1 Ba:bema: la: dopamo la:eno leta ipuwalo kebe komoma: na da:kiyanamima, nale ba:ma tetelo ba:bi komo la: kiya:tulamema:nemata. Dopo komo ba: la: komopa:te ba:ma ka:na da:ga:lanama, “Dubuti kamena laweheno ebe ha:kiya demedenamene, ba:be komo ba: hido komola.”

2 Huiyatiya bohelemele ba:gala kamenakamena pilo komo ipuwalo, iyo, atumu kuhi ba:gala dubu pilo komo ipuwalo Saitanate kuba gabamo emogabuimi komo hiliyonomo bewadahenako, ba:bema: hibima: midipi hiliyonomo ipuwalo wadiyala eta dubuti ebeno kamena na:lawa:mene, ba:gala eta kamenate atumu ebeno awi na:kalawa:mene. 3 Ba:gala dubu ebeno kamenago kapiyama: eda: ipuwalo, kamenate ebeno awi kokalakaluimima: wadiyala ebete ebeno ape ebetamo nikamenakamene, ba:gala dubuti atumu ebeno kamena kokalakaluimima: ebeno ape ebetamo na:kikamenakamene, mabu Godote ebeno ubi komo tawakaluba:tamo dopamo ba:ba ka:na ihatiya:. 4 Numa:la:, ba:be komo ipuwalo kamenate ebeno ape namutudawama: keda:naha:, awiti ba: ebeno ape namutudawama: eda:na, ba:gala atumu dubuti ebeno ape namutudawama: keda:naha:, huiyatiya ebeno kamenate ebeno ape namutudawama: keda:na. 5 Ba:bema: dubuti ebeno kamenago kapiyama: eda: ipuwalo etate etatamo ba:be komo kododima: talona akihata:la:, huiyatiya ibi netewapa:te ukui kapiyama: ba eda: ba:ma ka:na da:ga:lamena:, iba:te gopowahi tetelo kapiyama: eda: komo a:kododa:mena: iba:te Godokoba: tabo ga:la komo kododinakoma:, ba:be komo kubaha:, hido ododi komola. Huiyatiya iba:te kebe gopowahi tete dihatemena: ba:ba teta:mo da:nuluhukumina:, wadiyala iba:te kapiyama: eda: komo tiyonomolo gala na:katupuima:mena:, mabu Saitanate kateneno ubi komodo iba:tamo da:wadahenako, iba:te ba:bi kuba gabamo emogabuimi komamo eta dubago o eta kamenago gudi modoboha:. 6 Huiyatiya la: hidamo niya:tawahala:, la:le la:eno komo komiya:patepama: na Polote la: katutumulateleha:, ao, nale na:goemo talona puliyala la: ba:be komo kododima:.

7 Ba: hibila, naeno ubi komo ba:ma ka:na bitana, la: kamenakamenaheno emedena modobola, nale keba ka:na kemedenamo ba:ba ka:na. Huiyatiya na iya:tawala Godote kebe hiya:nomo helo natamo dikanamiya: nale kamenaheno kemedenama:, diyala, ebete ba:be atu helo la: komopa:tamo da: kikalameha:. Iyo, hibima: midipa:te ebeno hiya:hiya: oko kowatihonama:, ebete iba:tamo ebeno hiya:hiya: helo dito ikalamenako, ba:ma ka:na ebete eta hiya:nomo helo kapiya lumagitamo ba ikame huiyatiya etatamo eta hiya:nomo helo ba:bo kakikamema:ne.

8 Ba:bema: hibima: midipi dubu ipuwalo puino kamenakamenate da:ha:lahuya: ibino komoma: ba:gala hamolehamoleno komoma: na Polote tabo ba:ma ka:na goemo, nale kamenaheno keba ka:na kemedenamo, wadiyala iba:te ba: ba:ba ka:na nemedenamena:. 9 Huiyatiya ibi ipuwalo kebe dawoeno kateneno ubi komate helohelonomoma: deda:hana, ba:ma ka:na eta dubuti kamena laweheno kuba ododi komamo da:gamene, wadiyala ba:bako dubuti eta kamena na:lawa:mene ba:gala ba:bako kamenate atumu eta dubu na:kalawa:mene. Numa:la:, keba tetelo dubuti kamena tuputupu gabodo da:lawemene, ba:be komo ba: hido komola, huiyatiya ebete laweheno ebeno tepo ipuwalo koenomoma: deda:mene, ba:be komote Saitanakono kuba gabamo emogabuimi komoma: keda:ma:ne.

10-11 Ba:gala eta komo. Kebe dubuti ebeno kamenago demedena ba:gala kebe kamenate ebeno awa:go demedena, nale ba:bako tawakaluba:tamo tutumu tabo bikalamemo, ba:moe tutumu tabo naeno ukuiha:, ebe ba: aeno Kodawoeno tutumu tabola. Iyo, ebeno ubi komo ba: ba:ma ka:nala, dubuti ebeno kamena dito akibuka:la: ba:gala kamenate atumu ebeno awi akamiya:pala:. Huiyatiya kebe kamenate ebeno awi ya:lo da:miya:pui, wadiyala ebete awihino dito nemedenamene, ba:bene ebete ba:ba ka:na ba emedena ukui hiya:ma: deda:mene, talona a:kitanamene ebete ba:be atu awa:go kapiyama: gala keda:te eba:go gala kakemedenama:.

12 Ba:bema: nale la: komopa:tamo eta tabo begoemo, ba:moe tabo da: naeno ukui komola:, iyo, ba:moe tabote aeno Kodawagodone natamo da: kapeha:. Diyala, la: hibima: midipi ipuwalo eta dubuti ebeno hibima: midiha: kamenago demedena, ba:bene ba:be kamenoeno ubi ditama:na eba:go kemedenama: ebete ebe dito akibuka:la:. 13 Ba:gala hibima: midi kamenate hibima: midiha: awa:go demedena, ba: atumu ba:be dubuino ubi ditama:na eba:go kemedenama: ebete ebe dito akibuka:la:. 14 Ba: hibila, Godote eta hibima: midiha: dubu ebeno hibima: midi kamena ipuwado ebe tatalia:mo komagahema:ne, ba:gala ebete hibima: midiha: kamena atumu ebeno hibima: midi awi ipuwado ebe tama:mo pema: kowalubima:ne. Numa:la:, ba:be komote hibima: eda:ha:tale, ba:be dubu ba:gala ebeno kamena ibino guguda:te Godokono umi ipuwalo dalowa:ma: ba eda:ha, iba:te ebetamo pelamema: ba:ka:modobona: huiyatiya ba:be komote ba:ba ka:na kitanaha:, ao, ba:bako guguda:te Godoko tama:mo pelamema: talona puliyanomola.

15 Huiyatiya numa:la:, keba tetelo hibima: midiha: kamenate ebeno hibima: midi awi miya:pama: ubi dihatemene, ba:gala keba tetelo hibima: midiha: dubuti ebeno hibima: midi kamena miya:pama: dewagelemene, hibima: mididawate eta duhimi komo akododa:la:. Ba:bene hibima: midiha:dawate ebeno hibima: midi kamena o awi ba:ba ka:na da:miya:pamene, ba:ba tetelo hibima: mididawate tutunomoma: ba eda: eta matuhumi komote ebegodolo gala a:kitanamene. Huiyatiya Godote a hibima: midipi hiliyonomo ya:lo a:ka:miya: ale komopa:go alaholohoheno tataba ipuwalo kemedenama:, 16 ba:bema: hibima: midi kamena, wadiyala ama: gabo nohowadiya: amia:no hibima: midiha: awa:go tatabalo kemedenama:. Diyala, amia:no awiti ama: ipuwado ebeno ka:ka: mula: komo da: lawemene. Ba:gala hibima: midi dubu, wadiyala ama: ba: atumu gabo na:kohowadiya: amia:no hibima: midiha: kamenago tatabalo kemedenama:, mabu ama: hibilo kiya:tawanaha: ebete ebeno ka:ka: mula: komo ama: ipuwado da:lawemene.

17 Ba:bema: nale sose hiliyonomo ipuwalo kebe komo kiya:tulamenakomo, ba:be tutumu tabo a hiliyonomo mabuma: ba:ma ka:na bitana. Godote eta lumagi ebe hibima: komidima: da:ka:mimini, ebeno emede komo keba ka:na kitana, ebete galane tetelo gabo akohowada:la: ba:be emede komo ebe ha:kiya ebeno heloamo hiya:ma: komidima:. Ao, Kodawate ebetamo kebako emede komo kikami, wadiyala ebete ba:be atu emede ipuwalo kalakalago nemedenamene, ebeno ubi komo eta lumagino emede komamo akihata:la:. 18 Ba: ba:ba ka:na Godote Yunapino tama itamida kukala lawe dubu da:ka:mimini, ebete gabo akohowada:la: ba:be kukala ebeno apene egebolemema:, ba:gala Godote eta tama itamida kukala laweha: dubu da:ka:mimini, ebete ebeno ubi komo akihata:la: ba:be komo kolawema:. 19 Numa:la:, Godokono umi ipuwalo eta dubuti Yunapino tama itamida kukala ya:lo da:lawiya: ba:be komo ko komoha:, ba:gala eta dubuti ba:be komo laweha:ma: deda:mene ba:be komo atumu ko komoma: a:keda:mene. Ko komo kapiya bitana, ba:be komo ba: Godokono komo koko tutumu tabamo papamiwata komola.

20 Ba:bema: ba:moe komone a hiliyonomate iya:tawahala, ba:ma ka:na Godote eta lumagi da:ka:mimini, ebeno emede komo keba ka:na kitana ebete galane tetelo gabo akohowada:la: ba:be emede komo ebe ha:kiya hiya:ma: komidima:. 21 Iyo, hibima: mididawa, Godote ama: da:ka:mi, ba:ba tetelo ama: eta ko dubuino huiyaha: okodawama: dedi, ba:be mabuma: ama:le ba:ma tetelo amia:no emede komo hiya:ma: komidima: ukui bilibilima: akeda:la:. Huiyatiya ama: numa:, amia:no namutudawate ama:tamo gabo malemalelo da:hiduimimini ama:le ebeno huiyaha: oko ipuwane kuluhukuma:, kubaha:, ama: ba:be hido tutu emede komo ebegodone dito na:lawiya:.

22 Ba: hibila, pote eta ko dubuino huiyaha: okodawama: ba eda:na Godote ebe Kodawa Kelisoko hibima: midima: da:ka:mi, ba:ba tetene tupuimiti ebete Kelisokono oko ipuwalo ebeno tutudawama: edi. Ba:gala ba: atumu pote eta ko dubutamo huiyaha: oko owatiha: tetelo Godote ebe da:ka:mi, ba:ba tetenomolo ebete Kelisotamo huiyaha: oko owati ba:bo tupuimi. 23 Iyo, Kelisote ebeno huiya konomo hawa:mo la: uwatia:ta, ba:bema: la: ebe kapiyatamo oko ba owatina komopino huiyaha: okopima: akeda:hanala:. 24 Ba:bema: naeno hibima: midipi ekaka:la:, ba:moe ba: naeno iya:tulame taboeno ko komola. Godote kebe lumagi da:ka:mimini, ba:be lumagino emede komo keba ka:na kitana, ebete Godokoba: kalakalago ba emedena gabo akohowada:la: ba:be emede komo ebe ha:kiya ebeno heloamo hiya:ma: komidima:.

25 Ba:bema: la:eno leta ipuwalo la: eta komoma: na da:kiyanamima, ba:be komo ba: la:eno sose ipuwalo puya:te kamenaheno demedena ba:gala puya:te dubuhino demedena, ba:bi dubu ba:gala kamenakamena iba:te keba ka:na na:kewagelemena:. Numa:la:, nale ba:moe komoma: aeno Kodawa Kelisogodone eta tutumu tabo dopamo hibilo kalaweha:, huiyatiya na iya:tawala ba:ma ka:na ebete ebeno malemalelo na hibi okodawama: ka:namiti ebeno oko habamo ihateniya:, nale ba:mako komoma: naeno ukuia:mo la: kowalubilima:.

26 Ba: hibila, hibima: midipa:tamo temeteme ikuli komote ya:lo tupuimiti, ba:bi temeteme komate tete tatalila kokonomoma: keda:hama:na:, ba:bema: naeno ukui ba: ba:ma ka:nala, Godote ba:ma tetelo kebe dubu da:ka:mimini, ebeno emede komo keba ka:na kitana, wadiyala ebete ba: ba:ba ka:na kalakalago nemedenamene, iyo, ebete gabo akohowada:la: ebeno emede komo hiya:ma: komidima:. 27 Ba:bema: hibima: midi dubu, ama:le kamena dopamo da:lawi, ama: ebe ibukima: ukui akihata:la:, ba:gala ama:le ba:ma tetelo kamenaheno demedena, amia:no kamena lawe gabo akohowada:la:. 28 Huiyatiya numa:, ama:le kamena lawema: ubi ba ihate tuputupu gabodo da:lawemena:, Godokono umi ipuwalo ba:be komo kubaha:, ba:gala ba: atumu eta bohelete dubu da:lawemene, Godote ba:be komo kubama: a:kagaa:mene.

La: huiyatiya ba:moe komo niya:tawahala:, kamenakamena ipuwalo pote awi dopamo lawete eba:go demedena, ba:gala dubu ipuwalo pote kamena dopamo lawete eba:go demedena, ba:be mabuma: iba:te ba:moe hopoeno komo hiya:hiya: temeteme komokomo biya:tawahanakomena:. Ba:bema: hibima: midi dubu, na ubila ama:le kamena laweheno ba:bako temeteme a:kiya:tawamena:ta, ba:gala hibima: midi bohele, na ubila ama: atumu awi akalawa:la: ama:le ba:bako temeteme komo uwatekapoma:.

29 Naeno hibima: midipi ekaka:la:, naeno iya:tulame taboeno ipuwa ba: ba:ma ka:nala, Godokono Kuititi Hegelate ba: na:tatali, ba:bema: kebe dubuti kamena dopamo lawete eba:go demedena, wadiyala ebete ba:ma tetene tupuimiti kamena laweha: dubu huiyamo nemedenamene. 30 Ba:bene ba: ba:ba ka:na pote temetema:go dihina, wadiyala ebete atumu temetemeha: lumagimo nemedenamene, ba:gala pote kalakala ipuwalo da:luta, wadiyala ebete kalakalaha: lumagimo nemedenamene, ba:gala pote dogodogo ilina mana:mo dopamo duwati, wadiyala ebete ilinaha:dawamo nemedenamene, 31 ba:gala pote ba:moe hopoeno komoma: oko dowatina, wadiyala ebete ba:bi hiya:hiya: oko ya:lo da:miya:pali ba:bako lumagimo nemedenamene, mabu ba:moe hopoeno komate keba ka:na ka:pola:na, ba:bi pakala komo hiliyonomate ba wiboho uli komate ba: na:pikulihona.

32 Ba:bema: na ubihinola la: hopo haboeno komoma: ukui bilibilima: eda:ha. Numa:la:, kebe hibima: midi dubuti kamenaheno demedena, ebete aeno Kodawa kokalakaluimima: ebeno ubi konomo ba ihatena ebeno komokomo kapiya ba:bo emalagidolenako. 33 Huiyatiya kebe hibima: midi dubuti kamena dopamo lawete eba:go demedena, ebete ebeno konomo ubi ba:be kamena kokalakaluimima: ihatenako, ba:ma ka:na ebete ba:moe hopoeno komokomo ba emalagidolena 34 ebeno tepo ipuwalo ba:bi komate Godokono ubi komago nalaholohona. Ba:bene kebe hibima: midi kamenate awihino demedena ba:gala kebe hibima: midi bohelete awihino demedena, iba:te aeno Kodawoeno talona oko mabuma: ibino ape ba:gala gobogobo ebetamo kikamehoma: ebeno komokomo kapiya ba:bo emalagidolenaka. Huiyatiya kebe hibima: midi kamenate dubu dopamo lawete eba:go demedena, ebete ebeno konomo ubi ba:be awi kokalakaluimima: ihatenako, ba:ma ka:na ebete ba:moe hopoeno komokomo nemalagidolena.

35 Ba:bema: tabo ulihopa:la:, nale ba:moi iya:tulame tabamo kamena lawe komoma: ba:gala dubu lawe komoma: la:tamo kukala kamiya:telameha:, ao, na ubila ba:moi tabamo la: ba owalubili la:le hidonomamo kemedenama:, ba:gala la:le la:eno komo aeno Kodawoeno oko mabuma: ebetamo hibinomolo kikamehoma:, na ubihinola eta kapiya duhimi komote la:godolo itanama:.

36 Ba:gala eta komo. Keba tetelo hibima: midipi ipuwalo eta bohele ba:gala eta kuhi ba emedena, ibino nabi menokoba:te ebe ebetamo da:galuimimina:, ba:bene tete ga:ga:dopolo iba:te kapiyama: eda:heno ba:be kuhiti ebe lawema: ebeno ubi komote konomoma: deda:mene, keba ka:nala:ka: ebete ebetamo modoboha: ukui komokomo emalagidole da:tupuimimini, ba:ba tetelo ebete ebe ebeno kamenama: da:midimini Godokono umi ipuwalo ebete eta kuba a:kododa:mene. 37 Huiyatiya keba tetelo ba:be kuhiti eta lumagino ubi komamo papamiwataheno, ba:bene ebe ha:kiya ebeno kateneno ubi komo ebetamo da:galuimi ba:be boheleno komoma: ba matuhumiho, ebete ebeno tepo ipuwoeno ukui ba:ma ka:na da:kodakoduilamemene Godokono hiya:hiya: oko kapiya kowatihonama:, ebete ba:be bohele ebeno kamenama: tiyolo midihino tete da:ga:gima:tepamene, Godokono umi ipuwalo ebete atumu kuba a:kododa:mene. 38 Ba:bema: numa:la:, kebe kuhiti ebetamo da:galuimi ba:be bohele tiyolo da:lawemene, ebete hido komo kododima:ne, ba:gala kebe kuhiti Godokono oko kowatinama: ebetamo da:galuimi ba:be bohele tete ga:ga:nomolo laweheno ba:ba ka:na demedenamene, ebeno ododi komote atumu hidoma: keda:ma:ne, iyo, ebeno ododi komoeno hido komote dopo kuhino hido komo konegogoloma:ne.

39 Ba:gala ba:moe ba: eta komola. Hibima: midi kamenoeno awino hoe teta:mo ebete talona ipuwalo ba emedena eta dubu akalawa:la:, huiyatiya keba tetelo ebeno awiti da:hoemene, ba:be talonate ebegodone wibote ebeno ubilo eta dubu da:lawemene, kubaha:, huiyatiya ebete hibima: midiha:dawa akalawa:la:. 40 Ba:bene Godokono Gobogobote nagodolo ba emedena, na nemalagidolutamo ba:moe eta ukui komote ebegodone duluhuku, kebe kamenate hamolema: eda:te Godokono oko mabuma: awihino demedenamene, ebeno kalakalate konomoma: keda:ma:ne, iyo, ebeno kalakalate eta dubu da:lawemene ba:be kamenoeno kalakala konegogoloma:ne.