1 Ba:bene Apolositi Kolini habalo ba nemedena, ebete kebe haba da:miya:puya: Polote A:isiya hopoeno komo habahabado petote ba:be atu Epesese ko habamo dito nuluhukuya:. Ba:ba tetelo ebete komo Ya:suku ta:matapi ba:bolo nulamete 2 ibi na:nikiyalamiya:, “La:le la:eno hibima: midi komo Ya:sutamo dihatima, ba:ba tetelo Godokono Gobogobo a:ka:lawiuima?”

Iba:te huiyatiya na:ga:luya:, “Ao, a Godokono Gobogobote tawakaluba:godolo demedena ba:be komo dopamo kuliha:.”

3 Huiyatiya Polote ibi nalateda:liya:, “Komopa:te la: beyamo da:wadulateli, pokono mahilamo kododi?”

Iba:te na:huiyuya:, “A beyamo Yonekono mahilamo palaguima:.”

4 Ba:bene Polote iba:tamo na:goiya:, “Tawakaluba:te ibino kuba ododili ipuwane Godotamo dohobiliya:, Yonete ibi beyamo ba:bema: wadulateliya:, ba:gala ba:be atu tetelo ebete Isalaela tawakalubi na:kiyalamiya:, iba:te ebeno gala hapuni da:pena ba:be lumagi hibima: komidima:, ebe ba: Ya:sutila.”

5 Ba:bene Epesese hibima: midipi ekaka:te ba:be tabo uliti Polote ibi Kodawa Ya:sukunu mahilamo beyamo gala ba:bo kawadulateliya:. 6 Ba:gala Polote ebeno kokoto iba:tamo demowatilamiya:, Godokono Gobogobote ibi hunamo ba hitiga, iba:te helo lawete Hunu Haboeno nopopino hiya:hiya: tabamo ko kalakala adipatelo Godokono tepo ipuwoeno ukui tabo komokomo ba:bo hawakalilamiya:. 7 Ba: hibila, ba:ba tetelo Godokono Gobogoboeno helote 12 dubatamo ba:ma ka:na hitiguya:.

8 Ba:bema: Polote netewa-kapiya manome Yu tawakalubino baidi ibubulamehole genamamo odolonakui Godokono tabo toleheno ba:bo olamaginakui, ba:bene ba:be tete ga:ga:dopolo Polote iba:go Godote Ko Gawadalagima: deda:na, ba:be komoeno hibi komoma: konomamo olamagiminakuya:. 9 Huiyatiya komo iba:te wato kodakodahibima: ba eda:halame hibima: kamidiya:ha:. Iba:te tawakalubino holoholo hapulu Ya:suku Hibima: Midi Gabo kubama: ga:luya:, ba:bema: Polote Ya:sukunu hibi ta:matapi kapiya uwatete iba:te hibima: midiha:pa:godone kapimilo ba: dito ikuliya:. Ba:ba tetene tupuimiti iba:te ha:kiya Taila:nasikono Sikulu genamalo da:kapiyuiminakui, Polote komo hegela hiliyonomolo Godokono Buka tabo komokomoeno ipuwa iba:tamo ba:bo olamaginakui. 10 Ba:bema: hibila, ebete netewa gogolo Epesese ko habalo ba emedena, A:isiya hopo konomolo demedehonama: ba:bi Yunapi ba:gala Yuha:pi atumu, ibi hiliyonomate Kodawa Ya:sukunu tabo ba:bo ulihuya:.

11 Ba:ba tetelo Godote Poloko ipuwado komo koko hanohano komo bododilinakui. 12 Ba:ma ka:na tawakaluba:te Polokono wato matumino kaliko ba:gala atuino kaliko ebeno apene duwatemenakui, ba:bene iba:te watate temetema:gopa:tamo da:nemowatilamenakui ibino temeteme komate iba:godone ba: dito wiboholamenakui ba:gala kuba gobogobate iba:godone akikulinakuya:. 13-14 Ba:be atu tetelo komo Yu dubate ba:be hopolo ba wapata:lamena tawakaluba:godone kuba gobogobo oelamenakuya:, ba:bene iba:te ba:be oko ba owatina komo tetelo Polokono mahilo ba:gala Kodawa Ya:sukunu mahilo ka:lamilo kuba gobogobo ba:bo kiyahalamenakuya:. Ba:bene ibi ipuwalo eta Yu dubu Sikibakono sa:ba:ni kuhia:te nemedenama:, ibino nabiwi ba: Godotamo hawa:goeno ikamehopino watodawa etala. Eta tetelo ba:bi sa:ba:ni kuhia:te eta dubugodone kuba gobogobo oemema: ba ewagelita, iba:te na:ga:luya, “Polote Ya:sukunu komoma: dolamaginako, ale ba:be Helodawoeno mahilamo la: bikiyahalama:ta ebegodone nikula:la:.”

15 Huiyatiya kuba gobogobote iba:tamo na:goiya:, “Ya:suku ba:gala Poloko na iya:tawala, huiyatiya la: puya:tela:ka:?” 16 Ba:bene kuba gobogobagoeno dubuti ko heloago iba:tamo pepategate ibi kubanomamo ba palukuli ibino kaliko pipikulamelelamete, iba:te genamane hawi ka:ka:la:halama:go kikipuiya ba: dito alahutihuya:.

17 Ba:bema: Epesese ko habalo demedehonama:, ba:bi Yu tawakalubi ba:gala Guliki hoponapi atumu, ibi hiliyonomate ba:be komo duliya: iba:te konomamo toletolehote Kodawa Ya:sukunu mahilo hunamo ba:bo adipatiya:. 18 Ba:ba tetelo hiliyonomo tawakaluba:te Ya:suku hibima: miditi, ba:bene iba:te tawakalubino holoholo hapuamo pelamete ibino kuba ododili komokomo ba:bo pehawakalilamiya:. 19 Ba:gala ba:be atu tetelo komo giwali ododilipa:te ibino giwali iya:tawaha buka wadahete tawakalubi hiliyonomate ba ulamita koa:mo ba: dito pepuhamidahaliya:. Ba: hibila, iba:te da:kubahilamiya: ba:bi bukoeno huiya kuititi konomola, deha:potoha:, iyo, ba:bi buka hiliyonomoeno huiya da:ka:lamiholiya: ba: 50 taosene manima: ediya:. 20 Ba:bema: ba:moe ododi gabodo Godokono tabote helonomoma: ba eda: ba:be hopo konomamo ba:bo tuya:.

21 Ba:moi komate da:wibohuya:, ba:ba tetelo Polote nopo bihatiya: Ma:sadoniya ba:gala Guliki hopodo petote Yelusalema ko habamo gala kakanuluhukuma:. Ebete na:goiya:, “Na ubila Yelusalemalo tete nanekele nemedete, ba:bene na Loma ko haba umima: kotoma:nemo.” 22 Ba:bene Ma:sadoniya hopamo toheno Polote ebeno owalubipi netewa Timotiko ba:gala Elastasiko ba:be hopamo dopamo noelamiya:, huiyatiya ebete A:isiya hopolo tete nanekele gala kakemedema: goelo iba:go katuya:ha:. 23 Ba:bene ba:ba tetelo Ya:suku Hibima: Midi Gaboma: Epesese ko habalo eta ko kubanomote ba:ma ka:na uluhukuya:.

24 Ba:bolo eta dubuti nemedenami, ebeno mahilo Dimitiyasitila, ebe ba: siliba ilinamo ida:da:li ododilidawala. Ba:ma ka:na ebete ebeno ko bisnisi ipuwalo eta habali ida:da:li Atimisiko mabuma: ebe adikumino genama hegehege siliba ilinamo dododilinakui, ebe ba:gala ebeno okopa:te tawakaluba:tamo kolowamilo koko mani buwatenakuya:, iyo, tawakaluba:te ba:bi hegehege genama mana:mo uwatete ibino genama gulu patapata hunamo ba nimiya:te Atimisiko emalagidololo ebe ba:bo adikuminakuya:. 25 Ba:bene eta hegelalo Dimitiyasiti ebeno okopi ba:gala komo ida:da:li ododilipi, ibi hiliyonomago tabo koga:lama: ka:lamiti iba:tamo na:goiya:, “Dubala:, la: iya:tawahala aeno bisnisi ipuwalo a koko maninomo bododilinakoma:, iyo, ba:moe ba: aeno ka:ka:la. 26 Huiyatiya ba:moe dubu Polote bada komo kododina, la:le la:eno baida:mo uminakomata ba:gala galamo ulihonakomata. Ebete na:goenako tawakaluba:te kokotamo dododilinaka ba:bi ida:da:lino helo kitanaha:, hibi Godo keba ka:nala:ka: eba ka:naha:. Ba:bema: aeno Epesese habalo ba:gala ba:moe A:isiya hopo konomolo tawakaluba:te ebeno tabo uliti hibima: ga:late ibino ida:da:li adikulame ipuwane ohobila:huya:. 27 Diyala, ale eta komo ododihino tatalila tawakaluba:te aeno bisnisi ododi komo kubama: da: ga:lamena:, ba:gala atu tetelo iba:te Atimisiko Adikumino Hiya: Genamamo alehawamina komoma: diya:da:temena:. Ba:be mabuma: ba:ma tetelo tawakalubi hiliyonomate aeno A:isiya hopolo ba:gala ba:moe hopo konomolo dadikuminaka, ba:be aeno ida:da:li Atimisiko ebeno helo konomo kowibomema:ne!”

28 Ba:bema: ulihopi hiliyonomate ba:be taboma: konomamo maubahalete ga:ga: ekelalameheno iba:te na:ga:luya:, “Epesesenapino Atimisiko, ebe aeno Kodawanomola!” 29 Ba:bene ibino helo komote haba konomamo da:tuya:, habalubi hiliyonomate konomamo maubahaliya:. Ba:ba tetelo puya:te maubahala:go da:tolamitiya: iba:te Ma:sadoniya hoponapi netewapi Ga:iyasiko ba:gala A:listakasiko heloamo nuwatete habalubino tabo ga:la habamo gahugahulu dito wadimuya:taliya:, mabu ibi netewapi ba: Polokoba: wapata:nama:. 30 Ba:bema: Polote ubila tawakalubi ipuwamo tote ibi hidohido tabamo konegelebadilamema:, huiyatiya Ya:suku ta:matapi ipuwalo ebeno mabuluba:te ebe na:duhimiya:, 31 ba:gala ba:be A:isiya hopoeno gabomani dubu ipuwalo komo Polokono mabuluba:te atumu ebe toemeholo tabo ebetamo na:poemiya:, “Ama: habalubino tabo ga:la habamo akapa:la:!”

32 Ba:bene ba:ba tetelo habalubino kapiyuimi ipuwalo ko mauba komote hibinomolo uluhukuya:, komopa:te ga:ga:lo eta tabo ga:lanakui, eta tabo ga:lanakui, ba:ba ka:na ewagelitiya:, ba:gala atu tetelo komopa:te ukui bilibilima: eda:hutiya:, mabu iba:te kiya:tawahuya:ha: tawakaluba:te kapiyuimi habamo badama: ka:pelamiya:. 33 Ba:bene komo Yu dubate ibino eta lumagi A:lesandatamo helo ba ikame, ebete tawakalubino dopo hapulu mahigate kokoto ba:bo a:midahuya: tawakaluba:te tabo ga:la kekelalamema:, mabu ebe ubila iba:tamo owalubi tabo kolamagima:. 34 Huiyatiya iba:te ebe umihote, ebete Yu lumagima: deda:na ba:be komo iya:tawahate ibulunomo kapimilo ga:ga: gala na:katupuimiya:, “Epesesenapino Atimisiko, ebe aeno Kodawanomola!”

Ba:bene iba:te tete ga:ga:nomo ba:ba ka:na ba ewagelita, 35 eta gabomani dubu, ebe ba: Epesese haboeno kukala iya:tulamedawala, ebete ibi tatabuilamete iba:tamo na:goiya:, “Epesese dubala:, hiliyonomo tawakalubi iya:tawahala, aeno Epesese ko haba ba: Kodawa Atimisiko Adikumi Genamoeno hopola. Ba:gala ibi iya:tawahala, ba:be habali ida:da:lino talona nakola konomo Hunu Habane atamo ya:lo peguya:, ka:lo ba: aeno habalo bitana ale hidamo kuminama:. 36 Ba:bema: numa:la:, mulu iya:tawa lumagigodolo helo kitanaha: Atimisikono komoma: ha:da tabo goema:. Ba:be mabuma: la: ukui bilibilihino tatabalo na:pola:nala:, daedae ukuilo eta kuba komo akododa:la:!

37 “Ba:bema: la: ba:moi dubu netewapi ba:mamo badama: ka:magaheleoma? Iba:te Atimisiko Adikumino Genamalo pilo komo kododiha:, ba:gala iba:te aeno ida:da:lino komoma: eta kuba tabo kaga:laha:. 38 Ba:bema: Dimitiyasiko ba:gala ebeno okopi, iba:godolo mauba komo eta lumagitamo hibilo ditana, wadiyala iba:te aeno gabomani dubatamo na:tolama:mena: tabo anagiya:midapino holoholo hapulu konolowabeletihuima:. 39 Ba:gala la: eta komo umi ubi dihatitama, wadiyala komo habaluba:te la:go pekapiyuimiti tatabalo kopega:lama:nemata, Loma gabomaniti atamo helo dikaa:mena ba:ba ka:na. 40 Ba:bema: nale la: begoelamemata, la: hidamo! Ale ka:lo kebe komo kododima:, Loma gabomana:te dulimina:, diyala, iba:te ba:be komo haba kubahimi komoma: da: ga:lamena:, ba:bene iba:te atamo kuba huiya hibinomolo kikaa:mema:na: mabu aeno mauba komo ipuwalo hibi komo kitanaha:.” 41 Ba:bene ebeno tabo olamagi da:wibuya:, Epesese haboeno kukala iya:tulamedawate tawakalubi hiliyonomo ibino genamamo ba: dito oelameholiya:.