1 Ani kanafina tole yupa maiteꞋya kafuꞋahe kafuꞋahe Anumaya KotiꞋma amakinagomo amaugafama aligatimainea yafe* alitalu huꞋya hale oki kaihamena nenaya imu kigahe nehageꞋya mono note kava vayaꞋmoꞋyaene kahegi kema havilinaya anagaꞋene Yisasina haesaya kea kesi ako huꞋya atafa hisaya yafe ke huge havige humainae. 2 Mage huꞋya hae “MukiꞋa veala imuleꞋma alitalu huꞋya maisafima Yisasina atafama hisunageꞋya mukiꞋa veaꞋmoꞋya ageteꞋya ke huꞋya atile male huꞋya tu hugahae.” huꞋya hae.

3 YisasiꞋa Petani umaineno nayona fugitaya agemainea kanomo agia SaimoniꞋe kanomo nopi umaine. Mopale umaineno kave nenegeno nago aꞋmoꞋa anile eno manaꞋage masavena havatemai yafa keꞋayola alilino emaine. Ani keꞋayopina nagola tusiꞋa monele hanea masavena manaꞋage tina hane. Ani limo agia natie. Ani keꞋayoꞋma taloma hia yafamo agia alapasata yafane. Ani aꞋmoꞋa masave keꞋayola alino aitagino Yisasi anupi takino faletene. 4 FaletegeꞋya nagoꞋa anile mainaya vayaꞋmoꞋya ageteꞋya ke vaiꞋya mohu mehu nehuꞋya mage huꞋya hae “NaꞋa higeno mani aꞋmoꞋa manaꞋage masavena afaꞋa neꞋatale? 5 Nago kanomoꞋma miya hileꞋasina tali hataleti kina (K300) aluteꞋasine. Aliteta ani masavete monea alita afenoꞋamima omalenea veaꞋnea amamuteꞋasine.” huꞋya ani aꞋmofena “Kefo kava talo hane.” huꞋya kemakimainae. 6 Ke neꞋamakigeno YisasiꞋa mage huno hie “Agaila afaꞋa ataleho. NaꞋa higetama kea neꞋamakiye? Ani aꞋmona aipamoꞋa haviya hisia kava nehagi nagaila tusiꞋa kanale kava hunenate. 7 AfenoꞋamima omalenea veaꞋmoꞋya mukiꞋa kanafina tamakaiꞋene maigahayanagitama amaya hisaya tamakesama havisayana amaya hugahayanagi nagaya tamakaiꞋenena mukiꞋa kanafina omaigahue. 8 Ani aꞋmoꞋa amukoꞋa hanegeno ani kavala hagoteno afaꞋa ofaliꞋna mainogeno masavema faleꞋya hevainatesaya masavena agola fale nenate. 9 Tamage huꞋna tamahanepauve mukiꞋa ma mopafi veapima Yisasifena kanale mono kema hamapaisayana ani aꞋmoꞋma hia kavafeꞋenena hamapaisageꞋya mukiꞋa veaꞋmoꞋya agaife amakesa havi havi huꞋya maigahae.” huno hie.

10 Ani kanafina Yutasi IsakaliotiꞋa tuelufuꞋa (12) anagaꞋaene nemaiya kanomoꞋa viaꞋamo Yisasina agesi huno momavalesigeꞋya metafa hisaya yafe mono note kava vayatega umaine. 11 ViaꞋamo mo hamapaigeꞋya ani kea haviteꞋya tusiꞋa muse huteꞋya ‘Mone kamigahune.’ huꞋya hapaitageno YutasiꞋa vaya kuluta oꞋai yate kesi kateti momavaleno esigeꞋya Yisasina haesaya kafe atiyemaine.

12 Hale oki kaihame kana maya nenaya kanamoꞋa ehe kanale Anumaya KotiꞋa Yuta vaya amaugafama aligatimainea kanahe amakesa nehaviya imuma kigahena sipi sipi heꞋya kiꞋya nenaya kanamoꞋa falote higeꞋya YisasiꞋene tokaeꞋya nemaiya anagaꞋmoꞋya Yisasina mage huꞋya havigae “Hanatega kahaisia kumatela Anumaya KotiꞋa amaugafama aligatimainea kanahe kagesa havisana kavela mo lalo tala hisune?” huꞋya hae. 13 Hageno YisasiꞋa tole kanolatana hunateno mage huno hanapaiye “Ala kumate neꞋviꞋageno ti keꞋayoꞋma alino esia kanoene fotu hutetana akave viꞋo. 14 Akave neꞋviꞋageno haino mo falesia nopi haitana ani nomona nefafe mage hutana havigeꞋo ‘Hulavenelia kanomoꞋa mage hie ‘Hanate ayenalagimalenana nona hane? Yoka namisanageꞋna nagaiꞋene tokaeꞋya nemaiya anagaꞋniene Anumaya KotiꞋa amaugafama aligatimainea kanahe tagesa havisuna kavela nesune?’ huno hie.’ hutana havigeꞋo. 15 HisaꞋagenoꞋa folamo huno anale kimalenea nona ago alino hilato humaleneanagino ala nona tanavelisigetana kavetia talo tala hiꞋo.” huno hanapaiye. 16 HigeꞋana ala kumate vaꞋana YisasiꞋma hia kemoꞋa mukiꞋa falote higeꞋana ageteꞋana Anumaya KotiꞋa amaugafa aligatimainea kanahe amakesa havi havi hisaya kavela talo tala humainaꞋe.

17 Talo humalenaꞋageꞋya yagemoꞋma tavi faleamaꞋa YisasiꞋa tuelufuꞋa (12) anagaꞋamoꞋyaene emainae. 18 Mopale emaineꞋya kavela nenageno YisasiꞋa mage huno hie “Tamage huꞋna tamahanepauve nagaiꞋenema kaveꞋma nenaya anagaꞋmogatama tamakaipiti kesi nahaesaya yatela nago kanomoꞋa vaineꞋaye.” huno hie. 19 HigeꞋya ani anagaꞋmoꞋya amaipa haviya huteꞋya agaifena amahaote amahaote mage huꞋya hae “Nagaife nehano?” higeꞋya “Nagaife nehano?” higeꞋya huꞋya havigae. 20 Havigageno YisasiꞋa mage huno hie “Tamakaya tuelufuꞋa (12) anagaꞋnimogatama tamakaipiti nagokeꞋmoga kesi nahaesaya katela vaineꞋayane. Ani kanomoꞋa nagaiꞋene nagoke yopafiti kaihame kana maya ali vayagofino nene. 21 Nagaya ikapinagati emainoa kanoa vayaꞋmo natenea nafaꞋnemonihena Anumaya Koti autaꞋmafima kaemalenaya avamete kava hugahuanagi vayaꞋmoꞋya havisagi huno nagesi hunatesia kanomofena ‘AvoꞋnio nahau hanagi kagaya maigaꞋyeka mainekao.’ huꞋna nehue. Ani kanomoga itakamoꞋa okateneleꞋasina tusiꞋa kanale kava hileꞋasine.” huno hie.

22 Ani kavela nenageno YisasiꞋa kaihame kana maya alino nunamu huteno muse huno havigeno kolite kolite huno neꞋamamino mage huno hie “Aliho. Mamona nagaiꞋni naugafae.” huno hie. 23 Nagola vaini nofi alagamo ti* hanea keꞋayola aliteno nunamu huno muse huno havigeno alino amamite amamite higeꞋya nemainae. 24 Nenageno YisasiꞋa mage huno hie “Mamona nagaiꞋni kolane. VayaꞋmoꞋya nahaesageꞋna falisugeno kolaniꞋamoꞋa takilavino mukiꞋa veafene huno takilavisia yafe Anumaya KotiꞋa hulokiya vaino alino halegafilamatenea kemo* aepamoꞋa alino fatago hugahie. 25 Tamage huꞋna tamahanepauve menia nagaya vaini nofi alagamo timaꞋa* nagoꞋene onegahuanagiꞋna Anumaya KotiꞋma kava yagaimainea kumate umaineꞋna haegafa nofi alagamo tina* eteꞋna negahue.” huno hie. 26 HigeꞋya yagamea nagola huteꞋya Olivi yosa hanea agoꞋyafi haimainae.

27 YisasiꞋa mage huno hamapaiye “Tamakaya mukiꞋamogatama nagaife havitama tamakupi maletama tamametiti nehaya yana ataletama asaga hulavisagi nayona ani yafe kaemaleneane

32 HuteꞋya Ketesemani uvaꞋyi hageno YisasiꞋa agaiꞋaenema tokaeꞋya nemaiya anagafena mage huno hie “Tamakaya male maineho. Nagaya Anumaya Kotitega nunamu huꞋna havigegahue.” huno hie. 33 PitaꞋene YemesiꞋene YoniꞋene amavaleno viana aepa heno aipamoꞋa kanaꞋage higeno haumana halegeno kasageke hie. 34 Huteno mage huno hamapaiye “Nahau nayamopamoꞋa tusiꞋa kanaꞋage nehigeꞋna ago falisua kava nehugi male mainetama kava yagaitama maineho.” huno hie. 35 OsiꞋa viaꞋamo nunamu huno havigegahe mopafi agoꞋya moyeno maineno nunamuna mage huno havige “Kahaisigekahena falisua kanaꞋnia alitalesane huꞋna kahavinegoe. 36 Nenafagae kagaya mukiꞋa yana kanale hateꞋasine. Nagaya falisua kava nehugi ani havi kanamoꞋa satuꞋage hia ti kana tima hanea keꞋayola nahafaletalo. AfaꞋa nagai nagu nagesa akave ohuka kahaisia yana afaꞋa huo.” huno havige.

37 Havigeteno viaꞋamo momakeana agaiꞋaenema tokaeꞋya nemaiya anagala faeꞋya mainageno Pitafena mage huno hie “Saimonigae faekage mainano? Vae kagaya aupa kana kanoꞋa kava oꞋyagaikage mainano? 38 SataniꞋa ayelamavataga hisigeno tamakuꞋamoꞋa ‘Ohugahue.’ huno tokiyaꞋage humaineanagi afaꞋa amega tamaugafamoꞋa tokiyaꞋa omaleneanagino ‘Hugahue.’ huno hisia yana hugahigi Satani kema ohavisaya yafena kava yagaitama mainetama Anumayamotega ke hutama havigeho.” huno hamapaiye.

39 Huteno amataleno viaꞋamo Anumayamotega havigea kea aniꞋa huno nagoꞋene mo havige. 40 Havigeteno eteno momakeana amau tokotoko higeꞋya faeꞋya mainageno momakeanagi “Vae tagaya naꞋane hisune?” hugeꞋya amakesaguꞋmo humainae.

41 Hageno YisasiꞋa eteno eaꞋamo tagufa (3) kanale amakaifena mage huno hamavige “Maifalu hutamage faetama mainao? Hailagino kanaꞋnia ago falote nehie. Nagaya ikapinagati emainoa kanoa vayaꞋmo natenea nafaꞋnemonia nagesi huno navaleno kefo yama nehaya vayaꞋmogami amayapi natesigeꞋya nahaegahe nehae. 42 MukiꞋamogatama hetitama vigetao. Ageho nagesi huno nahaesia kanoa ago neꞋegi vigeta mogamano.” huno humaine.

43 YisasiꞋa mani kea nehigeno aupaꞋa YutasiꞋa tuelufuꞋa (12) anagaꞋaenema tokaeno nemaiya kanomoꞋa evaꞋyi higeꞋya agaiꞋene mukiꞋa vayaꞋyagaene mono note kava vayaꞋene kahegi kema havilinaya anagaꞋene nagoꞋa Yuta vayatamaenema humataya vayaꞋmoꞋya ayaꞋaya naepege naipege huꞋya muki kaꞋyoꞋene aliꞋya emainae. 44 Agesi huno Yisasina haesaya yama amavalisea kanomoꞋa vayaꞋyagahena mage huno hamapaiye “AtakoꞋma hisua kanoa haesaya kano mainegi atafa hutama tokiyaꞋage hutama avaletama viho.” huno hamapaiye.

45 YutasiꞋa evaꞋyi huno Yisasite eaꞋamo mage hie “Hulavenelina kanomogae.” nehuno atako me hie. 46 Atako higeꞋya ageteꞋya vayaꞋyagamoꞋya Yisasina atafa huꞋya ayetalako humainae. 47 Atafa nehageno nagola agaiꞋaenema hetimaiya kanomoꞋa ayaꞋaya naepeꞋa hevayu huno ala mono note hagote kava kanomo aliꞋya kanoꞋamo agesa aifakalitalegeno asaka hulavimaine. 48 Aifakalitegeno YisasiꞋa mage huno hie “Tamakaya nagaifena ‘Vaya nehamaeno musufaya nehia kano maine.’ hutama nagaiꞋma natafa hugahena ayaꞋaya naepene muki kaꞋyoꞋene alitama neꞋao? 49 MukiꞋa kanafina efiꞋefi huꞋna tamakaiꞋene maineꞋna ala mono nopina mono kea huhaleꞋna nehuanagi nagaila natafa ohunayanagi afaꞋa kanalele. Nayoma kaemalenaya kemoꞋa falote huno tamage hisia yafe menia natafa nehae.” huno hie. 50 HigeꞋya mukiꞋa agaiꞋaenema tokaeꞋya nemaiya anagala neꞋataleꞋya fale haꞋno humainae.

51-52 Nago neyamoꞋa aye ohati kena kenalafamaꞋage failino Yisasi akave umainegeꞋya agaila atafa hugahe hageno kenaꞋa hateno neꞋataleno augafa alapaꞋage aiyayeno faleno umaine.

53 Yisasina avaleꞋya ala mono notela hagote kava kanomote ageꞋya mono note kava vayaꞋyagaene Yuta vayatamayagaene kahegi kema havilinaya anagaꞋene alitalu huꞋya mainae. 54 PitaꞋa akave anatino vianagi avatela oꞋunegi aluꞋale umaineno ala mono notela hagote kava kanomo nomo haupale uvaꞋyi huno ati vayaꞋene mopale umaineno atale tota huno maine.

55 Mono note kava vayaꞋmoꞋyaene mukiꞋa kanisole vayaꞋene YisasiꞋma haesaya kaiyekema hutegahena nagoꞋa vayaꞋmoꞋya “Kefo kavala higeta agemainone.” huꞋya hutesaya vayafe atiyayana omainae. 56 OmaigeꞋya kasagoꞋya vayaꞋmoꞋya havige huꞋya Yisasifena hayanagi amakai kemoꞋa nago katela ohunagi alu ke alu ke maiꞋya humainae. 57-58 NagoꞋa vayaꞋmoꞋya hetiꞋya havige huꞋya Yisasifena mage huꞋya hae “Tagaya agaiꞋama humainea kea havilinone mage huno humaine ‘Nagaya vayaꞋmoꞋyama kimalenaya ala mono nona aliꞋna lagape aitaleꞋna tagufa (3) kanafi ani nona eteꞋna vayaꞋmoꞋya nokiya avamete no ali hetigahue.’ huno higeta havilinone.” huꞋya nehae. 59 Hayanagi ani kemoꞋa nago avamete kea ohunagi alu ke alu ke maiꞋya humainae.

60 Hageno ala mono notela hagote kava kanomoꞋa amuꞋnoꞋamifi hetimaineno Yisasina mage huno havige “Na augafa ke kagaifena nehae? Kagaifena kaiyekema hunegatayana kenonaꞋamia hufalote huka nohane?” huno havige. 61 Havigeanagi YisasiꞋa kea ohuno avaya lukino maineno nagola osi ke kanoꞋa ohutafa huno mainegeno ala mono notela hagote kava kanomoꞋa eteno nagoꞋene havige “Kagaya Anumaya KotiꞋa taugafa aligatigahema hugatenea kano mainano? Kagaya agima alisaga nehaya Anumaya Kotina nafaꞋneꞋamoga mainano?” huno havige. 62 Havigegeno YisasiꞋa hufalote huno hie “E, nagaya ani kano mainoanagitama tamakaya haenagaꞋa Ikapinagati emainoa kanoa vayaꞋmo natenea nafaꞋnemonia tusiꞋa tokiya yamaꞋa hanea Anumaya Kotina tamaga ayatega hanea siale maineꞋna ikate hanea siate esugetama nagegahae.” huno hie. 63 Higeno ala mono notela hagote kava kanomoꞋa ani kea havigeno aipamoꞋa tokiyaꞋage higeno kenaꞋa alino hatata nehuno mage huno hie “Tagaya hai havunanagiꞋya nagoꞋa vayaꞋmoꞋya kaiyekea huoꞋatesae. 64 Anumaya Kotifema huhaviya hutea kea ago nehavigi. Na tamakesa nehaviye?” huno higeꞋya mage huꞋya hae “Tamage nehane anona yamaꞋa alisia yafe haesageno falisie.” huꞋya hae.

65 HuteꞋya nagoꞋa vayaꞋmoꞋya Yisasina amavetuꞋna heneꞋateꞋya aulagafi aiso huteneꞋya aikoneliꞋya mage huꞋya havigae “Kaune kema nehana kanomoga tahapaiyo taꞋya negahayae?” huꞋya havinegeꞋya ati vayaꞋmoꞋya amayateti aikolimainae.

66-67 PitaꞋa nomo haupalega afetega mainegeno ala mono notela hagote kava kanomona aliꞋya munaꞋmoꞋa anile emaineno ageana PitaꞋa ata lota nehigeno ani munaꞋmoꞋa megeteno Pitana agesagali maineno mage huno hie “Kagayaenena Nasaleti YisasiꞋene vaiyatete nehana kanoe.” huno hie. 68 Higeno PitaꞋa avane huno “AꞋao nagaya ani kanoa oꞋagenoa kanohe maika nehane.” huno nehuno fiate neꞋvigeno anile kokolemoꞋa agea aimaine. 69 Fiate mainegeno ani munaꞋmoꞋa mogeteno anile hetimaiya vayafena mage huno hie “Mani kanoa Yisasi anagapiti kanoe.” huno hie.

70 Higeno PitaꞋa nagoꞋene eteno “AꞋao nagaya ani kanoa omainoe.” huno hie. Osi kana kanoꞋa maigeꞋya anile hetimaiya vayaꞋmoꞋya mage huꞋya hae “Tamage kagaya Kalili kano mainana yafe agaiꞋene vaiyatete nehana kano mainane.” huꞋya hae. 71 Hageno PitaꞋa mage huno hie “Nagaya tamagema ohisugenoꞋa Anumaya KotiꞋa nahaesie. Anumaya Koti aulagafina tamage huꞋna tamahanepauve tamakayama haya kanoa nagaya oꞋagenoa kanoe.” huno hie. 72 Nehigeno aupaꞋa hagoteno agema aiya kokolemoꞋa anile viaꞋamo agea aigeno Pitana agesamoꞋa aikalo higeno YisasiꞋma hapaigeno havimainea kea mage huno humaineane “KokolemoꞋa tole kanale agea oꞋainesigeka kagaya tagufa (3) kanale avane huka nagaifena ‘NoꞋagoa kano maine.’ huka hugane huno humainea kemoꞋa Pita agesamoꞋa aikalo higeno haviteno tusiꞋa avitemaine.