞋya anima yafaga yosaleꞋma hamae-malaya vayaꞋmogami amaugafamoꞋma SapatileꞋma yafaga yosale hanesia yafena ohamaigeꞋya Pailatife mage huꞋya mo havigae “Ati vayaꞋmoꞋya amaiya ali kofa hisageꞋya aupaꞋa falisageꞋya hipoꞋya huꞋya aliꞋya visae.” huꞋya mo havigae. 32 Hageno PailatiꞋa ati vaya hama-paigeꞋya mogayana YisasiꞋenema yafaga yosale asai-malaya kanolatamogani anaiya meli kofa hu-mainae. 33 Ali kofa huteꞋya Yisasina megayana ago fali-mainegeꞋya megeteꞋya aiya ali kofa ohunae. 34 Ali kofa ohageno nago ati kanomoꞋa keveꞋaleti Yisasina haohipafi meyegeno aupaꞋa ani keve kapitila kolamoꞋene timoꞋene taki-lavi-maine.
35 Taki-lavigenoꞋma age-mainea kanomoꞋa tamaha-nepaiye. Tamaha-nepaiya kea tamageꞋage ke hanea yafe agaiꞋa havilama hu-lineno tamaha-nepaiyafe tamakayaenena Yisasifena havitama tamakupi maletama tamametiti hisaya yafe tamageꞋage ke tamaha-nepaiye. 36-37 Nayona Anumaya Koti kema kae-malenaya kemoꞋa mage hu-maineane
“Amakaya nago ayamufaꞋa ali kofa ohugahae.” huꞋya kae-malenayane.
Nagi nagola Anumaya Koti kema kae-malenaya kemoꞋa mage huno hu-maineane
“Haohipafina keveletiꞋma aye-mainea kanomona agegahae.” huꞋya kae-malenayane.
Kae-malenaya kemoꞋa falote huno tamagema hia yafe mani kavala hu-mainae.
Yisasina haegafa komufi he-vai-tenae.
38 YosefeꞋa Alimatiyae huꞋya nehaya kumate nemaiya kanogino Yisasi ke havino akave nemalea kanogi Yuta vayafe koli huno Yisasifema ametiti nehia yana fala-ki-lineno mage huno Pailatina mo havige “Yisasina augafaꞋa aligahe nehue.” huno mo havige. Havigegeno PailatiꞋa “E.” huno higeno YosefeꞋa viaꞋyamo Yisasina augafaꞋa mo hipoꞋya huno alino emaine. 39 NikotimasiꞋa hagoteno Yisasite hanipinaga emainea kanomoꞋa Yosefena mo ha-maegahe kule fuki kana manaꞋage tina tole yosafiti he-fino ali havigu higeno manaꞋage tina falote higeno sigelile mo malegeno tetiꞋa (30) kilo falote higeno alino emaine. Ani tole yosalatamogani anakia meaꞋene aloꞋene alino emaine
40 Ani tole kanolatamogania vaꞋaꞋyamogani Yisasina augafaꞋa mo hipoꞋya huꞋana mopale maleneꞋana manaꞋage tina fale-teteꞋana kefe kana kenaleti augafalela ai-galaki galaki huꞋana haꞋya kiteꞋana aye-gasagi-malenaꞋe. MukiꞋa yupa Yuta vayaꞋmoꞋya vayaꞋamima faligeꞋya aniꞋa huꞋya neꞋamataya kava hu-tenaꞋe. 41 Ani kaiyaga Yisasina yafaga yosale nilima heꞋya asai-malenaya kaiyaga nago hoya hane. Ani hoyafina nagola vayaꞋma he-vai-ma-tesaya yafa kana, yaufa kafi-malenayane. Anifina nago vayala he-vai-oꞋama-tenaya yafa kapi aliꞋya mo he-vai-tenae. 42 Ani yupa Sapatihe haviꞋya talo tala hisaya kanafinagiꞋana ani matimatila aupateꞋma hanea yafe ani tole kanolatamogania Yisasina augafaꞋa aliꞋana anifi mo malenaꞋe.