4
Saitanate Ya:suku Kuba Gabamo Kemogabuimima: Ebetamo Duluhukuya:
Ma:t 4:1-11; Mak 1:12-13
Ba:bene Godokono Gobogobote Ya:sukunu tepo ipuwa tabuimiti, Yodane Tulini ba magata ebete dito hopamo ba: dito tuya:. Ba:bene Ya:suti dito hopolo 40 hegela ba nemede Saitanate ebe kuba gabamo kemogabuimima: ebetamo ba:bo uluhukuya:. Ba:be tete ga:ga:nomolo Ya:suti baa: kananakuiha:, ba:bema: ba:be tete da:wibuya: ebete baa:ma: kape komo ba:bo iya:tawuya:.
Ba:bene Saitanate ebe na:goemiya:, “Ama: Godokono hibi Guduma: deda:na, ba:moe nakola baa:ma: na:mida:.”
Ya:suti ebeno tabo ba huiya na:goiya:, “Godokono Bukalo tabo ba:ma ka:na itana, ‘Lumagiti ba:moe hopoeno baa: kapiyalo a:kaka:ka:namene.’ ”
Ba:bene Saitanate Ya:suku hunamo magatate ba:moe hopo konomoeno hiya:hiya: koko hopo ba niya:tumiho, iba:te ba:ba tetenomolo ba:bi hiliyonomo ilina bulameholiya:. Saitanate ebetamo na:goiya:, “Ba:moi hiliyonomo ilina ba:gala helo konomo nale ama:tamo kikamehoma:nemata. Ba: hibila, hopo haboeno ilina hiliyonomo Godote natamo ikanamehoniya:, ba:be mabuma: nale kebe lumagitamo ikamema: ubi dihatemo nagodolo helo bitana ebetamo kikamehoma:. Iyo, ama:le na nadikunama:, ba:bene ba:moi ilina hiliyonomo ama:le kuwatema:na:ta.”
Huiyatiya Ya:suti ebeno tabo ba huiya na:goiya:, “Godokono Bukalo tabo ba:ma ka:na itana, ‘Ama: amia:no Kodawa Godoko adikumilo ebe kapiyatamo na:papamiwatanakuya:.’ ”
Ba:bene Saitanate ebe Yelusalema ko habamo magatate Godoko Adikumino Hiya: Genamoeno uba hunamo nadipiti ebe ba:bo negoemiya:, “Ama: Godokono hibi Guduma: deda:na, ba:moene hakamo na:nepatega, 10 mabu Godokono Bukalo tabo ba:ma ka:na itana,
‘Godote ebeno nopopi kopoelamema:ne
iba:te ama: hidamo kopowalubima:,
11 iyo, iba:te ibino kokotamo ama: kopelawema:na:ta,
ba:bema: ama:le nakolalo nato a:kanukamidamena:ta.’ ”*Saitanate da:goiya: ba:be tabo Godokono Bukalo hibinomolo bitana, iyo, wadiyala ama: Sam Ohale Buka 91:11-12 numiya:. Saitanako ba: konomo ha:da amihodawala, ba:bema: komo tetelo ebete Godokono hiya:hiya: tabo tawakalubino ukui mabamo wadahenako, huiyatiya ba:bi taboeno hibi ipuwa ebete kahawakalilamenaha:, iyo, ba:moe ba:be gabodo ebete ibi kuba gabamo emogabuilamenako, ebete Ya:sutamo ododima: dewageliya: ba:ba ka:na.
12 Huiyatiya Ya:suti ebetamo na:huiyuya:, “Ao, nale ba:be kuba komo a:kododa:mo, mabu Godokono Bukalo eta tabo ba:ma ka:na itana, ‘Hopo lumagiti Kodawa Godoko pawima: akewagela:la:.’ Iyo, ba:be mabuma: hopo haba lumagiti ebeno daedae ukuia:mo eta komo dododimini, ebete akemalagidolala: Godote ebeno ka:ka: dito kopemula:mema:.”
13 Ba:bene Saitanakono kuba gabamo emogabuimiho komokomo hiliyonomo da:wibohuya:, ebete Ya:suku tete nanekela:mo ba:bo miya:puya:.
Ya:suti Ebeno Oko Da:tupuimiya:
Ma:t 4:12-17; Mak 1:14-15
14 Ba:ba tetelo Ya:suti Godokono Gobogoboeno heloago Ga:lili hopamo gala na:katuya:, ba:bene ba:be hopo konomolo demedehonama: ba:bi tawakalubi hiliyonomate Ya:sukunu komoma: tabo ba:bo nikiyahuya:. 15 Ebete ba:bi Yu tawakalubino baidi ibubulamehole genamalo ibi diya:tulamenakui, ba:be mabuma: ibi hiliyonomate ebe konomamo milimihonakuya:.
Nasalete Habaluba:te Ya:suku Ubiha:ma: Deda:huya:
Ma:t 13:53-58; Mak 6:1-6
16 Eta hegelalo Ya:suti ebeno emede haba Nasaleta:mo na:tuya:, ba:bene ebete Yu tawakalubino okoha: talona hegelalo dopamo keba ka:na kododinakui, ebete ba:be hegelalo atu komo bekanododiya:, iyo, ebete tawakalubino baidi ibubulamehole genamamo nodolote Godokono Bukoeno tabo ka:lamiholema: ba:bo mahiguya:. 17 Ba:bene iba:te Aisaya buka mokopi ebetamo ikamete, ebete pahaa:midate buka ka:lamihole ba:ma ka:na ba:bo tupuimiya:,
18 “Godokono Gobogobote na hunulu emedena,
mabu ebete na a:laweniya:,
nale awaelo demedehona ba:bi tawakaluba:tamo Godokono Hido Tabo katama:.
Ebete na a:poenamiya: du genamalo demedehona ba:bi tawakaluba:tamo,
ba:bema: nale ibi kokiyalamema:nemo,
tete ba: na:pe ibi du genamane kuluhukulatelema:,
ba:gala na baidi tamiholame tawakalubi kokiyalamema:nemo,
ibino baiditi ka:la:minahalelamema:.
Iyo, nale menemena:go da:wapata:lamena
ba:bi tawakalubi tutunomoma: komidilima:nemo,
19 ba:gala Kodawa Godote ibino ka:ka: da:mula:lelamemene,
nale ibi ba:moe tabo kokiyalamema:nemo,
ba:be komote ba: na:pe.”
20 Ba:bene buka ka:lamihole da:wibuya: Ya:suti buka gala kamokopiti okodawatamo ikamete tawakalubi iya:tulamema: ibino holoholo hapulu dito emediya:. Ba:ba tetelo baidi ibubulamehole genama gulu da:pola:nuya: ba:bi tawakaluba:te Ya:suku hidonomamo umihutiya:, 21 ba:bema: ebete iba:tamo na:goiya:, “Ka:lo nale ba:moe buka tabo da:ka:lamiholemo, ba:ba tetenomolo ebeno hibi komote la:tamo ba: a:puluhuku.”
22 Ba:bene ebete Godokono tabo iba:tamo ba olamagita ibi hiliyonomate nemalagidolutiya:, “Ya:suku ba: hidonomo lumagila,” ba:gala iba:te ebeno tabone kebe tabo kulihuya: ba:bi hidohido taboma: hanohanoholo na:ga:lutiya:, “Moe ba: Yausepekono gudula, ebeno mulu keba ka:nala:ka:?”
23 Ba:bene ebete iba:tamo na:goiya:, “Na la:tamo hibi tabo begoemo. Tawakaluba:te muluma: da:ga:lanaka, galane la:le ba:bako tabo natamo ba:ma ka:na koga:lama:nemata, ‘Ama: hibi dogetama: deda:na, wadiyala ama: ha:kiya ama: na:hiduima:.’ Ba:gala la:le na kokiyanamema:nemata, ‘Ama:le Kapeniyama habalo da:nododili ale ba:bi hanohano komo ulihuima:, ba:bema: ka:lo huiyatiya amia:no habanomolo ba:bako komokomo na:kododila:.’ ”
24 Ya:suti iba:tamo gala na:kagoiya:, “Na la:tamo hibi tabo begoemo, Godokono ukui hawakalimidawa ebeno habaluba:te ebe ubiha:ma: eda:hate a:kalawa:mena:. 25 Ba:bema: la: naeno hibi tabo nulia:la:. Elayate demedenami ba:ba tetelo gogo netewa-kapiyalo wegolate konakuiha:, hopo konomolo naha ilinate ba:bema: wibohuya:. Ba:ba tetelo hamolehamole hiliyonomate Isalaela hopolo awaelo emedehonama:, 26 huiyatiya Godote Elayako ba:bi Yu tawakalubino hamolehamola:tamo kanoemiya:ha:. Ao, ebete ebe Saidono hopoeno Sa:lepata habamo noemiya:, ba:bolo demedenami ba:be hamole kapiyanomo konowalubima:. Ba:be kamena Yu lumagiha:! 27 Ba:gala ba:moe ba: eta komola. Eta Godokono ukui hawakalimidawa Elaisakono tetelo Isalaela hopolo hiliyonomo kuitikuita:gopi dubate nemedehonama:, huiyatiya ibi ipuwalo Godote eta dubu kahiduimiya:ha:, eta Siliya hoponapi Na:imanako kapiya bihiduimiya:. Ba:be dubu Yu lumagiha:!”
28 Ba:bene Yu tawakalubino baidi ibubulamehole genamalo da:pola:nuya:, ibi hiliyonomate ba:be tabo duliya: konomamo maubahaliya:. 29 Ba:bema: iba:te mahila:halete Ya:suku lawete haba ipuwane heloamo ba:bo uluhukutiya:, mabu ibi ubila ebe eta haka hunamo magatate iya:ha:midale hakane kopenemokamidama:, iyo, ba:mako haka Nasalete haba tamelo itanami. 30 Ba:ba tetelo Ya:suti huiyatiya ba:bi hiliyonomo tawakalubi tetedo tote ebeno to gabodo ba: dito tuya:.
Ya:suti Kuba Gobogobagoeno Dubu Da:hiduimiya:
Mak 1:21-28
31 Ba:bene Ya:suti Ga:lili hopoeno Kapeniyama habamo tote, Yu tawakalubino okoha: talona hegelalo tawakalubi da:niya:tulamitiya:, 32 iba:te ebeno tabamo na:hanohanohutiya: mabu ebete tabo Godokono heloamo olamagitiya:.
33 Ba:ba tetelo ibino baidi ibubulamehole genama gulu kuba gobogobagoeno dubuti ba:bolo na:lutiya:, ba:bene ebete gaa:tepahalo ibulunomamo na:goiya:, 34 “Iya:! Ya:su Nasaletenapi, ama: atamo bada komo na:kododiomena:? Ama: a kubahia:mema: ka:pa:wa? A:iye, na iya:tawala amia:no komo, ama: Godokono Hido-talona Dawalata!”
35 Ya:suti huiyatiya ebe na:kiyahamiya:, “Ama: kodakodate, ebegodone nuluhuka!” Ba:bene kuba gobogobote tawakalubino holoholo hapulu ba:be dubu hopamo a:da:nate ebegodone ba:bo uluhukuya:, huiyatiya ebetamo eta kuba komo kododiya:ha:.
36 Ba:bema: ba:bi tawakalubi hiliyonomate hanohanoholo etate etatamo goenakui, etate etatamo goenakui, ba:ma ka:na ewagelitiya:, “Ba:moe taboeno helo keba ka:nala:ka:? Ba:moe dubuino helo ba:gala ha:hi konomola! Numa:la:, kuba gobogobate ebeno tabo ulihote gobogobamo ba: alahutiha!” 37 Ba:bene Ya:sukunu oko owati tabote ba:be hopo konomamo ba: dito tuya:, iyo, puya:te ba:bolo demedehonama: ibi hiliyonomate ebeno komoma: tabo ba:bo nikiyahuya:.
Ya:suti Saimonokono Moto Kakidubu Da:hiduimiya:
Ma:t 8:14-15; Mak 1:29-31
38 Ba:bene Ya:suti Yu tawakalubino baidi ibubulamehole genamane puluhukuti Saimonokono genamamo dito tuya:. Ba:bolo Saimonokono moto kakidubu ape koenomo tawetawete umitiya:, ba:bene ebeno komoma: tawakaluba:te Ya:suku ba:bo ga:lamiya:. 39 Ba:bema: Ya:suti tote ebeno wata baha:mo nutiti ba:be tawetawete ebe komiya:pama: da:kiyamiya:, ba:ba tetenomolo tawetawete ebegodone ba uluhuku ebete mahigate ibi mabuma: baa: okalimi oko ba:bo tupuimiya:.
Ya:suti Hiliyonomo Temetema:gopi Da:hiduilameniya:
Ma:t 8:16-17; Mak 1:32-34
40 Ba:ba tetelo hegelate da:nihila:minaniya:, puya:te ba:be habalo hiya:hiya: temetema:go da:pola:nuya: ibino mabuluba:te ibi hiliyonomo Ya:sutamo ba:bo magaheleniya:, ba:bene ebete ebeno kokoto iba:tamo emowatilamelo ibi hiliyonomo ba:bo hiduilameniya:. 41 Ba:gala ebete kuba gobogobo da:kiyahalameniya:, iba:te komo tawakalubi hiliyonomagodone ba ikulina ga:ga:go tabo ba:ma ka:na ga:laniya:, “Ya:su, ama: ba: Godokono Gudulata!” Ba: hibila, ba:bi kuba gobogobo iya:tawahala Ya:suku ba: Godokono Oemedawa Kelisotela, huiyatiya ebete ibi ba kiyahalamena tabo ga:la talona ba:bo ihatelameniya: iba:te ebeno komo hawakalimima:.
Ya:suti Komo Hiya:hiya: Habahabalo Godokono Tabo Da:nolamaginakui
Mak 1:35-39
42 Ba:bene hegelate ba owalohuta Ya:suti ba:be habane uluhukuti tataba hopamo na:tuya:, ba:bema: tawakaluba:te ebe ohowada:go tolamete ba:bo numiya:, mabu iba:te ubihinola Ya:suti ibi miya:pale. 43 Huiyatiya Ya:suti iba:tamo na:goiya:, “Wadiyala na komo habahabamo tote, Godote Ko Gawadalagima: deda:na ba:be komoeno Hido Tabo konolamagima:nemo, mabu Godote na ba:bema: poenamiya:.”
44 Ba:bene Ya:suti ba:be hopoeno hiliyonomo habahabamo tonakui Yu tawakalubino baidi ibubulamehole genama gulu Godokono tabo ba:bo nolamaginakui.

*4:11: Saitanate da:goiya: ba:be tabo Godokono Bukalo hibinomolo bitana, iyo, wadiyala ama: Sam Ohale Buka 91:11-12 numiya:. Saitanako ba: konomo ha:da amihodawala, ba:bema: komo tetelo ebete Godokono hiya:hiya: tabo tawakalubino ukui mabamo wadahenako, huiyatiya ba:bi taboeno hibi ipuwa ebete kahawakalilamenaha:, iyo, ba:moe ba:be gabodo ebete ibi kuba gabamo emogabuilamenako, ebete Ya:sutamo ododima: dewageliya: ba:ba ka:na.