1 Ba:bema: aeno hibima: midipi ekaka:la:, ba:moe leta kuititi hapulu ale la: ba:ma ka:na kiyalama:ta, wadiyala la: toetoe tabamo a Godotamo na:wadiya:paa:tiya:la:, mabu a ubila Kodawa Ya:sukunu tabote aeno oko ipuwado komo hiliyonomo hopo tawakaluba:tamo tiyonomolo kotoma:, ba:gala a ubila ulihopa:te ba:be tabo ba milimiho Godotamo kalakala tabo kadipatema:, la:le dopamo ebeno tabo keba ka:na ka:lawiuima ba:ba ka:na. 2 Ba:bene wadiyala la: ba:moe eta komoma: Godoko na:katoemehuya:la:, ebete koko kuba ododilipi dubuino helo ipuwane aeno ka:ka: komula:lea:mema:, mabu komo hopo habanapa:te Godokono tabo uliho tetelo hibima: kamidinaha:.

3 Ba:bema: kalakala konomola, la:eno hibima: midi mabuma: Kodawate atumu la: ba heluilame, Saitanakono alaholoho ododili ipuwalo la: ebete kitagua:midalema:na:ta! Iyo, aeno Kodawa ba: Hibidawanomola! 4 Ba:bema: a iya:tawahala ale kebe hiya:hiya: komoma: la: da:kiyalamenaka, la: ba:bi komokomo ododili ipuwalo ba pola:na ba:bi komo dito a:kamiya:pala:mata. Numa:la:, Kodawate la: mabuma: ba:be hido ukui atamo nikaa:mena, ba:bema: ukui bilibili komote agodolo kitanaha:. 5 Wadiyala la:le hibima: midi gabodo ba tolame, Kodawa Kelisote la: dopalamete temeteme ikuliho tetelo ebete ebeno kodakodalo utitata komago ba:gala Godokono malemale emalagidolo komago la: na:magatalenakamena:ta.

6 Ba:bema: aeno hibima: midipi ekaka:la:, ale aeno Kodawa Ya:su Kelisokono mahilamo la: ba:ma ka:na kiyalama:ta, la: ipuwalo puya:te aeno iya:tulame komamo papamila:haleheno ba:gala iba:te ibi ha:kiya owalubilima: buhamama: deda:hana, wadiyala la: ba:bako hibima: midipino ododili ipuwamo akogomala:. 7 Iyo, ale la: ipuwalo keba ka:na ka:pemedima: la: ba:be komo iya:tawahanomola, ba:bema: wadiyala la: atu ododili ipuwalo nemedenala:. Numa:la:, ba:ba tetelo ale oko owatima: buhamama: eda:haheno, 8 du ba:gala hegela hiliyonomolo aeno kokotamo menemene oko owatihonakuima: a ha:kiya aeno modoboha: komokomo kulamema:, ba:bene ba:be gabodo ale eta lumagigodone baa: malemalelo dito kalawenakuiha:, ao, a ebetamo a:huiyanakuima:. 9 Ba: hibila, Godokono okopa:te ibino modoboha: komokomo ipuwalo hibima: midipa:godone ilina ba:gala mani uwatema: talona kitanaha:, huiyatiya ale la:go ba emedena ba:ba ka:na kewagelenakuiha:, mabu a ubi bihatima: la:tamo eta hido go hawakalimiti, la:le oko owati ipuwalo aeno ododili komo kota:matalema:. 10 Ba:moe ba:be mabuma: ale la: ba:ma ka:na a:kiyalamia:ta, “Kebe lumagiti oko owati ubiha:ma: deda:mene, wadiyala komopa:te ebetamo baa: akikama:la:.”

11 Ba:bema: numa:la:, ale ba:moe komoma: la: gala na:kakiyalama:ta mabu tabote atamo ba:ma ka:na puluhukui, la: ipuwalo komopa:te oko owatima: buhamama: ba eda:ha, ibi ha:kiya ibino hiya:hiya: komo ulameheno ibino tabo ga:la ipuwalo puya:te hibi oko komokomo dowatihona iba:tamo temeteme ba:bo ikalamenaka. 12 Iyo, ale ba:bako tawakalubi ba tutumulatele Kodawa Ya:su Kelisokono mahilamo ibi koamo kiyahalamema:, iba:te tabo ga:la ipuwalo komo tawakaluba:tamo temeteme ikalameheno, huiyatiya iba:te hegehege mani oko owatiho ipuwalo ibi ha:kiya ibino modoboha: komokomo nulamenakamena:.

13 Ba:bema: ekaka:la:, kalakala konomola, la:eno hibima: midi ipuwalo hidohido komo kododilima: heloha:ma: akeda:hala:. 14 Ba:gala la: ipuwalo eta lumagiti ba:moe leta taboeno iya:tulame komamo papamiwata ubiha:ma: eda:lo oko owatihino dito da:lutamene, wadiyala la: ba:bako lumagino kuba komo kohawakalimima: ebeno ododili ipuwalo eba:go akakapiyala:. Diyala, ba:moe gabodo ebete hilopo lawete ebeno kuba ukui komone Godotamo gala da: kohobigamene, 15 huiyatiya numa:la:, ebete ukui hiya:ma: tiyolo midihino ebe la:go alaholodawama: akamida:la:, la:le huiyatiya ebe la:eno hibima: midi ekawima: ka:milo ebeno tepo ipuwoeno kuba ukui komoma: ebe malemalelo na:kiyamiya:la:.

16 Ba:bema: hete atamo dikaa:mena, wadiyala ba:be Kodawate la: hiliyonomagodolo ba emedena hiliyonomo tetelo ebe ha:kiya la:eno hiliyonomo komokomo ipuwalo ebeno hete la:tamo nikalamenakamena:ta.

17 Numa:la:, ba:moe leta kuititi hapulu na Polote naeno mahilo ba:gala nolata tabo naeno kokotonomamo miya:temo, eta lumagiti ba:moe kuititi tabo kamiya:teha:. Iyo, ba:moe ba: naeno kokotola, naeno leta hiliyonomo ododili ipuwalo na ha:kiya naeno mahilo ba:ma ka:na miya:tenakomo.

18 Wadiyala aeno Kodawa Ya:su Kelisokono malemale komote la: hiliyonomagodolo nitanamene. Ba:moe ba: naeno tabo kuititila. Ba:ba:la.