1 Komo netewa hegelate da:petohuya:, ba:ba tetelo Ga:lili hopoeno Ka:ina habalo eta dubuti uli kamena lawe poko bododitiya:. Ba:be poko ipuwalo Ya:sukunu menokote na:lutiya:, 2 ba:gala Ya:suti ebe ta:matapa:go atumu ba:bolo na:kapola:nuya: mabu poko namutudawate ibi a:kiyalamiya: iba:te komo tawakaluba:go baa: kopenahama:. 3 Ba:bene poko ododi ipuwalo hido gao beyate da:wibuya:, ba:ba tetelo Ya:sukunu menokote ebe na:kiyamiya:, “Tawakaluba:te hido gao beya da:niha ba: tiyonomo a:hawamina.”

4 Ba:bene Ya:suti ebeno menokotamo na:goiya:, “Adi, nale kebe komo ododima: ama:le na akapikiyanama:la:, mabu naeno helo hawakalimi tete hibilo kapeha:, ba:be tetete uluhukuma: Godote ha:kiya na kokiyanamema:ne.”

5 Ba:ba tetelo ebeno menokote ohobigate poko namutudawoeno genama okopa:tamo na:goiya:, “Ebete kebe komo ododima: la: da:goelamemena:, wadiyala la: ba:be komo dito nododiya:la:.”

6 Ba:ba tetelo ba:be genamalo sikisi koko beya upate na:pola:nuya:, ba:moi upa tawakaluba:te nakolamo ododiliya: ba:gala ibi ipuwalo komo 80 litala ba:gala komo 120 litala. Ba:moi upoeno komo ba:ma ka:na itanuya:, niho beyaha: huiyatiya Yu tawakalubino ododili ipuwalo iba:te Godokono eta tutumamo kopapamila:halema: ibino kokotoeno dalowa: ba:makomako upoeno beyamo ukulalenakuya:, ibino iniwala:te ibi diya:tulamiya: ba:ba ka:na. 7 Ba:bema: Ya:suti genama okopi na:goelamiya:, “La: ba:moi upa beyanomamo na:tabuilama:la:,” ba:bene iba:te hibinomolo da:tabuilamiya:, 8 Ya:suti ibi ba:bo goelamiya: iba:te kalila:mo iyapote poko namutudawatamo konikamema:.

Ba:bene iba:te tolamete poko namutudawatamo da:nikamiya:, 9 ba:ba tetelo ebete niti ebeno ukuilo golanomo gao beyama: goiya:. Ba:be beyate hidonomo gao beyama: keba ka:na kediya: genama umi okopa:te iya:tawahuya:, huiyatiya poko namutudawate ba:be komo iya:tawaheno, ebete uli kamena da:lawitiya: ba:be dubu ebetamo ka:miti 10 ebe na:goemiya:, “Numa:, aeno ododi komo ba:ma ka:nala, poko ododi tetelo ale tawakaluba:tamo hidonomo gola gao beya dopamo ikalamenakoma:, iyo, iba:te ba:be hido gola beya da:hawaminamena:, ba:bene galane ale golaha:dopo beya iba:tamo ba:bo kikalamema:nema:. Huiyatiya ama: ba:ba ka:na kododiha:, ama: poko kuititi tetelo ba:moe golanomo gao beya tawakaluba:tamo ikalamitata!”

11 Ba:bema: Ga:lili hopoeno Ka:ina habalo Godokono helo hawakalimima: Ya:suti ba:moe ebeno dopo hanohano komo bododiya:. Ba:ba tetelo ebeno ta:matapa:te ebeno konomo helo dumiya:, iba:te ebe hibima: ba:bo midiya:. 12 Ba:bene ba:moe komo da:wibuya: Ya:suku ba:gala ebeno ta:matapi, iba:te ebeno menokago ba:gala ekaka:go Kapeniyama habamo tolamete tete nanekele ba:bo nemediya:.

13 Mabu Yunapino Adaguila: Poko*Buka ka:lamiholedawa, ama: ba:moe Pokoeno ipuwa iya:tawama: ubi dihatemena:, wadiyala ama: Yon. 18:28 komoeno owalubi tabo numiya:. ododi tete da:tatalinapiya:, ba:bema: Ya:suti Yelusalema ko habamo dito tuya:. 14 Ba:bene ebete Godoko Adikumino Hiya: Genamamo tote, ba:be genamalo tawakaluba:te kau-goegoe ba:gala sipi-goegoe ba:gala gimai holahola ba kolowamiholita ba:bo nulamiya:, ba:gala ba:be atu tetelo tawakaluba:te patapatalo ahiditi komopino mani doweheta:midahalitiya: ebete ibi ba:bo kanulamiya:. 15 Ba:moe mabuma: Ya:suti hale uwatete giya:pa:pa: ododiti ebete ba:bi goegoe Godoko Adikumino Genamoeno kala ipuwane helonomamo ba:bo ta:malateliya:, ba:gala ebete mani oweheta:midahalepino patapata ohoba:midahalelamete tawakalubino mani ba penegudilame hiya:hiya: ba:bo petohuya:. 16 Ba:bene ebete gimai holahola kolowamipi ba kiyahalame na:goiya:, “Ba:moi ilina ba:moe genamane nuluhukulatela:la:. Naeno Nabiwino Genama talonala, ba:bema: la:le kolowami habama: akamida:la:!”

17 Ya:suti ba:moe komo dododiya: ebeno ta:matapa:te Godokono Bukoeno eta tabo ba:bo emalagidoluya:, ba:be tabote ba:ma ka:na itana, “Amia:no Talona Genama mabuma: naeno tepo ipuwoeno helote koenomoma: eda:na.”

18 Ba:ba tetelo komo Yu watowatopa:te Ya:suku na:ga:lamiya:, “Ama: Godokono helo hawakalimima: aeno holoholo hapulu hanohano komo nododa:, ba:bema: a kiya:tawahama:nema: ama:le Godokono Genamalo dododa: ba:be komo amia:no heloamo kododiha:, huiyatiya Godokono heloamo ododa:ta.”

19 Ya:suti ibino tabo ba huiya na:goiya:, “Kubahenola, la:le ba:moe Godoko Adikumino Genama danabulimima, huiyatiya nale netewa-kapiya hegelalo gala kaketema:nemo.”

20 Yu watowatopa:te ebetamo na:ga:luya:, “Ama: na:kemalagidoluta, amia:no helo modobola ba:moe konomo genama netewa-kapiya hegelalo ketema:? A:iye! Ba:moe genama aeno naba:te 46 gogo ipuwalo etenama:!”

21 Huiyatiya Ya:suti kebe tabo da:goiya: ba: ebeno apeno komoma: goiya:. 22 Ba:bema: galane tetelo ebete hoe ipuwane da:kamahiguya:, ebeno ta:matapa:te ba:moe tabo komo ba:bo emalagidoluya:, ba:bene Godote ebeno komoma: ebeno Bukalo kebe komo ya:lo da:hawakalimiya:, iba:te ba:be komo hidamo lawete hibima: ba midi Ya:sukunu tabo komo atumu hibima: ba:bo kamidiya:.

23 Ba:bene Adaguila: Poko tetelo Ya:suti Godokono helo hawakalimima: kebe koko hanohano komo Yelusalema habalo dododiliya:, komo tawakalubi hiliyonomate ba:bi komo ulamete ebe hibima: ba:bo midiya:. 24 Huiyatiya ibi ipuwalo Ya:suti ebeno hibi komo eta kapiya lumagitamo kahawakalimiya:ha:, mabu ebe iya:tawanomola tawakalubi hiliyonomoeno tepo ipuwalo kuba ha:da amiho komate ba:pola:lama:na. 25 Ba:gala ebete eta lumagi kakiyamenakuiha: ebete ebeno tepo ipuwoeno komo hibinomolo kohawakalimima:, mabu ebete tawakalubi hiliyonomoeno tepo ipuwoeno komokomo ya:lo iya:tawuya:.