23
Pailati aulagale Yisasina kaiyeke hutenae.
MukiꞋa kanisolefi metalu huꞋya mainaya vayaꞋmoꞋya hetiꞋya Yisasina avaleꞋya ala kava kanoa, Pailatite umainae. AvaleꞋya umaineꞋya aepa heꞋya “Ma kava huno kefo kavala humaine. Tagaya agonana mani kanomoꞋa tagai nofi vayafena mage hie ‘Kamani vayaꞋmogami kea neꞋataletama havi kava hiho.’ huno nehuno tagaifena ‘Takisi neꞋamamiya yana Sisana oꞋamiho.’ huno nehuno ‘Nagaya nagaiꞋniꞋa KalaisiꞋna, Sauve kano mainoe.’ huno humaine.” huꞋya hae.
Hageno PailatiꞋa Yisasifena mage huno havige “Kagaya Yuta nofi vayaꞋmogami SauveꞋami mainano?” huno havigegeno YisasiꞋa mage hie “KagaikaꞋa mani kea hai nehane.” huno hie. Higeno PailatiꞋa mono note kava vayafeꞋene mukiꞋa alitalu huꞋya mainaya vayafeꞋene mage huno hamapaiye “Kefo kavaꞋma hu-mainesiafene huꞋna atiyoana nago yamaꞋa omale.” huno hamapaiye. HigeꞋya tokiyaꞋage kefiti mage huꞋya hae “MukiꞋa Yutia kotega ute ete nehuno veafena mage humaine ‘Kamani vayaꞋmogami kea neꞋataletama ma kava hiho.’ huno humaveligeꞋya veaꞋmoꞋya ‘Ani kava humategahune.’ huꞋya hae. Kaliliti ani kavala aepa heno hulino hulino menia male neꞋe.” huꞋya hae.
Yisasina Heloti aulagale kaiyekea hutenae.
PailatiꞋa ani kea haviteno mage huno hamavige “Ani kanoa Kalili kano maineo?” huno hamavige. HamavigegeꞋya “E, ani kumateti kanoe.” huꞋya hageno “Heloti kava yagaimainea kotegati kanoe.” huꞋya hageno haviteno hutegeno Helotite umaine. Ani kanafina HelotiꞋa Yelusalemu nemaiyane.
HelotiꞋa Yisasina ageteno tusiꞋa muse hie. Avagema haviana “TokiyaꞋage avameꞋya yana nagoꞋa hinageꞋna agesue.” huno nehuno ayaꞋaya kanale Yisasina agesia agesa havianagi noꞋageane. Yisasina ageteno mukiꞋa kehena havige havige hugeteana YisasiꞋa nagola osi ke kanoꞋa ohune.
10 Ke ohuno maigeꞋya mono note kava vayaꞋene kahegi kema havilinaya anagaꞋene anile hetiꞋya maineꞋya tusiꞋa ke nehuꞋya “Na kava ma kava huno kefo kavala humaine.” huꞋya hae. 11 Hageno HelotiꞋene ati vayaꞋamoꞋyaene Yisasina huhaviya huteteꞋya kigi huteꞋya kamuge hatageꞋya vaineꞋateꞋya nagola kanale kena aliꞋya me faitetageno HelotiꞋa Yisasifena “Pailatite etetama avaletama viho.” huno humatene. 12 HelotiꞋene PailatiꞋene kame kanolata mainaꞋaleti ani yupa anakaya ali konaga ayemainaꞋe.
PailatiꞋa Yisasina “Yafaga yosale hetama asaigeno falino.” huno humaine.
13-14 PailatiꞋa mono note kava vayafeꞋene Yuta vayaꞋmogami kava vayafeꞋene vayaꞋyagamogamifeꞋene ke higeꞋya melitalu hageno mage huno hamapaiye “Tamakaya ma kanomofena ‘Kefo kava huno veafena ‘Kamani vayaꞋmogami kea neꞋataletama havi kava hiho.’ huno hamapai-maine.’ hutama nehutama nagaifena kaiyeke hutesane hutama avaletama ayanagi nagaya tamakai tamaulagafima havigoana ‘Kefo kavaꞋma humaine.’ hutama haya kavala tamage huno kefo kavala ohune huꞋna nehue. 15-17 AguꞋafina agoanagino HelotiꞋa aniꞋa huno ageana tagaitefe ‘Eteka vuo.’ huno hutegeno eanagi ageho mani kanoa falisia augafa kefo kavala ohuneafe afaꞋa kaꞋyo amiꞋna aumono maleteꞋna atalesugeno visie.” huno hie.
18 Hianagi mukiꞋa alitalu humainaya veaꞋmoꞋya ailulupeꞋya mage hae “Yisasina haegeno falino. Tagaya Palapasife nofipiti haꞋno hisie huta nehune.” huꞋya hae. 19 Ani PalapasiꞋa ala kumate vayaꞋyagamofe mage hie “Kava vayaꞋene tu higetao.” huno huteno nago kanoa haegeno falimainea yateti avaleꞋya kina hutenaya kanogiꞋya agaife ani kea hae.
20 Hageno PailatiꞋa “Yisasina atalesugeno afaꞋa visie.” huno agesa havia yafe nagoꞋene ke huno hamavige. 21 HamavigegeꞋya ala kefiti mage hae “Yafaga yosale nili hetama asaigeno falino. Yafaga yosale nili hetama asaigeno falino.” huꞋya humainae. 22 Hageno PailatiꞋa nagoꞋene eteno mage hie “NaꞋa higetama ani kea nehae? HanaꞋa kefo ya humaine? Nagaya atiyoana falisia kefo augafa kavala ohuneafe afaꞋa kaꞋyo amiꞋna aumono maleteꞋna atalesugeno visie.” huno hie.
23 Ani kea hianagi amakaya tusi tokiyaꞋage kefiti mage huꞋya hae “Yafaga yosale nili hetama asaigeno falino.” huꞋya tokiyaꞋage kegeꞋya hageno PailatiꞋma hia kemona amakai kemoꞋa hefalaki-maine. 24 KeꞋamona hefalakigeno PailatiꞋa haya ke haviteno Yisasifena “Yafaga yosale nili hetama asaigeno falino.” huno ati vayala hamapaimaine. 25 PalapasiꞋa vayafe “Kava vayaꞋene tu higetao.” huteno nago kanoa haegeno falimainea yateti avaleꞋya kina hutenaya kanoa tutu haya yafe PailatiꞋa “HaꞋno hanagi vuo.” huno huteanagi mukiꞋa vayaꞋmoꞋya Yisasifena “Yafaga yosale nili hetama asaigeno falino.” huꞋya haya kemo akave malene.
Yisasina yafaga yosale nili heꞋya asaimainae.
26 Yisasina avaleꞋya katega neꞋuꞋya Sailini SaimoniꞋene mo fotu humainae. SaimoniꞋa hoyafinagati kate eneꞋvigeꞋya ati vayaꞋmoꞋya motafa huꞋya yafaga yosa aliꞋya ayoꞋnale kofiteteꞋya “Yisasi akave kofika vuo.” huꞋya hutenae. 27 MukiꞋa veaꞋmoꞋya akave neꞋvageno aꞋnemoꞋya avi neꞋateꞋya hamau hume hume akave umainae. 28 NeꞋvageno YisasiꞋa maiyahae huno amaketeno mage hie “Yelusalemu mainaya aꞋnemogatama nagaifene hutama avia oꞋateho. Avima ategahena tamakaitamihe neꞋatetama nafaꞋneyagatamimofeꞋene avia atemateho. 29 Haviho haenagaꞋa nago kana falote hisigeꞋya mage huꞋya hugahae ‘Namo aꞋnemogatama nafaꞋne oꞋatetama numa noꞋamisaya yafena tusiꞋa muse hutama maiho.’ huꞋya hugahae. 30 Ani kanafina aepa heꞋya ala agoꞋyamofena mage huꞋya hugahae ‘Kolilavika aiso hulato.’ huꞋya hugahae. Osi agoꞋyahena ‘Mehi alika aiso hulato.’ huꞋya hugahae. 31 Nagaya haegafa ata kana huꞋna mainoa kanoe. Kefo yana tamage huꞋna ohunoa kano mainogeꞋya mani kavala hunenatayanagi tamakaya avaifa ata kana hutama kefo kava nehaya veaꞋne mainayafe na kava hulamategahae?” huno humaine.
32 Yisasina haegahe avaleꞋya neꞋuꞋya tolea kefo yama humainaꞋa kanolataꞋene hanaegahe anavaleꞋya umainae. 33 Anu ayamufae huꞋya nehaya kumate avaleꞋya uteꞋya yafaga yosale nili haeꞋya asaimainae. Tole kefo yama humainaꞋa kanolatane nago kanoa Yisasina tamaga kaiyagaꞋa haeꞋya asaimaleꞋya nago kanoa haoga kaiyagaꞋa haeꞋya asaimaleꞋya humainae.
34 YisasiꞋa Anumayamotega ke huno mage huno hie “Nenafagae mani vayaꞋmoꞋya kefo yama haya kavala ‘NaꞋa kava nehune.’ huꞋya havilama ohaya yafe aigeꞋamateka kefo yaꞋamia atalemato.” huno humaine. HigeꞋya ati vayaꞋmoꞋya kenaꞋa aligahe musufayama nehaya yokalo lageno amakaseno haiya kanomo alimaine.
35 AligeꞋya veala alitalu huꞋya hetiꞋya aulu heꞋya mainageꞋya kava vayaꞋmoꞋya kamuge hatageꞋya vaineꞋateꞋya mage hae “NagoꞋa veala amaugafa aligatimainea kanogi Anumaya KotiꞋma hau ayamopafi nehaiya kanoa taugafa aligatigahie huno hutenea kanoma mainesiana agaiꞋa augafa aligatino.” huꞋya hae.
36-38 AnuteꞋma kaeꞋya malaya avomoꞋa mage huno hie “Mani kanoa Yuta veate ala Sauve kanoe.” huꞋya kaeꞋya malenae. MalenageꞋya ati vayaꞋmoꞋya aniꞋa huꞋya kamuge hatageꞋya vaineꞋateꞋya atuꞋage nofi alagafiti tina neꞋamiꞋya mage hae “Kagaya Yuta vayate sauve kanoꞋamima mainesanana kagaikaꞋa kaugafa aligatio.” huꞋya hae.
Kefo yama humainea kanomoꞋa Yisasina aipa amine.
39 Nagola kefo yama humainea kanoa yafaga yosale nili heꞋya asaimalaya kanomoꞋa Yisasifena hu-haviya huteno mage huno hie “Anumaya KotiꞋma taugafa aligatigane huno hugatenesia kanoma mainenuka kagaikaene taꞋagaiꞋene yosaleti ali hakao hugeta tavimano.” huno hie. 40 Higeno nagola kefo yama higeꞋya yafaga yosale nili heꞋya asaimalaya kanomoꞋa ani kea haviteno kemakino mage huno hie “Vae kagaya Anumaya Kotifena kolia nohuka ani kea nehano? Kefo yama humainoꞋa anonaꞋa nagopi taꞋagaila nilia laꞋahaeꞋya asailaꞋa-tenayanagitaꞋa faligahuꞋe. 41 TaꞋagaya kefo yatiꞋamo anonaꞋa fatago kava hayanagi ma kanoa nagola osi kefo yamaꞋa omalene.” huno hie. 42 Nehuno ani kanomoꞋa Yisasifena mage huno hie “Yisasiga kava yagaigahema esana kanafina nagaifena kagesa havi namio.” huno hie. 43 Higeno YisasiꞋa kenonaꞋa mage huno hie “Tamagelafa huꞋna kahanepauve meni kanoꞋa nagaiꞋene kanale maige maige hisaya kumatela tokaetaꞋa umaigahuꞋe.” huno hapaiye.
YisasiꞋa falimaine.
44 Anile yagemoꞋa euno amuꞋnokaꞋno higeno halemainea yamoꞋa haꞋno higeno mukiꞋa kotega tusiꞋa hanikino viaꞋyamo une kanalega eteno ali halemaine. 45 Ani hanimo aguꞋafinaga ala mono nopima asaimalenaya kenagefamoꞋa* amuꞋnopiti aipa hulole humaine.
46 Aipa hulole higeno YisasiꞋa ala kefiti mage huno hie “Nenafagae nagu nafaꞋnea kagai kayapi nemaloe” huno nehuno haimula atalegeno vigeno falimaine. 47 Faligeno ati vayate kava kanomoꞋa anile maineleti mukiꞋa yama hia kavala ageteno Anumaya Koti agi alisaga nehuno mage huno hie “Tamage mani kanoa kefo yana nohia kanoe.” huno humaine.
48 “Na kava hutesafi agetetae.” huꞋya melitalu humainaya veaꞋmoꞋya mukiꞋa humainea kavala ageteꞋya tusiꞋa hamau huneꞋateꞋya havi kafa yogime yogime noꞋamilega ataleꞋya umainae. 49 Vayanagi mukiꞋa veaꞋmoꞋyaene Kaliliti akave emainaya aꞋneyagaene aluꞋale hetiꞋya maineꞋya hutaya kavala agemainae.
Yisasina yafa kapi hevaitenae.
50-51 Nagola fatago kanoa YosefeꞋe, Yuta vayaꞋmogami Kanisolefi maineanagi “Yisasina haegahune.” huꞋya haya kehena “E, kanalele.” huno ohunea kanoa Yuta veaꞋmogami kotega Alimatiyae huꞋya nehaya kumate nemaiya kanogino Anumaya KotiꞋma kava yagaisia kanahe muse huno agava nemaiya kanoe.
52 Ani kanomoꞋa Pailatite viaꞋyamo mage huno havige “Yisasina augafaꞋa aligahe nehue.” huno havige. 53 Havigegeno PailatiꞋa “E” higeno yafaga yosaleti haino ali hakao hulino elavino memaleneno kenaleti augafalela aigalaki kalaki huno haꞋya kiteno alino viaꞋyamo he falageꞋya kafimalenaya yafa kane, anifina vayala hevai oꞋamatenaya yafakapima alino mo hevaitene. 54 Ani yupa Sapatihe haviꞋya talo tala hisaya kanagino Sapatia ago evaꞋyi hugahe higeno YosefeꞋa ani kavala humaine.
55 HigeꞋya Kaliliti YisasiꞋene tokaeꞋya emainaya aꞋneyaga Yosefe akave uꞋya yafakapima hevaitea yana mogemainae. 56 MogeteꞋya ayaꞋamoꞋya augafaleꞋma faletesaya yana manaꞋage tiꞋene masaveꞋene talo tala nehageno Sapati kanamoꞋa evaꞋyi higeꞋya kahegi kemo akave maleꞋya maifalu huꞋya mainae.