1 YisasiꞋa mage huno hamapaiye “Tamage huꞋna tamahanepauve maleꞋma hetiꞋya mainaya veala nagoꞋamogatama ofalinesageno hagoteno Anumaya Koti kava yagaisia yamoꞋa himamu yamaꞋaene efalote hinagetama agetetama haenaga faligahae.” huno hamapaiye.

2 YisasiꞋa sikisiꞋa (6) kana maiteno Pitana Yemesina Yonigamina amavaleno ayaꞋaya agoꞋyafi haiꞋya amakaiꞋamige maineꞋya agayana Yisasi augafamoꞋa alino alu augafa kalimaine. 3 KenaꞋamoꞋa mopafima mainaya veaꞋmoꞋya sese nehageno efeꞋage nehia avamete ohunegi tusiya huno efeꞋage huno alave alave humaine. 4 Tole kanolatana MoseseꞋene IlaiyaꞋene evaꞋyi huꞋana YisasiꞋene kaiyeke nehaꞋageꞋya agemainae. 5 PitaꞋa Yisasife mage huno hie “Hulavenelina kanomogae tagaya male maunana kanale nehie. Tagaya katega nona tagufa (3) kilamatesune kagaila nagolagi Mosesena nagolagi Ilaiyana nagolagi huta kilamatesune.” huno hie. 6 Tusiya huꞋya kolima haya yafe PitaꞋa ‘NaꞋane ke hisue?’ huno agesa havigeno mani kea humaine. 7 Ani kea hanepaigeno agola siaꞋmoꞋa evaꞋyi huno melino aiso humategeno ani siapinagati age aino mage huno hie “Mani nafaꞋnea nagai nafaꞋnegi naguꞋafifena nenahaiya nafaꞋnegi agai kea haviho.” huno siapinagati humaine. 8 HigeꞋya aupaꞋa moge mege huꞋya agayana nagoꞋa vayala omaigeno YisasiꞋa agaiꞋage mainegeꞋya agemainae.

9 AgeteꞋya agoꞋyafitila enelaviꞋya YisasiꞋa kahegi maleno mage huno hamapaiye “Manima agaya yafena nagoꞋa veaꞋnea hamaꞋopaiho. Haenagama nagaya ikapinagati emainoa kanoa vayaꞋmo natenea kanomoꞋna falimainesufiti hetisua yupa hamapaigahae.” huno hie. 10 HigeꞋya ani kemo akave maleꞋya hamaꞋopainagi “Falimainesufitila eteꞋna hetigahue.” huno hia kemo aepaꞋahe atiyeꞋya amakaiꞋami huge havige hae. 11 Mage huꞋya Yisasina havigae “NaꞋa higeꞋya kahegi kema havilinaya anagaꞋmoꞋya IlaiyaꞋa hagoteno etesigeno Anumaya KotiꞋa hutesigeno taugafa aligatisia kanoa egahie huꞋya humainae?” huꞋya havigae. 12 Hageno YisasiꞋa mage huno hie “Tamage IlaiyaꞋa hagoteno eno mukiꞋa yana melino talo tala hugahie. AniꞋa huꞋya nagaifena Anumaya Koti autaꞋmafina kaemalenayane “Ikapinagati emainoa kanoa vayaꞋmo natenea kanomonina amakaveꞋno hunateꞋya ali haviya hunatesageno naugafa nagata aigahie.” huꞋya nagaifena humainayane. 13 Tamahanepauve IlaiyaꞋa ago egeꞋya Anumaya Koti autaꞋmafina kaemalenaya avamete huꞋya amakaiꞋamia hamaiya avamete agaila havi kavala hutenae.” huno humaine.

14 NagoꞋa agaiꞋaenema tokaeꞋya nemaiya anagatega evaꞋyi huꞋya agayana kasagoꞋya veala anile alitalu humainageꞋya kahegi kema havilinaya anagaꞋmoꞋya YisasiꞋenema tokaeꞋya nemaiya anagaꞋene mo huhaviya me huhaviya huꞋya kea vaiye. 15 NeꞋvaigeno mukiꞋa veaꞋmoꞋya Yisasina ageteꞋya tusi muse nehuꞋya amaiyayeꞋya moli falu fala hutenae. 16 YisasiꞋa mage huno hamavige “NaꞋafene hutama mo huhaviya me huhaviya nehae?” huno hamavige. 17 Higeno nagola anile maiya kanomoꞋa mage huno hie “Humavenelina kanomogae Kefo AvamuꞋmoꞋa nafaꞋneꞋnimona agupi haimaineno nafaꞋneꞋnimo avayale maihiya humainegeꞋna kagaitega avaleꞋna neꞋoe. 18 NeꞋogi Kefo AvamuꞋmoꞋa atafa huteno atalegeno takatino faemainegeno agalemoꞋa selu selu nehigeno ave kume neganeno augafamoꞋa apipupapu nehigeꞋna kagaiꞋenema tokaeꞋya nemaiya anagafe ‘Kefo Avamula anatitaleho.’ huꞋna huana ya hugeteꞋya anatioꞋatalenae.” huno hie.

19 Higeno YisasiꞋa mage huno hie “Ae meni kanafima mainaya veaꞋmogatama nagaifena havitama tamakupina omalenetama tamametitia nohaya veaꞋmogatama naꞋmagi kanafi tamakaiꞋenena mainesugetama havigahae? Ohaviya yafena kasalo nenahae. NaꞋmagi kanafi tamakaiꞋenena kanaleꞋya huꞋna ako huꞋna maisue? Nagaitega avaletama eho.” huno hie. 20 HigeꞋya avaleꞋya ageno Kefo AvamuꞋmoꞋa Yisasina ageteno ani nafaꞋnemona alino kigepagige hia kava huteteno ali takatitalegeno ani nafaꞋnemoꞋa mopafi asaga hulavino kasegase nehigeno agalemoꞋa selu selu humaine.

21 Higeno YisasiꞋa nefafena mage huno havige “NaꞋmagi kanafi aniꞋa haumaine?” huno havigegeno nefaꞋa mage huno hie “Osi nafaꞋne mainegeno aniꞋa haumaine. 22 MukiꞋa kanafina Kefo AvamuꞋmoꞋa ayelakatitalegeno atafiꞋene tipiꞋene haefalisia kava nehigeꞋna kagaya kanale humainenuka kahau hulateka tahaꞋmao.” huno hie. 23 Higeno YisasiꞋa mage huno hie “NaꞋa higeka nagaifena kanale humainenuka nahaꞋmao huka nehane? Nagaifema agupi maleno ametiti nehia kanomoꞋa mukiꞋa yana alu ya alu yana afaꞋa hileꞋasinagi.” huno hie. 24 Higeno aupaꞋa ani nafaꞋnemona nefaꞋa mage huno hie “Nagaya kagaifena nagupi maleꞋna nametiti nehuanagi nagupi maleꞋna nametiti hua yanimoꞋa aupa nehigi alika ayaꞋaya hunato.” huno hie. 25 HanepaigeꞋya veala tusiya huꞋya amaiyayeꞋya elitalu hageno YisasiꞋa neꞋamakeno Kefo Avamufena kemakino mage huno hie “Kagaya Kefo AvamuꞋmogae agesama ailileka avaya alilu kimainana Kefo AvamuꞋmogae hai kahapauve agupitila hatilavika vuo. NagoꞋa kanafina nagoꞋene agupina haiofalo.” huno hutene. 26 Higeno Kefo AvamuꞋmoꞋa ala kenake nehuno ani nafaꞋnemona tusiya huno alino kigepagige hia kava huteteno hatilavino ataleno vigeno ani nafaꞋnemoꞋa fali vaya kana huno faemainegeꞋya kasagoꞋya veaꞋmoꞋya “Ago falimaine.” huꞋya hae. 27 Nehageno YisasiꞋa ayate alino avalesaga hutegeno hetimaine.

28 Haenaga YisasiꞋene nopinaga haino mainegeꞋya agaiꞋaenema tokaeꞋya nemaiya anagaꞋmoꞋya amakaiꞋamige maineꞋya mage huꞋya havigae “Tagaya ya hugetonana ani Kefo Avamula naꞋa higeta anatioꞋatalenone?” huꞋya hae. 29 Hageno YisasiꞋa mage huno hamapaiye “MaꞋa augafa Kefo Avamula alu yatetila oꞋanatigahagi Anumaya Kotitega ke huta havigesaya yatetike anatigahae.” huno hamapaiye.

30-31 Ani kumala neꞋataleꞋya Kalili kotegama vayana “VeaꞋmoꞋya visua kumafena ohavisae.” huno higeꞋya ako huꞋya falakiꞋya neꞋvageno agaiꞋaenema tokaeꞋya nemaiya anagala YisasiꞋa mage huno humavenelie “Ikapinagati emainea kanoa vayaꞋmo atenea kanoa agaila atafa huꞋya avaleꞋya vaya amayapi atesageꞋya haesageno faligahie. Faliteno hevaitesageno tole yupa komufi maiteno tagufa (3) kana falimainesifitila hetigahie.” huno hamapaiye. 32 Anima hamapaiya kea havilama ohaya yafe koliꞋa huꞋya haviokenae.

33 Kapaneamu evaꞋyi huteꞋya YisasiꞋa nopi haino maineno amakaife mage huno hamavige “Katega naꞋane kea kea hume hume emainae?” huno hamavige. 34 Katega neꞋeꞋya ma ke hume emainae “Kagaya ala kano mainapi nagaya kagaseꞋna ala kanoa mainoe?” huꞋya huge havige hume aya kehenagiꞋya kea ohuꞋya mainae. 35 Mainageno YisasiꞋa mopale maineno “EgeꞋna tamahapaino.” huno higeꞋya tuelufuꞋa (12) anagala ageno mage huno hamapaiye “Nago kanomoꞋa ‘Ala kanoma maisue.’ hinunofena haenagalafa maineno mukiꞋa veala kayo kayoꞋma humatesiana ala kano maigahie.” huno hamapaiye. 36-37 Huteno nagola okasi nafaꞋnea avaleno amuꞋnoꞋamifi hetiteneno avalesaga huno anukilineno mage huno hie “NagoꞋa veaꞋmoꞋya nagaifema haviꞋya maꞋa augafa osi nafaꞋnema avaleꞋya falu fala hisayana nagaiꞋene navaleꞋya falu fala hunenatae. NagaiꞋma navaleꞋya falu fala hisayana hunatenea NenafaꞋene avaleꞋya falu fala huneꞋatae.”

38 YoniꞋa mage huno humaineane “Hulavenelina kanomoga tagaya agonana nago kanomoꞋa kagai kagile Kefo Avamula vea amakusafinagatila anatineꞋatalegeta neꞋageteta takaveꞋma nohia yafe ‘AniꞋa ohuo.’ huta ‘AꞋao.’ hutenone.” huno hapaiye. 39 YisasiꞋa Yonife mage huno hapaiye. “Ani kanoa alitama ‘AꞋao.’ huoꞋateho. NagoꞋa veaꞋmoꞋya nagai nagile tokiyaꞋage aliꞋyama alisayana aupaꞋa nagaifena huhaviyana huonategahae. 40 VeaꞋmoꞋya kamema huotatesayana tagai kanapa maigahae. 41 Tamage tamahanepauve nagoꞋa veaꞋmoꞋya tamakayama Kalaisi nafaꞋnema mainaya yafe yasi tima tamamisagetama nesayana anonaꞋa kanale miya aligahae.”

42 “Nagola osi nafaꞋneꞋni, nagaife havino agupi maleno ametiti nehisia nafaꞋnehema nagoꞋa veaꞋmoꞋya ‘Kefo yama huo.’ huꞋya havi kapima avaletesayana tusiꞋa havi kava nehayanagiꞋna tusiꞋa kana ya amamigahue. Ala yafagefaleti ani kanomo ageꞋyafi maleꞋya nofi kiteteꞋya hage lipi hagaꞋyu hutalesayana afa ya kana kana ya haneanagi nagaya tusiꞋa kana ya amamigahue. 43-44 KayamoꞋa ‘Kefo yama huo.’ huno kavaleno havi kapima katesigekahena ani kayana aifakalitalo. Aifakalitalesanana kanale hugahie. KaugafamoꞋa haviya humainesia kanoma maisanana haꞋno ohisia kahaimula hanesia kano maigane. Havigu tole kaya hanenageka kefo ya hisana kagesa kaminegeka kefo yama humainana yafe kavaleno hani yapi agola tegelege nehia atafi hagaꞋyu hugatalegahie. 45-46 KaiyamoꞋa ‘Kefo yama huo.’ huno kavaleno havi kapima katesigekahena ani kaiya aifakalika atalo. Aifakalitalesanana kanale hugahie. Kaugafa haviya humai kano maisanana haꞋno ohu kahaimula hanesia kano maigane. Havigu tole kaiyamoꞋa kefo ya hisana kagesa kaminegeka kefo ya humainana yafe kavaleno hani yapi agola tegelege nehia atafi hagaꞋyu hugatalegahie. 47 KaulagamoꞋma agea yafema kefo yama hisana kagesa kaminagekahena ani kaulaga ali faꞋyika atalo. Ali faꞋyitalesanana kanale hugahie. Nagoke kaulaga hanesigeno Anumaya KotiꞋa kava yagaimainea kumatela umaigananagi havigu tole kaulagamoꞋa kefo ya hisana kagesa kaminegeka kefo ya humainana yafe hani yapi tegelege nehia atafi kavaleno hagaꞋyu hugatalegahie. 48 Anima ata legelege nehia kumapi veaꞋmoꞋya ani atafi mainageno kani kafaꞋamimoꞋa ofalisigeno atamoꞋa asua ohugahie.

49 Hagema kavete falea avamete huno veala mukiꞋamogatamina ataleti falelamategahie. 50 Hagea kanale ya haneanagi hagaꞋageꞋma nehia yamaꞋa haꞋnoma hisiana hanaꞋa hutama hagaꞋageꞋma nehia yamaꞋa ali falote hugahae? Hage kana yana tamakuꞋafi hanesigetama alava hutama nagoke tamaku tamakesale kigi yokalo hutama maiho.” huno humaine.