1 Ani yupa YisasiꞋene tokaeꞋya nemaiya anagaꞋmoꞋya Yisasite mage huꞋya me havigae “Hana kanomo muki vayala amakaseno Anumaya Koti kava yagai-mainea kumatela uhakote-mainea kanoa maigahie.” huꞋya havigae. 2 Havigageno YisasiꞋa nago osi nafaꞋnea ke higeno egeno mukiꞋa vayaꞋmogami amuꞋnopi avaleno he-ti-tene. 3 He-ti-teneno mage huno hie “Nagaya tamage-lafa huꞋna tamaha-nepauve tamakayama tamakuꞋa ai-yahae hutama nafaꞋnemoꞋyama amaugafa aliꞋya nohaiya kava hutama osi nafaꞋnemogami avamete ohisayana Anumaya KotiꞋma kava yagai-mainea kumatela hai ofalegahae.” 4 Nago kanomoꞋa agaiꞋa augafama alino ohaino osi nafaꞋnemo avamete maisiana ani kanomoꞋa nagoꞋa veala amakaseno Anumaya Koti kava yagai-mainea kumatela hagote kano maigahie. 5 NagoꞋa veaꞋmoꞋya nagaifema huꞋya ma ma osi nafaꞋnema avaleꞋya falu fala hu-tesayana nagaiꞋenena navaleꞋya falu fala hu-nenatae.

6 NagoꞋa veaꞋmoꞋya nagoꞋma nagaife haviꞋya amakupi malenaya anagapiti nago osi kanohema “Kefo yama huo.” huꞋya hisayana tusiꞋa kefo kava nehayanagiꞋna tusiꞋa kana ya amamigahue. Ala yafakefaleti ani kanomo ageꞋyafi maleꞋya nofi ki-teteꞋya hage lipi hagaꞋyu hu-talageno ti nakaino falisiana ani kana yamoꞋa afa ya kana ya haneanagi nagaya tusiꞋa kana ya amamigahue. 7 AvoꞋnio ma mopale veaꞋmogatama tusi nahau hu-nelama-toe. Mopafi mainaya kanafina “Kefo yama hiho.” huꞋya aye-mavataga hisaya yana falote hugahianagi nagoꞋa veaꞋmoꞋya “Kefo yama hiho.” huꞋya aye-mavataga hisaya veafena “AvoꞋnio kefo kava nehananagika kana yana aligane.” huꞋna tusi nahau hu-nelama-toe.

8 KayaꞋene kaiyamoꞋene “Kefo yama huo.” huꞋana kavaleꞋana havi kapima katesaꞋagekahena ani kaiya kayana ai-fakalika hagaꞋyu hutalo. HagaꞋyu hu-talesanana kanalele. Kaugafa haviya hu-mainesia kano maisanana kanalelagika haꞋno ohu kahaimuka hanesia kano maiyo. Havigu tole kayano tole kaiyao kefo ya hisana kagesa kaminegeka kefo yama hu-mainesana yafe kavaleno hani yapi agola tegelege nehia atafi hagaꞋyu hu-gatalegahie. 9 KaulagamoꞋa agesia yamoꞋma kefo ya hisana kagesama kaminageka ani kaulaga ali faꞋyika hagaꞋyu hutalo. Ali faꞋyi-talesanana kanalele. Nagoke kaulaga hanesigeno kanale haꞋno ohu kahaimula kamisigeka alika maigananagi havigu tole kaulagamoꞋa kefo ya hisana kagesa kaminegeka kefo yama hisanafe hani yapi tegelege nehia atafi kavaleno hagaꞋyu hu-ga-talegahie.

10-11 Tamakaya kaꞋye ho. Havigu nagoꞋa osi anagaꞋnihe “Afa ya kana veaꞋne mainae.” hutama huyafenagi nagaya mage huꞋna tamaha-nepauve ani osi anagala ensole vayaꞋamimoꞋya ani nafaꞋneꞋyagale kava neꞋyagaiꞋya mukiꞋa yupa ikapinaga maineꞋya Nenafa aufina neꞋagae.

12 Na tamakesa nehaviye? Nago kanomoꞋa vani hataletiꞋa (100) afu mainefiti nagola fanane higeno ani afumona nefaꞋa mukiꞋa afuꞋa talapinaga amataleno talapinaga viaꞋyamo nagokeꞋma fanane hu-mainea afuꞋahe ati-yeno yeno ali falote hisio? E, fananema hisigenoꞋa aniꞋa huno ati-yegahie. 13 Nagaya tamage-lafa huꞋna tamaha-nepauve agoꞋma fanane hu-mainesia afuma ali falote huno avalesiana tusiꞋa muse hugahie. Naiti nainiꞋa (99) afuyagaꞋahena muse hianagi nagokeꞋma fanane hu-mainesia afuma ali falote hu-tenoꞋa tusiya huno musena hugahie. 14 NaꞋa hu-mainegi ikapinaga mainea NelamafaꞋa nagola osi anagaꞋa fanane hisia yafena nohaiye.

15 Kafu-kaganaꞋma kefo yama hu-ga-tesigeka tanakaya tokaetana mainetana kefo yama hu-mainesia yana avelio. Ave-lisanageno kagai kema haviteno kefo yama hisifitila aguꞋa ai-yahae hisigeka avaleka kagaika kametega ategane. 16 Ateganagi kekama ohavisigekahena nagokepi tole kanola anavaleka vinuka tolefi (2) tagufa (3) vayaꞋmoꞋya hu-ga-tenea yana ageteꞋya hu-falote huꞋya fako huꞋya ani kanomona aumono maleho. 17 Aumono maletesageno ani kanoꞋmoꞋma nagoꞋene amakai kema ohavisigeka kagaya Yisasife haviꞋya melitaluma huꞋya maisaya veapi avaleka ugeꞋya aumonola maleho. AumonoꞋma malesageno ani vayaꞋmogami kema ohavisigeka kagaya mage huka huto “Yisasi kea ohavi vaya kana hana kanomoga tagaiꞋenena eomaika kahaote maiyo.” huka huto.

18 Ani kema hu-tesayana tamage-lafa huꞋna tamaha-nepauve tamakaya ma mopale mainayana “Ma ya atafa hutama tokiya vaiho.” hutama hisayana Anumaya KotiꞋa ikapinaga aniꞋa huno “Ani yana atafa hiho.” hu-lokiya vaigahie. Tamakaya ma mopale mainetama nago yafema “AfaꞋa ataleho.” hutama hisayana Anumaya KotiꞋa ikapinaga aniꞋa hugahie.

19 EteꞋna nago kea tamaha-nepauve mopafi mainetama tole kanolaganima nago yafema nagoke anaku anakesaleꞋma mainenuꞋana ani yafena Anumaya Kotitega havigesaꞋageno ikapinaga mainea NeꞋanafaꞋa anamigahie. 20 E, tole (2) kanofi tagufa (3) vayapi nagai nagileꞋma haviꞋya melitalu hisayana nagaya nagaiꞋniꞋa amuꞋnoꞋamifina maigahue huno hu-maine.

21 PitaꞋa Yisasite eno mage huno hie “Anumayamogae naꞋmagi kana nafuꞋnaganana kefo yana hu-na-tesigeꞋna ani kefo yamaꞋahe aigeꞋateꞋna atale-tesue? SeveniꞋa (7) yupa kefo yama hu-na-tesigeꞋna aigeꞋateꞋna atale-tesuo?” huno havige. 22 Havigegeno YisasiꞋa mage huno hapaiye “Kagaifena seveniꞋa (7) yupa ani kavala huo huꞋna nohugi nagaya mage huꞋna nehue kasagoꞋya yupa ohavunamaꞋa kanale havi yama hu-ga-tesigeka aniꞋa huka ohavunamaꞋa kana aigeꞋateka ataleto huꞋna nehue.” 23 Anumaya Kotife “Kava yagai-nato.” huꞋya hu-mainesaya veaꞋmoꞋya ma kava nehae. Nago kumate sauve kanomoꞋa agai aliꞋya veafe mage huno hie “Yoka kaminoa moneꞋniꞋa anonaꞋnia fatago hutama namiho.” huno hie. 24 Huteno fatago hugahe nago kanoa avalegeno eno aminea yatefe anonaꞋa ohavunamaꞋa monegefa, nago kanomoꞋma fifitiniꞋa (15) kafu aliꞋya alino ne-mainea augafa mone eteno anonaꞋa amisia yana hane. 25 Haneanagi monema amisia amukoꞋa omalegeno kava kanomoꞋa mage huno hie “Kagaikaene akamoꞋene nafaꞋnekaene afenoꞋyakaene alu kanomote atalegeno miya hisigeꞋna kagaiteti anonaꞋa monea alino.” huno hie. 26 Higeno ani aliꞋya kanomoꞋa kava kanomo aiyafi aleꞋya meyeno mage huno hie “NaꞋa ohuka kahau hu-na-teka ako huka nagava mainegeꞋna nagaya haenagaꞋa naminana yatela anonakaꞋa mukiꞋa kamigahue.” huno hie. 27 Higeno ala kava kanomoꞋa aliꞋya kanoꞋahena tusiꞋa hau hu-teteno anonaꞋama oꞋamia yafena aigeꞋateno atale-tene.

28 Atale-teanagi ani aliꞋya kanomoꞋa hati-lavino viaꞋyamo tokaeꞋana aliꞋya neꞋaliꞋa kanomona moge-maine. Ani kanomoꞋa nago yupa agaifena mage huno hie “Nagoke Sotama aliꞋyana aliꞋya nenaya augafa mone yoka namio.” huno higeno amianagi anonaꞋa oꞋamine. OꞋaminea yafe ani kava kanomoꞋma hau hu-tenea kanomoꞋa ani afaluꞋamona ageꞋyafi atafa hu-lineno mage huno hie “Kagaila yoka kaminoa yana anonaꞋa mukiꞋa yaniꞋa aupaꞋa namio.” huno hie. 29 Higeno aliꞋya tokaeꞋana neꞋaliꞋa kanomoꞋa aleꞋya ayeno mage hie “NaꞋa ohuka ataleka afaꞋa kahau hu-na-teka ako huka nagava mainegeꞋnao. Haenaga anonakaꞋa kamigahue.” huno hie. 30 Higeno ani kanomoꞋa mage huno hie “AꞋao naꞋa kehena nonahaiyafe nofi nopi hu-ga-tesugeka maineka haenaga anonaꞋa namiteka nofi nopitila ataleka maigane.” huno hie. 31 HigeꞋya nagoꞋa tokaeꞋyama aliꞋya neꞋaliya veaꞋmoꞋya naꞋama hia yafena haviteꞋya amaipamoꞋa haviya higeꞋya kava kanomote mukiꞋa hu-mainea kavafena mo falote hae. 32 Mo falote hageno ala kava kanomoꞋa atale-tenea aliꞋya kanoꞋahe ke higeno egeno mage huno ha-paiye “Kagaya tusiya huka havi aliꞋya kano mainane. Hagoteka nagaifena avi metanageꞋna anonakaꞋa aigekateꞋna atalega-tenoe. 33 Nagaya kagaifena nahau hu-ga-toanagi naꞋa higeka ani avamete kavala ohuka kagaya tokaeka aliꞋya neꞋalina kanohena kahauna hu-oꞋatane?” huno hie. 34 Huteno kava kanomoꞋa tusiꞋa hai-vaiteno kina nopi avaleno viaꞋyamo kaꞋyo amisaya vayaꞋmogami amayapi ategeno mage hie “Tusi agata ya amitegeno haenagaꞋa mukiꞋa yaniꞋa anonaꞋa namitesigetama atalegeno vino.” huno hu-maine. 35 YisasiꞋa mage huno hu-maine “Tamakaya tamafu-tamakanaꞋya kefo yama hu-lama-tesagetamahena amegatila hu kanale ohutama tamage hutama tamaipa kanale yapiti aigeꞋamatetama atale-oꞋama-tesayana ikapinaga mainea NenafaꞋa aniꞋa huno ani mukiꞋamogatamina kinama hu-tenea avamete huno hu-lamategahie.” huno hu-maine.