1 Ba:bene Pa:lisi kapiyuimipa:te Ya:sukunu komo ba:ma ka:na ulihuya:, ebete hiliyonomo tawakalubi ebeno ta:matapima: midiliti ibi beyamo ba:bo wadulatelenakui, huiyatiya Yonete hiliyo tawakalubi kawadulatelenakuiha:. 2 Ba:be teteno hibi komote huiyatiya ba:ma ka:na itanuya:, ba:bi tawakalubi ipuwalo Ya:suti eta lumagi beyamo kadutinakuiha:, ebeno ta:matapa:te ha:kiya wadulatelenakuya:, 3 ba:bene Ya:suti Pa:lisi kapiyuimipino tabo ga:la komo diya:tawuya:, ba:ba tetelo ebete Yudiya hopo miya:pate Ga:lili hopamo wilama: emalagidoluya:.

4 Ba:bene ba:bamo konuluhukuma: ebete duiduiyanomolo tupuimiti Godokono ubilo Samaliya hopodo tote 5 ba:be hopoeno Saika habamo dito nuluhukuya:. Iniwali tetelo Ya:ikobote ebeno gudu Yausepetamo dikamiya: ba:moe Saika haba ba:be haka tamelo itana, 6 ba:gala Ya:ikobote daligiya: ba:be beya ma:pete ba:bolo atumu ba:kaitana. Ba:bene hegela tuli tetenomolo Ya:suti tete ga:ga:dopo pete ba:be beya ma:pe tamelo pemedete hawela bepamitiya:.

7-8 Ba:bene Ya:suku ta:matapa:te baa: mana:mo uwatehoma: habamo da:tolamiya:, ebe ha:kiya beya ma:pelo ba luta eta Samaliyanapi kamenate beya iyapoma: habane ba:bo piya:, ba:bene Ya:suti ebe na:goemiya:, “Na beya kapete unamita. Nolata, na beya nikanama:.”

9 Ba:bene kamenate Ya:sukunu tabo ba huiya na:goiya:, “A:iye, ama: Yunapi dubulata ba:gala na Samaliyanapi kamenala! Ama: na beyama: badama: ka:goenama:wa?” Ebete ba:ma ka:na da:goiya: mabu Yunapa:te Samaliyanapi dalowa:gopima: ga:lalo atu kalila:mo beya nihoma: talonama: ga:lanaka.

10 Ba:bene Ya:suti na:goiya:, “Godote tawakaluba:tamo dito dikalamena ba:gala pote ama: beyama: da:toemeha, ama:le ba:bi netewa komo hibilo niya:tawotale, ama:le na ba:kiyanameona: nale ama:tamo ka:ka: beya kikamema:.”

11 Kamenate ebetamo na:goiya:, “Kodawa, ama: ba:be ka:ka: beya kebene na:ka:laweomena:? Ama:godolo beya iyapoeno ilina puliyala, ba:gala numa:, ba:moe beya ma:pe ba: kulukulunomola. 12 Ama: aeno iniwa Ya:ikoboko deha:potodawama: goelo ama: ha:kiya ama: koma: ka:midiuta? Ba:moe beya ma:pe ebete a ebeno eyoni gugudi mabuma: aligiya:, ba:bene ebe ba:gala ebeno gugudi, ba:gala ebeno sipi-goegoe ba:gala kau-goegoe, ibi hiliyonomate ba:moe beya binihonama:.”

13 Ya:suti huiyatiya ebetamo na:goiya:, “Kebe lumagiti ba:moe beya da:nimini ebe beya kapete gala kakumima:ne, 14 huiyatiya nale kebe beya lumagitamo nima: dikamemo ebe beya kapete gala a:kuminakamene. Ba:be ka:ka: beyate lumagino emede ipuwane hiliyonomo tetelo ba:peka:ka:la:namene, ba:ma ka:na ebete wiboha: ka:ka: hibilo kolawema:ne.”

15 Ba:bene kamenate ebetamo na:goiya:, “Kodawa, nolata, ama: ba:be beya natamo nikanama:. Nale da:nimo, na gala beya kapete a:kunamenakamene ba:gala nale ba:moe beya iyapoma: gala a:kapenakamo.”

16 Ya:suti ebe na:goemiya:, “Ama: habamo tote, amia:no awi nadabuiti mamo badi na:piya:la:.”

17 Ba:bene kamenate na:huiyuya:, “Na awihinola.”

Ya:suti ebetamo na:goiya:, “Ama: awiha:ma: hibi tabo begaa:ta, 18 mabu ama: dopamo paibo hiya:hiya: dubate a:lawa:tepahuia:ta, ba:gala ka:lo ama:go demedena ba:be dubu amia:no hibi awiha:. Iyo, ama: awiha:ma: hibilo gaa:ta.”

19 Ba:bema: kamenate ebetamo na:goiya:, “Kodawa, na niya:tawutamo, hibila, ama: ba: Godokono ukui hawakalimidawa etalata. 20 A Samaliyanapino iniwala:te Godoko ba:moe hununomo hakalo adikuminakuya: ba:bema: ale talonama: ga:lanama:, huiyatiya la: Yunapa:te na:ga:lanakomata tawakaluba:te Yelusalemalo Godoko nadikuminakamena:.”

21 Ya:suti ebetamo na:goiya:, “Kamena, nale da:goitamo, ama: ba:moe tabo hibima: na:mida:. Tete ba: na:pe, puya:te Nabiwi Godoko dadikumina iba:te gala Yelusalemalo a:kadikuminakamena: ba:gala ba:moe hununomo hakalo a:kadikuminakamena:. 22 La: Samaliyanapa:te Godoko adikumi gabo hibilo iya:tawaha:, huiyatiya a Yunapa:te ba:moe komo iya:tawahala mabu Godokono ka:ka: mula: komote agodone hopo konomamo pena. 23 Ba: hibila, tete kopema:ne, iyo, ba: na:pe, puya:te Nabiwi Godoko hibilo dadikumina iba:te uli ukui uwatete ebeno Gobogoboeno heloamo ba:gala ebeno hibi komodo ebe badikuminakomena:, mabu Nabiwiti ba:bako tawakalubi boholena ebe kadikuminama:. 24 Godote lumagino holoholamo kemedenaha:, ebe ba: gobogobonomola. Ba:bema: puya:te ebe dadikumina, wadiyala iba:te ebeno Gobogoboeno heloamo ba:gala ebeno hibi komodo nadikuminakamena:.”

25 Ba:bene kamenate ebetamo na:goiya:, “Na iya:tawala Mesayate kopema:ne, ebeno eta mahilo Kelisotela. Ebete da:pemene Godokono hiliyonomo komokomo atamo kopehawakalilamema:ne.”

26 Ya:suti ebetamo na:huiyuya:, “Na ama:go tabo dolamagimitama:, na ba: Kelisotela.”

27 Ba:ba tetenomolo Ya:sukunu ta:matapa:te haba ipuwane da:kapelamiya:, iba:te koamo pela:wa:huya: mabu ebete ba:moe kamenago tabo ba olamagimita ba:bo pulamiya:. Huiyatiya ibi ipuwalo eta lumagiti ba:be kamena ba:ma ka:na kakiyamiya:ha:, “Ama: bada komo ododima: kewageliuta?” ba:gala eta lumagiti Ya:suku kakiyamiya:ha:, “Mabu keka: ama:le eba:go tabo dolamagimita?”

28 Ba:bema: ba:ba tetelo kamenate ebeno upa beya ma:pelo miya:pate habamo tote tawakalubi ba:ma ka:na nikiyalamiya:, 29 “Eta dubu na:puma:la:. Diyala, ebe da: Kelisotela:, mabu nale dopamo kebe kuba komo diya gabodo dododilinamimo, ba:bi komokomo ebete natamo hibinomolo a:hawakalilame.” 30 Ba:bema: habaluba:te kamenoeno tabamo papamila:halete Ya:suku umima: ba: dito tolamiya:.

31 Habaluba:te ba pelamita ba:be atu tetelo Ya:suku ta:matapa:te ebe na:kiyahamiya:, “Iya:tulamedawa, wadiyala ama: baa: na:na.”

32 Huiyatiya Ya:suti iba:tamo na:goiya:, “Ao, nale nama: ditana ba:be baeno hibi komo la: iya:tawaha:.”

33 Ba:bema: Ya:sukunu ta:matapa:te ibi ipuwalo na:ga:luya:, “Diyala, eta lumagiti ebetamo baa: kuda: ikame.”

34 Ba:bene Ya:suti iba:tamo na:goiya:, “Na da:poenamiya: nale ebeno ubi komamo papamiwatalo ebeno oko kuitita:mo da:nuluhukumu, nale ba:be gabodo helo hibinomolo a:lawenakomo, baa: na komo keba ka:nala:ka: ba:ba ka:nala. 35 Numa:la:, la: pali ododili tetelo ba:ma ka:na ga:lanakomata, ‘Netewa-netewa manomete ba:nepola:na, pali ilina naha tete kopema:ne.’ Ba:bema: nale la: eta tabo begoelamemata, la:le Godokono pali ilina hidamo ulamete niya:tawahala:, naha ilina uwate tete ba: a:pe. 36 Ba:gala eta komo, kona wakalami okodawate pali namutudawoeno wiboha: ka:ka: mabuma: pali oko ipuwalo naha kona buwatenako. Ba: hibila, namutudawate ebetamo huiya ikame ya:lo a:tupuimi, iyo, ba:moe gabodo kona kikipo amihodawa ba:gala kona wakalami okodawa, iba:te ibino huiya konomo kalakalago kapimilo kuwatema:na:. 37 Tawakaluba:te da:ga:lanaka ba: hibila, ‘Eta lumagiti kona kikipo amihote huiyatiya ebeno ekawiti pali ilina uwate tetelo oko kowatima:ne, ba:bene ibi netewapa:te badi konahama:na:.’ 38 Ba:bema: nale la: pali ilina uwatema: ba: ba:ba ka:na oelamemata, huiyatiya ba:bi pali ilina la:le kamihoha:. Iyo, komo okopa:te dopamo kodakoda oko owatiya:, huiyatiya ka:lo la: ibino hido oko owati ipuwane hidohido naha ilina buwatenakomata.”

39 Ba:ba tetelo ba:be habalo demedenama: ba:bi Samaliyanapi ipuwalo komo hiliyonomate Ya:suku hibima: ba:bo midiya:, mabu kamenate ibi a:kiyalamiya:, “Nale dopamo kebe kuba komo diya gabodo dododilinamimo, ba:bi komokomo ba:moe dubuti natamo hibinomolo a:hawakalilame.” 40 Ba:bene iba:te ibino habane Ya:sutamo da:nikuliya:, iba:te ebe betoemehuya: ebete iba:godolo kemeda:tepama:, ba:bema: ba:ba tetelo Ya:suti netewa hegela bekalutiya:.

41 Ba:ba tetelo komo habaluba:te Ya:sukunu tabo komokomo dulihuya:, ibi ipuwalo komo hiliyonomate ebe hibima: miditi, 42 kamena ba:ma ka:na kiyamiya:, “Dopamo tetelo amia:no tabo kapiya dulima: ale ba:moe Ya:suku hibima: ba:bo midima:, huiyatiya ka:lo ale aeno hibila galamo ebeno tabo ulima:. Hibila, ebe ba: hopo habanapino Ka:ka: Mula:lelamedawala.”

43-44 Ya:suti hopo habalo demedenami ebete ebeno komoma: hibinomolo ba:ma ka:na goenakui, “Godokono ukui hawakalimidawa ebeno habaluba:te ebe hunamo a:kadipata:mena:, huiyatiya iba:te ebe ubiha:ma: beda:hanakomena:.” Ba:bema: Ya:suti ba:be komo iya:tawate Samaliya hopolo netewa hegela lutate, ba:bene ba:be hopo miya:pate ebeno Ga:lili hopamo gala dito katuya:. 45 Ba:ba tetelo komo Ga:lili hoponapa:te ebe kalakalago lawiya:, mabu iba:te dopamo Adaguila: Pokoma: Yelusalema ko habamo da:tolamiya: Ya:sukunu hiliyonomo ododili komokomo nulamete hidonomoma: ba:bo nega:luya:.

46 Ba:bene Ya:suti Ga:lili hopoeno Ka:ina habamo gala dito katuya:, ba:be haba ba: ebete dopamo Godokono helo hawakalimi komodo beyanomo hido gao beyama: da:midiya:, ba:be habala. Ba:ba tetelo eta gabomani dubuti ba:bolo na:lutiya:, huiyatiya ebeno kuhiti Kapeniyama habalo ko tawetawa:go watitiya:. 47 Ba:bene ba:be gabomani dubuti Ya:suti Yudiya hopone pe komo duliya:, ba:bema: ebete ebetamo tote ebe na:nikiyamiya:, “Wadiyala:ka: ama: Kapeniyama habamo pete naeno kuhi na:pihiduimiya:, mabu ebe hoe tatalila.”

48 Ya:suti huiyatiya ebetamo na:goiya:, “La: tawakalubi hiliyonomoeno komo ba: ba:ma ka:nala, nagodolo koko hanohano komo ulameheno la:le na hibima: a:kamidina:lemata.”

49 Gabomani dubuti ebetamo gala na:kagoiya:, “Kodawa, nolata. Ama: tiyolo nago na:pa:, naeno guduti hoedemene.”

50 Ba:bene Ya:suti ebetamo na:goiya:, “Ama: kalakalago na:toa. Amia:no kuhino ka:ka:te a:kalatida:mene.”

Ba:ba tetelo ba:be dubuti Ya:sukunu tabo hibima: miditi ebeno Kapeniyama habamo to ba:bo tupuimiya:, huiyatiya ba:be atu hegelalo ebete habamo kanuluhukuya:ha:. 51 Ba:bene eta hegelalo komo ebeno genama okopa:te eba:go da:paluguya:, iba:te ebe na:pikiyamiya:, “Nolata, amia:no kuhiti dutu gala a:kaka:ki!”

52 Ebeno kuhiti kebako tetelo ka:hidui, ebete ba:be komo lawema: ebeno okopi dalateda:liya: iba:te na:huiyuya:, “Dutu hegela tuli tetelo, 1 koloko tete keba ka:nala:ka:, tawetawete ebe ba:bo miya:pui.” 53 Ba:bene nabiwiti ukuilo nemalagidoluya:, ba:be tete ba: atu tetenomola Ya:suti ebe da:kiyami kuhino ka:ka:te a:kalatida:mene, ba:bema: ebe ba:gala ebeno genamanapi, ibi hiliyonomate Ya:suku hibima: ba:bo midiya:.

54 Ba: hibila, Ya:suti Yudiya hopone Ga:lili hopamo pete netewa hanohano komo da:pododiliya:, ba:moe komo ba: etala.