24
YisasiꞋa “Ala mono nomoꞋa tagape ai-lavigahie.” huno hu-maine.
YisasiꞋa ala mono nona neꞋataleno vigeꞋya agaiꞋaenema tokaeꞋya nemaiya anagaꞋmoꞋya ayaꞋamoꞋya ala mono noꞋyaga ave-liye. Ave-ligeno YisasiꞋa mage huno hie “Tamakaya mukiꞋa ma noꞋyaga neꞋagao? Tamage huꞋna tamaha-nepauve ani nomo yafaꞋyaga mukiꞋa alino lagape ai-talesigeno aposi-lavigeno nago yafamoꞋa nago yafamo agupifina ai-kalo huno omaigahie.” huno hie.
YisasiꞋa “KasagoꞋya kana yamo falote hugahie.” huno hu-maine.
YisasiꞋa Olivi yosa hanea agoꞋyamo agegayalega haino mopale mainegeꞋya agaiꞋaenema tokaeꞋya nemaiya anagala amakaiꞋamige mage huꞋya me hae “Na kanafi ani yamoꞋa falote hugahie? Hana augafa tokiya avame yamo esana kanaene ma mopama haꞋno hisia kanaene faloteꞋma hisia yana taveligahie?” huꞋya havigae
Hageno YisasiꞋa mage huno hie NagoꞋa veaꞋmoꞋya havigema tamaha-paisagetama ohavisaya yafe kaꞋye ho. KasagoꞋya vayaꞋmoꞋya nagai nagi ayeꞋya nagoke nagokeꞋmoꞋya “Tamaugafa ali-gatisua yafe Anumaya KotiꞋa hu-na-tegeꞋna neꞋue.” huꞋya hisageꞋya kasagoꞋya veaꞋmoꞋya amakai kea haviteꞋya amakave malegahae. Malegahagi “NagoꞋa kotega kame nehae. NagoꞋa kotega tu hugahe nehae.” huꞋya tamaha-paisagetamahena kolia ohiho. Ani yaꞋyagamoꞋa hagoteno falote hugahianagi ma mopama haꞋno hisia kanamoꞋa aupaꞋa huno falote ohugahie. NagoꞋa vayaꞋmoꞋya alu vayaꞋenena kamea hugahae. Ala kotega vayaꞋene nago ala kotega vayaꞋene kamea hugahae. KasagoꞋya alu kote kotega tusiꞋa kafu nehuꞋya amakatesia kanaene falote hisigeno tusiꞋa imila aligahie. Ani yaꞋyagamoꞋa afaꞋa aꞋnemoꞋya nafaꞋnema ategahe hageno aepa heno agatama neꞋaiya avamete kava hugahianagi haenagaꞋa tusiꞋa tamakata aisia yana falote hugahie.
Tamakaya nakaveꞋma neꞋaya yafe tamatafa huꞋya ali haviya hu-lama-teteꞋya tama-haesagetama faligahae. Nagima neꞋayaya yateti kasagoꞋya vayaꞋmoꞋya amaipa kafa he-lama-tegahae. 10 Amaipa kafa he-lama-tesaya yateti kasagoꞋya veaꞋmoꞋya nagaifena haviꞋya amakupi maleꞋya amametitima nehaya yana ataleꞋya nagoꞋa veala amakesi huꞋya amaipa kafa he-lama-tegahae. 11 KasagoꞋya havige amaune vayaꞋmoꞋya havige hisageꞋya kasagoꞋya veaꞋmoꞋya amakai kea haviteꞋya amakave malegahae. 12 Kefo yama nehaya yamoꞋma ala hisigeno nagoꞋa veaꞋmoꞋya nagoꞋamimogamifema hamau amayamopafi nehamaiya yamoꞋa osi hugahie. 13 Osi hugahigi nagoꞋa veaꞋmoꞋya nagai kema atafa huꞋya tokiyaꞋage hume humema visageꞋnahena nagaya eteꞋnama esua kanafina nagai kema atafa hu-linesaya veaꞋmogamina Anumaya KotiꞋa amaku amamena ali-gatigahie. 14 Anumaya KotiꞋma kava yagai-mainea yafe kanale mono kea mukiꞋa ma mopafi veaꞋmogamina hama-paisageꞋya havitesageno ma mopamoꞋa haꞋno hugahie.
TusiꞋa havi yatafa falote hugahie.
15 YisasiꞋa mage huno hie nayoma mainea aune kanoa TanioloꞋa tusi havi yana, ma mopa alino hagagitalesia yamoꞋa tamaꞋyo aisia kava falote hisia yafe taha-pai-maine. Anima hu-mainea kema hapalitama havisamogatama havilama hiho. Ani yamoꞋa alu aotage yapi he-ti-mainesigetama agegahae. 16 Agenutamahena Yutia mainesaya veaꞋmogatama tamaiyayetama agoꞋyalega faletama viho. 17 NagoꞋa veaꞋmoꞋya nogatofule haiꞋya mainesaletila afenoꞋyaꞋamima alisaya yafena eteꞋya nopinaga ohaiho. 18 NagoꞋa veamoꞋya hoyafinaga mainesaletila eteꞋya kenaꞋamima alisaya yafena notega oꞋviho. 19 AvoꞋnio ani kanafina amaipaene aꞋnene nute ani-linesaya nafaꞋnemogami itaꞋamimoꞋyaenefena tusiꞋa nahau nehie. 20 Nehigi nunamuna mage hutama havigeho “Tani koꞋma tisia ikateꞋene Sapati yupaenena ani yamoꞋa falote ohinageta faleta oꞋvisune.” hutama havigeho.
21 Ani kanafina tusiꞋa kana yamo falote hugahie. EheꞋma Anumaya KotiꞋa ma mopama taloma hu-malenea kanaletiꞋene meni kanafiꞋene ani avamete ala kana yamoꞋa falote ohuneane. Falote ohuneanagi tusiꞋa kana yamo ala hutesigeno haenagaꞋa aniꞋa huno falote ohugahie. 22 Anumaya KotiꞋa ani havi kanama alino aupa hu-malene. AniꞋama ohileꞋasina mukiꞋa veaꞋmoꞋya falileꞋasinagi. Anumaya KotiꞋa haigenoꞋma hapali-ma-tenea veafe agesa havino amaugafama ali-gatisia yafe ani kanaꞋa alino aupa hugahie.
23 Ani kanafina nagoꞋa veaꞋmoꞋya mage huꞋya hugahae “Anumaya KotiꞋma taugafa aligatigahie huno hutenea kanoa ma mainegi ageho. Atu mainegi ageho.” huꞋyama hisagetamahena “Tamage nehae.” hutama tamametitia ohiho. 24 Ani kanafina nagoꞋa havigeꞋage amaune vayaꞋene “Nagaya Anumaya KotiꞋa tamaugafa aligatigahie huno hu-na-tenea kano mainoe.” huꞋya havigema hisaya vayaꞋenena evaꞋyi huꞋya veaꞋmogamina aye-mavataga hugahe tokiyaꞋage avame yana hugahayanagi Anumaya KotiꞋa haꞋye higeno hapali-ma-tenea veaꞋmoꞋya ani kea ohavigahae. 25 Tamage ani yana falote ohunaya kanafi mani kea ago tamaha-paugi haviho.
26 NagoꞋa veaꞋmoꞋya “Ani kanoa kaꞋme kotega maine.” huꞋya hisagetamahena oꞋviho. “Nopinaga maine.” huꞋyama hisagetamahena ani kea havitama tamametitia ohiho. 27 Ikapinagati emainoa kanoa vayaꞋmo natenea nafaꞋnemoꞋna eteꞋna esua yamoꞋa maꞋa hugahie yagema vaꞋyi nehilegati aulumaya kotino aupaꞋa mukiꞋa kotega ai-vasa nehia avamete huꞋna nagaya eteꞋna egahue.
28 Afuma fali-mainea kefafima hakikimoꞋya yage yage huꞋya alitaluma nehaya avamete huꞋna ikapinagati emainoa kanomoꞋna mukiꞋa veaꞋmogami amuꞋnopi egahue.
Ikapinagati emainea kanoa vayaꞋmo atenea nafaꞋnea egahie.
29 Ani havi kanamoꞋma haꞋno hisigenoꞋa yagemoꞋa hani-kinageno ikamoꞋa ai-vasa ohugahie. KaꞋnefiꞋmoꞋa ikatetila atafai-lavigahie. IkateꞋma hanea yamoꞋa alu kate kate huno vaiyegahie. 30 Ani yaꞋyagamoꞋa haꞋno hutesigeꞋna ikapinagati emainoa kanoa vayaꞋmo natenea nafaꞋnemoꞋna esua alekana yana ikate falote hisigeꞋya mukiꞋa ma mopafima mainaya veaꞋmoꞋya hamau huꞋya avi-tegahae. Ikapinagati emainoa kanoa vayaꞋmo natenea nafaꞋnemoꞋna ikapinagati siate elavisugeꞋya nagegahae. TusiꞋa tokiya yaniꞋaene tusiꞋa hale yaniꞋaene esugetama nagegahae. 31 NagetesageꞋna ensole vayaꞋnia hu-ma-tesugeꞋya ala ufe kemo nehinageꞋya yagemoꞋma tavi nefalelegatiꞋene evaꞋyi nehilegatiꞋene aluga aluga haupalegatiꞋene mukiꞋa ma mopafi nagaiꞋniꞋa nahaꞋye higeꞋna hapali-ma-tenoa veaꞋnea amavalesageꞋya aluga aluga ma mopamona atupaleti melitalu hugahae.
Tamakaya fiki yosale agevame hiho.
32 YisasiꞋa nagoꞋene mage huno hie fiki yosamoꞋa nago avame yana tamave-ligahigi ageho. Ani yosamoꞋa hagoteno akopapiti agusasima ayeno amuꞋmalesigetamahena “Anuna neꞋvalea kanamoꞋa ago falote hugahie.” hutama nehae. 33 NaꞋa hugahianagi manima tamaha-nepauva kuguva yama agenutamahena “YisasiꞋa esia kanamoꞋa ago aupa higeno fiate hetino maineanagino ago egahie.” hutama tamakesa havigahae. 34 Nagaya tamage huꞋna tamaha-nepauve meni kanafima mainaya veaꞋnea ofalinesageno ani yamoꞋa falote hugahie. 35 IkaꞋene ma mopaene fanane hugahianagi nagai kemoꞋa fanane ohugahie.
Ani yama falote hisia kanahena nago kanomoꞋa ohavine.
36 Manima tamaha-nepauva kanama falote hisia kanahena nago kanomoꞋa ohavine. Ikapinaga mainaya ensole vayaꞋmoꞋyaenena ohavinae. Anumaya Kotina nafaꞋneꞋamoꞋnaenena ani kanama falote hisia kanahena ohavinoe. Ohavinogi NenafaꞋa agaiꞋage haviline. 37 Nagaya ikapinagati emainoa kanoa vayaꞋmo natenea nafaꞋnemoꞋna eteꞋna esua kanafima mainesaya veaꞋmoꞋya nayoma NoaꞋma mainea kanafima mainaya veaꞋmoꞋya hu-mainaya avamete kava hugahae. 38-39 TimoꞋa yaufa hoꞋokinea kanafima mainaya veaꞋmoꞋya kavela neneꞋya tina neneꞋya nehuꞋya aꞋnema aliyamoꞋene vele uyamoꞋene mukiꞋa kanafina ani yafekeꞋya amakesa havi havi huꞋya mainageno NoaꞋa ala tipi kalefi haisaga hu-maigeno tusiꞋa lina hogino mukiꞋa ani veaꞋnea alino haviya higeꞋya agola fali haꞋno hu-mainayane. Nagaya ikapinagati emainoa kanoa vayaꞋmo natenea kanomoꞋna eteꞋna esua kanafima mainesaya veaꞋmoꞋya nayona NoaꞋma mainea kanafima mainaya veaꞋmoꞋya hu-mainaya avamete kavala hugahae. 40 Tamage tamaha-nepauve nagayama eteꞋna esua kanaleꞋma tole vekalatana nagola hoyafima aliꞋya neꞋalisaꞋagenofena Anumaya KotiꞋa nagoke neꞋavaleno nagola alita-ye-talegahie. 41 Tole atalama tokaeꞋana aliꞋya neꞋalisaꞋagenofena Anumaya KotiꞋa nagoke neꞋavaleno nagola alita-ye-talegahie. 42 AnumayatamimoꞋa evaꞋyima hisia kanahena ohavinagi tamakesa havige havige hutama kava yagaitama maiho. 43 Tamage huꞋna tamaha-nepauve nomona nefaꞋa musufa kanomoꞋa nomaꞋafima ehai-falesiana kegela na kanalelo huno agoꞋma havimainesiana yagaino mainageno musufa kanomoꞋa nomaꞋafina ehaino ofalegahie. 44 TamakaiꞋenena talo tala hutama maiho. “Menia omegahie.” hutama hisaya kana kanoꞋale ikapinagati emainoa kanoa vayaꞋmo natenea nafaꞋnemoꞋna egahue.
Kanale aliꞋya kanomoteꞋene havi aliꞋya kanomoteꞋene avame kea hu-maine.
45 AnumayamoꞋa mage huno hie aliꞋya kanoa kanale agu agesa hanea kanoa aliꞋyamaꞋale agegeno alige aligema nehia kanoa tamakaipina hanate maine? NaꞋama nehisia kanomofena kava kanomoꞋa mage huno hugahie “MukiꞋa aliꞋya veatela yagai-maineka kavela fako huka mukiꞋa kanafina amamite amamite huo.” huno hugahie. 46 Hugahianagi haenagama ani ala kanomoꞋa eteno esiana hapai-mainea augafa kavaꞋma nehinunofena ani aliꞋya kanomoꞋa muse hugahie. 47 Tamage huꞋna tamaha-nepauve naꞋama nehisia aliꞋya kanomofena kava kanomoꞋa mage hugahie “MukiꞋa yaniꞋa kava yagaiyo.” huno hugahie. 48-49 Hugahianagi ani aliꞋya kanomoꞋa kefo yama nehisia kanoma mainenunofena agaiꞋa agesa mage hunoꞋma havisiana “Kava kanoꞋnia menia hivi huno omegahie.” huno nehuno agaiꞋa yagai-mainesia veneꞋnegi munaꞋnegi nehamaeno ala kanomo kaveꞋene haviliꞋenena neneno aneginagi hugahie. 50 Ani kavala maino nehisiana “Omegahie.” huno hisia yupamo kana kanoꞋale ani kava kanoa egahie. 51 Enunofena ani havi kavaꞋma maino nehisia kanomona kaꞋyo kevea amiteno alino haviya hu-teteno mage hugahie “Vagala vayaꞋene amakupi haviꞋya omaleꞋya amegati nehaviya vayaꞋene maiyo.” huno hu-tesigeno visiaꞋamo anilega avia mo neꞋateno ave kemoꞋa tusiya hugahie.