9
Faefu (5) molia ensole kanomoꞋa agaiꞋa ufena humaine.
Faefu (5) molia ensole kanomoꞋa agaiꞋa ufena higeꞋna agogeno nago kaꞋnefimoꞋa ikapinagati atafai-lavino mopafi elavigeno ma mopafina nago komua afe yapi tavi-mainea komumona ayola omale komugefagino ani komumo ki nofila ani kaꞋnefimona amine. Amigeno aliteno ani ki nofiteti ani komua yakigeno ani komufitila tusiꞋa halinamo huno ehaiyana tusiꞋa atagefafiti hia halinamo avamete huno ehaiyaꞋamo yagene ikaꞋene ayesu higeno tusiꞋa hani kimaine. Kigeno kasagoꞋya keꞋnu kafamoꞋya ani halinafitila mopafina aitagu-fetageno veaꞋma akafu amanisaya tokiyaꞋamia amamigeꞋya akafuꞋma amani yana kulumale nehaya osifaꞋvemoꞋma neꞋamania avamete huno amanigeꞋya tusiꞋa amakata aimaine. Ani keꞋnufena mage huno hie “ApeꞋene talaꞋyaꞋene yosayagaenena oneho. NagoꞋa veaꞋnege, Anumaya KotiꞋa hapalimateteno agia hamanilela aigaꞋmae oꞋamatenea veaꞋmogamina akafu amanitama ali haviya humateho. FaefuꞋa (5) ikana amakata aisia yana amamite amamite hugahayanagi hamaegeꞋya ofaliho.” huno higeꞋya akafu amanigeꞋya amakata yama aliyana kulumale nehaya osifaꞋvemoꞋma veaꞋma akafu neꞋamania avamete huno amanigeꞋya tusiꞋa amakata aimaine. Ani yama alisaya kanafina veaꞋmoꞋya falisaya yafena tusiya huno hamaugahianagi ofaligahae. Amakatama aiya yafena tusiya huꞋya falisaya kafena ati yegahayanagi oꞋagegahae.
Ani keꞋnumoꞋya tuma hugahema nehaya hosi afumo avamete huꞋya amanutela kanileta yafateti talo humale tumano kula vai-linageno amaugosamoꞋa veaꞋmogami amaugosa kali-maine. Kali-maigeꞋya ani keꞋnumoꞋya ayaꞋaya amayolagefa, haesa aꞋnemogami amayolagefa kana hu-mainegeno amaveꞋmoꞋa kaveꞋage laiyoni afumo ave kana humaine. HumainegeꞋya hamaifiꞋyafafina kapaleti talo humale halegu kana yana anoꞋvai-maleneꞋya amagekoꞋna agema aiyana tuma hugahe vaya hosimoꞋya avayu nehaya kalemo nehia kea ala kegefa huno neꞋaiya agemoꞋma hia kava huno agea aimaine 10 Ani keꞋnumo amaigoꞋyafina avetaꞋnafaꞋage nekaꞋya, kulumale nehaya osifaꞋvemo akafu neꞋamania ave kana hia nekaꞋya, hanegeꞋya ani nekaꞋyaleti faefuꞋa (5) ikamo aguꞋafina veala akafu amaniꞋya ali haviya humategahae. 11 Ani keꞋnumo sauve kanoꞋamia maineanagino ani kava kanoꞋamimoꞋa SataniꞋe, ayoꞋa omale komugefale kava yagai-maineanagino agia Yuta veaꞋmogami kea, Hipalu kefina Apatonie huꞋya nehagi Kaliki kefina Apolionie huꞋya nehagi tagaiti kefina mage humaine “Vea alino haviya hinageꞋya fali haꞋno hu-matesia kanoe.” humaine.
12 KeꞋnumoꞋya ali haviya humatesaya kanamoꞋa haꞋno hianagi avoꞋnio tolea tusiꞋa kana yatala falote hisaꞋa yafena nahau hulamatoe.
Sikisi (6) molia ensole kanomoꞋa ufena humaine.
13 Sikisi (6) molia ensole kanomoꞋa agaiꞋa ufena higeꞋna havugeno Anumaya Koti auleꞋma kanileta yafateti talo humale folamomo foꞋa (4) atupale hanea avela foꞋa (4) avepitila agea aigeꞋna havimainoe. 14 Havugeno ufema atafa hulinea ensole kano sikisi (6) molia ensole kanomofena mage huno hie “FoꞋa (4) ensole vayala, Yufaletisi titegama nofiꞋma humatenaya ensole vayala kalu heka amatalegeꞋya viho.” huno hie. 15 Higeno “Anumaya KotiꞋa na kafufina na ikatela na kanafina na aovaꞋa ani foꞋa (4) ensole vayaꞋmoꞋya mukiꞋa ma mopafi veaꞋmogamina tagufafi (3) ali fako humalageno anifiti nago haupa kaiyagama mainesaya veala hamaesagetama faligahae.” huno huteno amatafa hu-lineane. Ani kanamoꞋa efalote higeno ani ensole vayala kalu heno amatalegeꞋya ani kavala nehae. 16 Ani kavaꞋma nehisageꞋya amaya huꞋya hamaesaya ati vayaꞋamia tu hataleti milioniꞋa (200,000,000) hosimo agupifi mainaya ati vayala mainae huꞋya hageꞋna nagaya YoniꞋna havimainoe. 17-18 HaviteꞋna himona kana yapi amakoana ani hosimogami amakupifima mainaya vayaꞋmoꞋya hamaifiꞋyafafina halegula haesaꞋene okoꞋene kaniletaꞋene halegula aye hai-linageno hosimogami amanutela kaveꞋage afua laiyoni afumogami amanu kana hutegeno amavayafitila atamoꞋene halinamoꞋene hiꞋmanaꞋage atama nelea yafaꞋyagaene falote huno mukiꞋa ma mopafi veaꞋmogamina tagufafi (3) ali fako hu-malageno anifiti nago haupa kaiyaga veaꞋmogamina ani ataene halinamoꞋene hiꞋmanaꞋage atama nelea yafaꞋyagaletiꞋene hamayageꞋya fali-mainae. 19 Hosimogamina hamaesaya tokiyaꞋamia amavayafiꞋene amaigoꞋyafiꞋene hanegeno amaigoꞋyamoꞋa osifaꞋve kana huno akafu amanisia amanuna hanegeꞋya veala akafu amanigeꞋya hamae-mainae.
20 Anima tusiya huno ali haviya hia yamoꞋma ohamaenea veaꞋmoꞋya agayanagi kefo yama humainaya yafena amakuꞋa aiyahae nohae. Kanileta yafatetiꞋene siliva yafatetiꞋene haesa yafatetiꞋene afa yafatetiꞋene yosaletiꞋene talo hu-malenaya yafena “Anumayati mainae” huꞋya hayanagi ani yaꞋyaga amaulaga oꞋageꞋya kea ohaviꞋya kama vai oꞋayeꞋyama nehaya afa anumayamo-gamiene Kefo AvamuꞋmogami amakiene alisaga huꞋya “Anumayati mainae.” huꞋya nehaya kavala oꞋatalenae. 21 OꞋataleneꞋya veaꞋma hamae nefaliya yaꞋene analisama nehaya yaꞋene kumaima nehaya yaꞋene musufa yama hu-liteꞋya nehaya yaꞋenefena amakuꞋa aiyahae nohae.