1 Ba:ba tetelo A:ntiyoka ko haboeno sose ipuwalo komo Godokono ukui hawakalimipi dubu ba:gala komo iya:tulamepi dubu hiliyodopo iba:te ba:bolo nemedenama:. Ba:bi dubuino mahilo ba: Banabasiko, ba:gala Simiyonoko ebeno eta mahilo Kilikilidawala, ba:gala Lusiyasiko ebe Sailiniya habanapila, ba:gala Manayaneko gudu deha:poto tetelo Ko Gawadalagi Helodikono menokote dabinami, ba:gala Soloko. 2 Ba:bene eta hegelalo iba:te Kodawa Godoko ba adikumita ebete ibino tolame gabo hidamo kiya:tulamema: baa: nahaheno pola:nuya:. Ba:ba tetelo Godokono Gobogobote ibi na:goelamiya:, “La: Banabasiko Soloko ibi netewapi naeno komoma: tama:mo na:miya:ta:la:. Ibi nale a:ka:lamiya:mo iba:te naeno eta oko kowatinama:.”

3 Ba:bene iba:te baa: nahaheno ba pola:na, ibi netewapi mabuma: Godotamo toetoe tabo ga:late, kokoto iba:tamo emowatilameholete uli okamo ba:bo oelamiya:.

4 Ba:ba tetelo Godokono Gobogobote Banabasiko Soloko da:noelamiya:, iba:te Selusiya habamo nuluhukuti ba:bolo ko palai boge lawete kehaha: kolomo hapuamo dito na:hiwuya: Saipalase hopamo. 5 Ba:bene ba:be hopoeno Salamasi habamo nuluhukuti iba:te Yu tawakalubino hiya:hiya: baidi ibubulamehole genamalo Godokono tabo olamagima:go ba:bo newapatiya:. Ba:ba tetelo Yone Makate oko ipuwalo ibi nowalubilinatuya:.

6-8 Ba:bene iba:te Saipalase hopodo ba petonato ba:be hopoeno eta habamo ba:bo nuluhukuya:, ba:be haboeno mahilo ba: Peposala. Ba:bolo iba:te eta giwali dubu binumiya:, ebeno mahilo ba: Ba-Ya:sutila ba:gala ebeno eta mahilo Guliki tabamo ba: Elimasitila. Ba:moe dubu ba: Yunapila, huiyatiya ebete tawakalubi ba iya:tulamena ha:da tabo Godokono mahilamo ba:bo olamaginakui. Ba:ba tetelo Saipalase hopoeno Kapela Ko Gawadalagi ebeno mahilo Segiyasi Polasitila, ebete hido mulu ukuidawama: eda:nami, ba:bene ebete Banabasiko ba:gala Soloko ebetamo na:ka:lamiya: iba:godone Godokono tabo kulima:. Huiyatiya ebeno hopodalagi Ba-Ya:suti ubihinola, ba:bema: ebete Soloko ba:gala Banabasiko ba duhilame Kapela Ko Gawadalagi na:kiyamiya: ibino tabo hibima: akamida:la:. 9 Buka ka:lamiholedawa, wadiyala ama: niya:tawa Solokono eta mahilo ba: Polotela, ba:bema: Godokono Gobogoboeno helote ebe ba tabuimi, ebete ba:be giwali dubu baidi kodakodalo umilo ba:ma ka:na kiyahamiya:, 10 “Ama: ba: Saitanakono gudulata, ba:gala ama: Godokono tuputupu komo duhimidawama: eda:nata! Iyo, ama:godolo hiya:hiya: ha:da amihoho komo tabonomola! Keka: mabu ama:le Kodawa Godokono tuputupu gabo da:keka:kekiminaka? 11 Ba:bema: ka:lo Godokono kokotote ama: danagalimimina: amia:no baiditi duhuma: keda:hama:ne, iyo, tete ga:ga:dopolo ama: hegeloeno alo a:kuminakamena:ta.”

Ba:ba tetenomolo du konomote ebeno ape da:pemuliya: Elimasiti ebeno kokotamo ba ologia:tepale owalubidawa bohowadiya: ebe gabo kiya:tumima:. 12 Ba:bema: kebe komote duluhukuya:, Kapela Ko Gawadalagi Segiyasi Polasiti ba:be komo umiti Godoko hibima: ba:bo midiya:, ba:gala ebete Kodawa Godokono iya:tumi komoma: konomamo hanohanutiya:.

13 Ba:bene Polote ebeno mabuluba:go ba:be Peposa habalo ko palai boge lawete kehaha: kolomo na:hiwalete Pa:mapiliya hopoeno Pega habamo dito tolamiya:. Ba:bolo Yone Makate ibi miya:palete Yelusalema ko habamo gala dito katuya:. 14 Huiyatiya Polua:te Pega habane tolamete Pisidiya hopoeno A:ntiyoka habamo dito nikuliya:, ba:bene iba:te Yu tawakalubino okoha: talona hegelalo ibino baidi ibubulamehole genamamo nalehawaminate komo tawakaluba:go dito nahidiya:. 15 Ba:bene Mosesete Godokono Tutumu Tabo ebeno Bukamo da:miya:tiya: ba:gala Godokono Ukui Hawakalimipa:te da:miya:tiya:, ba:bi netewa komokomo genama umipa:te tawakaluba:tamo ba:bo ka:lamiholiya:. Ba:ba tetelo iba:te Poloko ba:gala Banabasiko iba:tamo tabo ba:ma ka:na noemiya:, “Nana:la:, la:godolo a kodakoduia:me tabo ditanamene, wadiyala atamo na:ga:luya:la:.”

16 Ba:bema: Polote mahigate ebeno kokoto hunamo adipatelo na:goiya:, “Isalaela tawakaluba:la:, ba:gala la: Yuha:pi puya:te hibi Godo dadikuminama, la: naeno tabo nulia:la:. 17 A Isalaelanapino iniwala:te Isipiti hopolo kapela tawakalubima: ba eda:hana, aeno Godote ibi uwatete kapiyuimi konomoma: ba:bo midiliya:, ba:bene ebete ebeno ko heloamo Isipiti hopone ibi ba:bo uluhukulateliya:. 18 Ba:bene iba:te 40 gogolo dito hopolo ba wapata:lamena Godotamo temeteme nikamenama:, huiyatiya ba:be tete ga:ga:nomolo ebete ibi hidamo buiya:minalenami, 19 ba:gala ebete Ka:inane hopolo hiya:hiya: sa:ba:ni kapiyuimipi alukuliti ibino hopo ebeno Isalaela tawakaluba:tamo dito ikalamiya:. 20 Ba: hibila, Godote ba:bi Isalaela tawakalubino iniwali Isipiti hopone duluhukulateliya: ba:ba tetene tupuimiti, iba:te Ka:inane hopo da:pelawiya: ba:ba teta:mo puluhuku, ba: 450 gogo a:petohuya:.

“Ba:bene Godote ibi kowalubilima: komo tabo anagilamepi iba:tamo ikalamiya:, ba:moe komote ba:ba tetene tupuimiti Godokono ukui hawakalimidawa Sa:miyoloko teta:mo puluhukuya:. 21 Ba:ba tetelo iba:te Sa:miyoloko na:ga:lamiya: ibi ipuwalo ko gawadalagi kadipatema:, ba:bema: Godote Beniyaminakono gu ipuwalo Kisikono gudu Soloko iba:tamo ikalamiya:, ebete 40 gogolo ibino watodawama: keda:nama:. 22 Huiyatiya Godote Soloko tama:mo ba ihate Da:ibidiko ba:bo adipatiya: ebete ibino eta Ko Gawadalagima: keda:ma:. Ba:ba tetelo Godote Da:ibidikono komoma: tabo ba:ma ka:na olamagiya:, ‘Nale Yesikono gudu Da:ibidiko umimo, ebeno tepo ipuwa hidonomola, na huiyala, iyo, ebete naeno hiliyonomo ubi komamo a:papamiwatanako.’

23 “Ba:bene Godote kebe tabo dopamo hibinomolo da:goiya: ba:be taboeno komote a tetelo ba:ma ka:na uluhukuya:, ebete Da:ibidikono eta eyono gudu Ya:suku badipatiya:, ebete Isalaela tawakalubino Ka:ka: Mula:lelamedawama: keda:ma:. 24 Ba:bene Ya:suti ebeno oko tupuimihino, dopamo Yonete Isalaela tawakalubi hiliyonomatamo Godokono tabo ba:ma ka:na polamagiya:, iba:te ibino kubane ohobila:hate ba:bene ebete ibi beyamo kowadulatelema:. 25 Ba:gala Yonekono oko upula: tete da:tataliya:, ebete ibi na:goelamiya:, ‘La:le na pokomo ka:ga:lonakoma? Na Kelisoteha:, ebete naeno gala hapuni ba:pena, iyo, na hidoenoha: nale ebeno nato ukulalemema:.’

26 “Ba:bema: naeno ekaka:la:, la: puya:te A:ibalahamakono eyoni gugudima: deda:hanama ba:gala la: Yuha:pi puya:te hibi Godo dadikuminama, Godote ba:moe ebeno ka:ka: mula: tabo a hiliyonomatamo a:poemiya:. 27 Huiyatiya Yelusalema habanapi ba:gala ibino watowatopi iba:te Godokono ukui hawakalimipa:te ebeno Bukamo dopamo da:miya:tiya:, ba:bi tabo komokomo iba:te hiliyonomo okoha: talona hegelalo a:ka:lamiholenaka, huiyatiya numa:la:, iba:te ba:bi taboeno hibi ipuwa hidamo a:kalawa:la:. Ba:be mabuma: iba:te Ya:suku ubiha:ma: ba eda:ha ebe anakapumima: tabo ba:bo ihatiya:, huiyatiya iba:te kiya:tawahuya:ha: ba:be ododi komodo Godokono tabote hibima: keda:ma:ne. 28 Ba:ba tetelo iba:te Ya:suku hoea:mo koemema: ubi dihatiya: ebeno kuba nipo ohowadimiya:, huiyatiya iba:te ekelalameheno Paeleteko gala na:kapega:lamiya: ebete ebe kanakapumima:. 29 Ba:bene Godote Ya:sukunu komoma: kebe komokomo ebeno Bukamo dopamo da:miya:tiya:, iba:te ba:bi hiliyonomo komo ebetamo ododiliya:, ba:bene ebete da:hoiya: iba:te ebe keha pihigane adipotete nakola bobo ipuwamo dito ihatiya:. 30 Huiyatiya Godote hoene ebe gala a:kadipatiya:, 31 ba:bema: puya:te Ya:sukuba: Ga:lili hopone Yelusalemamo da:tolamiya:, ebete komo hiliyonomo hegelalo hiya:hiya: tetelo iba:tamo uluhukunakui, iyo, iba:te ibino baida:mo Ya:suti hoene ka:ka:mo mahiga komo duminakui, ka:lo iba:te Yu tawakaluba:tamo ebeno komo ba:bema: hawakalimina.

32 “Ale la:tamo da:ga:lutama:, ba:moe ba: Godokono Hido Tabola. Numa:la:, ebete aeno iniwala:tamo kebe tabo hibinomolo da:goiya:, 33 ba:be taboeno komote a tetelo ba:ma ka:na uluhukuya:, ebete Ya:suku hoene adipatiya:. Iyo, ebete Sam Ohale Buka sapta 2 tetelo Ya:sukunu komoma: ba:ma ka:na goiya:,

34 Ba:bene Polote ebeno tabo moga:melo gala na:kagoiya:, “Iyo, ba: hibila, Godote Ya:suku hoene adipatiya:, ba:bema: ebeno apete kabalema: bobo ipuwamo gala a:katoamene. Ba:bema: Godote ebeno Bukalo eta tabo ba:ma ka:na kagoiya:,

36 Ba:bene Polote ba:moe taboeno ipuwa hawakalimilo gala na:kagoiya:, “Numa:la:, ba:moe tabote Da:ibidikono komoma: kagoenaha:. Da:ibiditi ba:moe hopolo ba emedena ebe ba: Godokono okodawama: eda:nami, huiyatiya ebete da:hoiya: iba:te ebeno ape ebeno iniwalino bobo tama:mo nihatete ba:bo abaliya:. 37 Huiyatiya numa:la:, Godote kebe dawa hoene dadipatiya:, ba:moe Ya:suti bobo ipuwalo kabaliya:ha:.

38-39 “Ba:bema: naeno ekaka:la:, ale kebe tabo la:tamo dolamagimitama: la: hidamo niya:tawahala:, Ya:suti modobola la:eno kuba egebolelamete la: ebeno tuputupupima: komidilima:. Iyo, Godote Moseseko ipuwado atamo dikaa:mehuiya: ba:bi Tutumu Tabote tawakalubino kuba ododili komoeno hale pahalamililame modoboha:, huiyatiya puya:te Ya:suku hibima: da:midimina: Godote kuboeno helo ipuwane ibi kuluhukulatelema:ne. 40 Ba:bema: la: hidamo! La:le ebe hibima: midihino, Godokono ukui hawakalimipa:te dopamo dolamagimiya: ba:be kuba huiyate la:tamo kuluhukuma:ne! Iyo, Godokono tabote ibi ipuwado ba:ma ka:na hawakaluya:,

42 Ba:bene tabo olamagi da:wibuya:, Poloko Banabasiko iba:te Yu tawakalubino baidi ibubulamehole genamane ba pihiti, tawakaluba:te ibi na:kiyalamiya: eta okoha: talona hegelalo ba:bi atu komokomo ibi gala kakapiya:tulamema:. 43 Ba:bene ibi hiliyonomate ba:be kapiyuimi habane dikuliya:, komo Yunapi ba:gala Yuha:pi puya:te hibi Godo dadikuminama: iba:te Poloko Banabasiko ba ta:matalenato, ibi netewapa:te komo hidohido tabamo ibi ba:bo owalubilinatuya: iba:te Godokono malemale ipuwalo kodakodalo kemedehonama:.

44 Ba:bene eta okoha: talona hegelalo habalubi hiliyonomate pelameholiya: Godokono tabo ulihoma:. 45 Ba:ba tetelo komo Yunapa:te tabo ulihopino iya:wa komo dumiya:, ba:bema: iba:te konomamo ba maubahale Polote dolamagiya: ba:be tabo kubama: ga:lalo ebe ba:bo iduduputimiya:. 46 Ba:bene Poloko Banabasiko iba:te toleheno tabo ba huiya na:ga:luya:, “Godoko ubila ebeno tabote la: Yu tawakaluba:tamo dopamo uluhuku, huiyatiya la: ubiha:ma: eda:hamata. Ba:bema: la: hidohidoenoha: la:le Godogodone wiboha: ka:ka: lawema:, mabu la: ha:kiya la:tamo gigiho ba: a:kalapilamata! Ba:be mabuma: ale la: ba miya:pale a huiyatiya Yuha: tawakaluba:tamo kotolamema:nema:. 47 Mabu Kodawa Godote a ba poea:me ebeno Bukoeno eta tabo komamo a ba:ma ka:na tutumua:tiya:,

48 Ba:bene tabo ulihopi ipuwalo Yuha: tawakaluba:te ba kalakalahuta Godokono tabo hidonomoma: ga:late ebe ba:bo milimihutiya:, ba:gala ibi ipuwalo Godote dopamo wiboha: ka:ka:mo da:ka:lamiya:, ibi hiliyonomate ebeno tabo hibima: ba:bo midiya:.

49 Ba:ba tetelo Kodawa Godokono tabote Pisidiya hopo konomamo ba:bo tuya:, 50 huiyatiya A:ntiyoka habalo Yuha:pa:te Godoko dadikuminama:, ibi ipuwalo komo koko kamenakamena ba:gala haba watowatopi dubu, Yunapa:te ibino ukui kubahilamelelamete helo ba:bo ikalamiya: iba:te Poloko Banabasiko iba:tamo komaubahalema:. Ba:bema: ba:bi watowatopa:te ibi netewapa:tamo temeteme ba ikalame ibino hopone heloamo ba:bo noelamiya:. 51 Ba:bene haba watowatopa:te ibi ba ulamita, Poloko Banabasiko iba:te ibino nato puhulu moda:midatepalete ibi dito miya:paliya:, iba:te kiya:tawahama: Godokono tete ba: na:pe ebete ibino kuba huiya iba:tamo kopikalamema:. Ba:bene Poloko Banabasiko iba:te Aikoniyama habamo dito tuya:, 52 huiyatiya iba:te A:ntiyoka habalo da:miya:paliya:, ba:bi Ya:suku ta:matapi Godokono Gobogobote ibino tepo ipuwa ko kalakala komamo ba:bo tabuilamelelamiya:.