3
Sapati yupa YisasiꞋa aya falimainea kanoa alino kanale hutene.
YisasiꞋa nago yupa mono nopi haino mainegeno nago kanoa ayamo falimainea kanoa anile maine. MainegeꞋya nagoꞋa vayaꞋmoꞋya YisasiꞋma havi kavaꞋma hisiafene huꞋya amata huꞋya mainageno “YisasiꞋa Sapati yupa ani kali kanoa alino kanale hutesio.” huꞋya Yisasina amata huꞋya mainae. Amata huꞋya mainageno YisasiꞋa ayama falimainea kanomofe mage huno hapaiye “Hetika vaya amuꞋnopi me hetio.” huno hapaiye. Hapaiteno YisasiꞋa amata huꞋya maiya vayafena mage huno hie “Tamahavigoe Sapati yupama hisaya yafena mono kemoꞋa naꞋane humaine? Sapati yupa vayala aliꞋya kanale humategahao ifi ali haviya humategahae? Sapati yupa veala amavaleꞋya avina me matesao ifi veala tavata hamaegahae?” huno hamavigegeꞋya kea ohuꞋya mainae. Kea ohuꞋya maigeno YisasiꞋa mukiꞋa vaya amaulagafi moge mege hiana mukiꞋamogami amakuꞋmoꞋa atalako hia yafe aipamoꞋa kana higeno kali kanomofe mage huno hapaiye “Kayana aipi huo.” huno higeno aipi hiana ayamoꞋa kanale hutene. KanaleꞋma hutea yafena Falasia vayaꞋmoꞋya mono nona neꞋataleꞋya Heloti vayaꞋene alitalu huꞋya huge havige huteꞋya “Yisasina hanaꞋa huta haesunageno falisie.” huꞋya vege humainae.
Yisasite kasagoꞋya veala ti agegayale melitalu humainae.
7-8 YisasiꞋene agaiꞋaenema tokaeꞋya nemaiya anagaꞋaene Kalili ti kotumo agegaya neꞋvageꞋya kasagoꞋya veaꞋne Kaliliti akave vae. YutiatiꞋene YelusalemutiꞋene ItumeatiꞋene Yotani tifaligati veaꞋnene TaiyatiꞋene SaitonitiꞋene mukiꞋa veala YisasiꞋma hia avageꞋa haviteꞋya agaitega vae. NeꞋvageno agaiꞋaenema tokaeꞋya nemaiya anagafe mage huno hamapaiye “MukiꞋa alitalu haya veaꞋmoꞋya nagaila ayenatunefayafe tipi kalea talo tala hunateho.” huno hie. 10 KasagoꞋya veala kaliꞋamia alino kanale humatea yafe mukiꞋa kali veaꞋmoꞋya Yisasi augafale avate hugahe ayetufeliꞋya vae. 11 NeꞋvageꞋya Kefo AvamuꞋmoꞋya vea amakusafi maineꞋya ageteꞋya Yisasina aulegati mopafi amakoꞋya meyeꞋya ala kenake huꞋya mage hae “Kagaya Anumaya Kotina nafaꞋneꞋamoga mainane.” huꞋya hae. 12 Hageno YisasiꞋa tokiyaꞋage ke huno mage hie “Ani kea nagoꞋa veala hamaopaiho.” huno hamapaiye.
YisasiꞋa agaiꞋa tuelufuꞋa (12) anagaꞋa hapalimatene.
13 YisasiꞋa agoꞋyafi haiteno haiya vayafe ke higeꞋya emainae. 14-15 Ageno ani vayapiti tuelufuꞋa (12) vaya hapalimateteno agaiꞋaenema tokaeꞋya maisaya yafeꞋene agai kema huhaleꞋya hisaya yafeꞋene hapalimatene. Hapaliteno tokiyaꞋa neꞋamamino Kefo Avamula veaꞋmogami amakusafiti amanatitalesaya yafeꞋene hapalimatene. Mage huno hamapaiye “Nagai kema havigeꞋna hulamatoa vayala (Aposolo vaya)* maiho.” huno hapalimatene. 16 Ani tuelufuꞋa (12) anagaꞋmogami amakia SaimoniꞋe kanomo agia YisasiꞋa PitaꞋe huno malene. 17 YemesiꞋene aganaꞋamoꞋa YoniꞋene Sepetina neꞋamogania YisasiꞋa anakia PoanesiꞋe huno malene. Ani anakimoꞋa tagai kefina monagemoꞋma hia avamete huꞋana tokiyaꞋage ke nehaꞋa kanolatane huno anakia malene. 18 EtaluꞋe FilipiꞋe PatolomiuꞋe MatiuꞋe TomasiꞋene YemesiꞋa Alafiusi nafaꞋnene TatiusiꞋene Saimonina hamoꞋamoꞋa nago agia SelotiꞋe. 19 Yutasi IsakaliotiꞋa Yisasina haenagaꞋa agesi huno kame vaya amayapi avaleno atesia kanoe.
“YisasiꞋa Pielesepulimo tokiyaleti aliꞋyana neꞋalie.” huꞋya humainae.
20 YisasiꞋa nomaꞋalega umainegeꞋya mukiꞋa veala Yisasite elitalu hageno YisasiꞋaene tokaeꞋya nemaiya anagaꞋene kave negahe haya yapi veala mehiya hageꞋya onenae. 21 AgaiꞋa konaga afamoꞋamoꞋya haviteꞋya Yisasife “Aifonafo nehie.” huꞋya Yisasina avalegahe emainae.
22 Yelusalemu kumateti kahegi kema havilinaya anagaꞋmoꞋya Yisasife mage huꞋya mehae “Kefo AvamuꞋma kava humainea kanoa PielesepulimoꞋa agupi maineno tokiya amigeno Kefo Avamula anatineꞋatale.” huꞋya humainae. 23 Hageno YisasiꞋa haviteno “Nagaite eho.” huno ke higeꞋya ageno avame kefiti mage huno hamapaiye “SataniꞋa hanaꞋa huno Satanina anatitalegahie? 24 Nagoke kotega veaꞋmoꞋya ali fako huꞋya “Alu vea mainone.” huꞋya tuma hisayana ani kotega veaꞋnenena haꞋno hugahae. 25 Nagoke afamoꞋmoꞋya ali fako huꞋya “Alu anaga mainone.” huꞋya tuma hisayana ani afamola haꞋno hugahae. 26 HaꞋno hugahagi Satani anagaꞋmoꞋya ali fako huꞋya “Alu vaya mainone.” huꞋya hisayana Satani kava yagaisia tokiyaꞋa omalegahianagino haviya huno haꞋno hugahie.
27 Nagola tokiya kanomoꞋa nomaꞋafima yagaino mainesigenoꞋa nago kanomoꞋa musufa yama hugahe vinunoꞋa hagoteno ani tokiya kanomona nofiteti kitalako huteteno afenoꞋyamaꞋa musufa yana hugahie.
28-29 NaꞋa humaineafe nagaya tamage huꞋna tamahanepauve veaꞋmoꞋya mukiꞋa alu kefo yama alu kefo yaꞋene huhaviya humate yaꞋene hisayana Anumaya KotiꞋa aigetamateno kefo yana atalelamategahianagi nagoꞋa veaꞋmo Alu Aotage Avamufema huhaviya hutesayana Anumaya KotiꞋa aigeoꞋamategahianagi ani kefo yamaꞋa hanege hanege huno hanegahie.” huno humaine. 30 HigeꞋya “Kefo AvamuꞋmoꞋa YisasiꞋna agupi maine.” huꞋya haya kehe YisasiꞋa ani kea huno hamapaiye.
TaꞋya Yisasina itaꞋamoꞋyaene aganaꞋamoꞋyaenena mainae.
31 Yisasina itaꞋamoꞋene aganaꞋamoꞋyaene eꞋya kumatega me hetiꞋya maineꞋya nago kanoa hutageno Yisasife ke hie. 32 Ke higeꞋya mukiꞋa veala elitalu huꞋya Yisasina aiyafi mopale maineꞋya agaife mage huꞋya hae “ItakamoꞋene kaganakamoꞋyaene kumatega emaineꞋya kagaife ke nehae.” huꞋya hapaiye. 33 Hapaigeno YisasiꞋa mage huno hie “ItaꞋnimoꞋene naganaꞋnimoꞋya taꞋya mainae?” huno hamavige. 34 Hamavigeno agaiꞋenema mopale mainaya veala momake memake huno amaketeno mage huno hie “ItaꞋnimoꞋyaene naganaꞋnimoꞋyaenena ma ma nagaiꞋene mopale mainae. 35 Anumaya Koti kema haviteꞋya haiya kavaꞋma nehaya veala itaꞋnimoꞋya naganaꞋnimoꞋya nasaꞋnimoꞋya mainae.” huno hie.