5
Ya:suti Tawakalubi Iya:tulamema: Haka Hunamo Da:nodoluya:
Ba:bene ba:bi tawakalubi hiliyonomate Ya:sutamo da:pelamiya:, ebete ibi ulamete haka hunamo nodolote dito nemediya:. Ba:bema: ebe ta:matapi dubate pelamete ebe da:panataguma:diguya:, ebete ibi iya:tulame ba:bo tupuimiya:.
Godokono Hibi Kalakala Komo
Luk 6:20-23
Ya:suti iba:tamo na:goiya:,
“Puya:te ibi ha:kiya ibi hegehegema: ga:lalo
Godoko ibino Kodawama: da:ga:lanaka,
wadiyala iba:te na:kalakalahamina:,
mabu Godote Ko Gawadalagima: deda:na,
ba:be hido haboeno komo ibinola!
Ba:gala puya:te ba:ma tetelo temetema:go dihimina,
wadiyala iba:te na:kalakalahamina:,
mabu Godote iba:tamo gelebadi kikalamema:ne!
Ba:gala puya:te awagahaha:pima: deda:hana,
wadiyala iba:te na:kalakalahamina:,
mabu Godote ba:moe hopo konomo iba:tamo kikalamema:ne!
Ba:gala puya:te tuputupu emede komoma: da:kapimina,
wadiyala iba:te na:kalakalahamina:,
mabu Godote ibino kape komo komodobuilamema:ne!
Ba:gala puya:te malemale da:hawakalilamena,
wadiyala iba:te na:kalakalahamina:,
mabu Godote iba:tamo ebeno malemale kohawakalimima:ne!
Ba:gala puya:te ibino tepo ipuwa hidamo dukulalena,
wadiyala iba:te na:kalakalahamina:,
mabu iba:te Godokono holoholo kumima:na:!
Ba:gala puya:te maubahapa:tamo gelebadi dikalamena,
wadiyala iba:te na:kalakalahamina:,
mabu Godote ibi ebeno gugudima: kogoema:ne!
10 Ba:gala puya:te tuputupu gabodo ba wapata:lamena
ba:be mabuma: temeteme duwatenaka,
wadiyala iba:te na:kalakalahamina:,
mabu Godote Ko Gawadalagima: deda:na,
ba:be hido haboeno komo ibinola!
11 “Ba:gala tawakaluba:te na mabuma: la: iduduputilamelo koko temeteme ba ikalame la: kubapima: da:ga:lana, la: atumu na:kakalakalahala:! 12 Iyo, la: konomamo na:kalakalahala:, mabu galane tetelo la:le Godokono Hunu Habalo la:eno huiya kokonomo konuwatema:nemata. Numa:la:, dopamo tetelo demedenama: ba:bi kubapa:te atumu Godokono ukui hawakalimipa:tamo koko temeteme ba:ba ka:na kikalamenama:.”
Solo Ba:gala Alo Ibino Komo
Mak 9:50; Luk 14:34-35
13 Ba:bene Ya:suti gala na:kagoiya:, “La: ba: ba:moe hopoeno solo golalata, huiyatiya la:eno solo golate dalatidimini, eta lumagiti gala soloma: a:kamida:mene. Ba:be solo ba: kubanomoma: eda:, ba:bema: tawakaluba:te gobogobamo hola:minalete natamo komikimoelema:na:.
14 “Ba:gala eta komo, la: ba: ba:moe hopo konomoeno alolata, mabu hibila, haka hunulu ditana tawakaluba:te ba:be haba hidonomamo buminamena:. 15 Iyo, lumagiti ebeno wuiki alo pa:titi bagolo ipuwamo a:kihata:mene huiyatiya ebete hawakala baha:mo kihatema:ne, ba:bene ba:be alote genama gulu demedena ba:bi tawakalubi hiliyonomo ka:la:minalema:ne. 16 Ba: atu gabodo wadiyala la:eno alote komo tawakalubi na:la:minala:mene, ba:bene iba:te la:eno hidohido ododili komo ulamete la:eno Hunu Haboeno Nabiwi komilimihoma:na:.”
Godote Moseseko Ipuwado Tawakaluba:tamo Dikalamiya: Ba:bi Tutumu Taboeno Komo
17 Ba:bene Ya:suti gala na:kagoiya:, “La: hidamo nemalagidolala:, Godote Moseseko ipuwado tawakaluba:tamo dikalamiya: ba:gala ebeno ukui hawakalimipa:te ebeno Bukamo da:miya:tiya:, nale ba:bi hidohido Tutumu Tabo gobogobamo miya:tema: kapiya:ha:. Ao, eba ka:naha:. Nale huiyatiya ba:bi Tutumu Taboeno hibi komo hawakalimima: piya:mo. 18 Na la:tamo hibi tabo begoemo. Ba:moe hopo ba:gala alomo ibino ilinate tete ga:ga:nomolo ba pola:na Godokono Tutumu Tabote atumu ba:kapola:namena:, ibi hiliyonomo ipuwalo eta deha:potonomo tabote a:kalatida:mene. Iyo, Godote kebe tabo komokomo ebeno Bukamo da:miya:tiya:, ba:bi komate tawakalubi biya:tulamenakomena: ebeno oko hiliyonomo upula:le kuitita:mo! 19 Ba:bema: Godokono Tutumu Tabo hiliyonomo ipuwalo kebe lumagiti eta deha:potonomo tabo ubiha:ma: eda:te, ba:bene ebete komopi papamila:haha: komo diya:tulamemene, galane tetelo ebete Godokono Hunu Habalo deha:potonomoma: koneda:ma:ne. Huiyatiya kebe lumagiti Godokono Tutumu Tabo hiliyonomamo ba papamiwata komo tawakalubi atu komo ododilima: diya:tulamemene, ebete Godokono Hunu Habalo koma: koneda:ma:ne. 20 Ba:bema: nale la: begoelamemata, wadiyala la:le Godokono Tutumu iya:tulamepi ba:gala Pa:lisi kapiyuimipi ibino komo nemalagidolala:. Tawakaluba:te ibi tuputupupima: ga:lana, huiyatiya la:eno tuputupu emede komote ibino emede komo gogoloheno la: Godokono Hunu Habamo a:kana:pa:la:hamata.”
Tawakalubino Mauba Komo
21 Ba:bene Ya:suti gala na:kagoiya:, “Dopamo tetelo tawakaluba:te Godokono eta tutumu ba:ma ka:na diya:tulamenakui, la: uliya:mata. ‘Lumagi akanakapuma:la:. Pote eta lumagi danakapumimini, tawakalubino tabo anagilamelelamedawate ebetamo kuba huiya kikamema:ne.’ 22 Huiyatiya ba:ma tetelo nale eta tabo bekagoemo. Kebe lumagiti ebeno ekawitamo da:maubamene, tabo anagiya:midadawate ebetamo kuba huiya kikamema:ne, ba:gala kebe lumagiti ebeno ekawi diduduputimimini, Ka:nisolo dubate ebetamo kuba huiya kikamema:na:, ba:gala kebe lumagiti ebeno ekawi watohenoma: da:goemene, ba:be kuba mabuma: Godote ebe Koe Habamo konoemema:ne. 23 Ba:bema: ama: Godoko owatidoloenoma: hawa:goeno ilina patapatamo ba adahe ama: ukui hidamo ba:ma ka:na da:nelawemena:, ‘A:iye! Naeno ekawiti natamo na:maubana!’ 24 wadiyala ba:ba tetelo ama: amia:no malemale ilina ba:bamo na:miya:patepuya:. Ama: dopamo tote amia:no ekawi negelebadimiti, ba:bene ama: gala kapete ba:be malemale ilina Godotamo ba:bo na:pikamiya:.
25 “Ama:tamo da:maubana ba:be lumagiti ama: gabomani ko dubutamo da:magatamena:, la: ebetamo nuluhukuhino wadiyala ama: dopamo alaholodawago gelebadima: na:nediya:la:. Ama: ebe gelebadimihino, hibila, ebete ama: ko dubuino kokotamo konihatema:na:ta, ba:bene ko dubuti huiyatiya amia:no kuba anagiya:midamete ama: polisi dubutamo ba noeme, ama: du genamamo ba:bo kotoma:na:ta. 26 Na ama:tamo hibi tabo begoemo, ama: du genama gulu ba nemede, gabomani dubuti kebako tete huiyama: ama: da:kiyamemena:, ama:le ba:bako kuba huiya modobotenomo modobotete habamo gala kakapema:na:ta, huiyatiya ama:le ba:be huiya modoboteheno a:kuluhukamena:ta.”
Kamena Pilo Komo
27 Ba:bene Ya:suti gala na:kagoiya:, “Tawakaluba:te Godokono eta tutumu ba:ma ka:na diya:tulamenakui, la: uliya:mata. ‘Eta lumagino kamena pilolo akalawa:la:.’ 28 Huiyatiya ba:ma tetelo nale eta tabo bekagoemo. Kebe dubuti eta kamena umiti ubi ebetamo dihatemene, Godokono umi ipuwalo ebete ebeno tepo ipuwalo ba:be kuba ya:lo ododi. 29 Ba:bema: amia:no tu hapu baiditi ama: kuba gabamo demogabuimina, ama: magubutiti gobogobamo na:da:na! Wadiyala amia:no baiditi ba:ma tetelo alatidi, kubala galane tetelo Godote amia:no ape konomo Koe Habamo a:da:na! 30 Ba:gala amia:no tu hapu kokotote ama: kuba gabamo demogabuimina, ama: itamidate gobogobamo na:da:na. Wadiyala amia:no kokotote ba:ma tetelo alatidi, kubala galane tetelo ama:le ape konomago Koe Habamo to!”
Kamena Ibuki Komo
Ma:t 19:9; Mak 10:11-12; Luk 16:18
31 Ba:bene Ya:suti gala na:kagoiya:, “Ba:gala tawakaluba:te Godokono eta tutumu ba:ma ka:na iya:tulamenakuya:, ‘Kebe dubuti ebeno ubiha: tetelo kamena dibukimini, kubaha:. Ebete ebe ibuki tabo pepamo miya:tete ebetamo ikamelo ba:bo konoemema:ne.’ 32 Huiyatiya ba:ma tetelo nale eta tabo bekagoemo. Eta dubuino kamenate eta dubago kuba ododihino, ba:bene ebeno awiti ebe ubiha:ma: eda:te dito dibukimini, ba:be dubuti ko kuba kododima:ne, ba:bene ebete Godogodone kuba huiya hibilo kolawema:ne. Mabu ebeno kuba ododi komodo ebeno kamenate ba to eta dubu da:nelawemene, Godokono umi ipuwalo ibi netewapino ododi komote ba: pilo komoma: keda:ma:ne.”
Godokono Holoholo Hapulu Tabo Hibinomolo Goe Komo
33 Ba:bene Ya:suti gala na:kagoiya:, “Dopamo tetelo tawakaluba:te Godokono eta tutumu ba:ma ka:na diya:tulamenakui, la: uliya:mata. ‘Ama:le Godokono mahilamo kebe tabo dolamagihomena: ba:bi tabo hiliyonomo hibinomolo nododiliya:.’ 34 Huiyatiya ba:ma tetelo nale eta tabo bekagoemo. Ama:le komopa:tamo hibinomo tabo goema: dewagelemena:, iba:te amia:no tabo hibima: komidima: ama:le Godokono Hunu Haboeno mahilo akaka:ma:la:, mabu ba:be Haba talonama: eda:na, ba: Godokono emede bahila. 35 Ba:gala ba:moe hopo haboeno mahilo akaka:ma:la:, mabu ba:moe hopo atumu talonama: eda:na, ba: Godokono nato a:puti bahila. Ba:gala atumu Yelusalema ko haboeno mahilo akaka:ma:la:, mabu ebe ba: aeno Ko Gawadalagi Godokono habala. 36 Ba:gala amia:no tabo ulidawate amia:no tabo hibima: komidima:, ama:le amia:no mahilo akaka:ma:la: mabu ama: kodawaha:, iyo, ama:godolo helo kitanaha: amia:no kapiya kilikili hinibo keyakeyama: midi. 37 Wadiyala ama: huiyatiya amia:no tabo olamagi ipuwalo eta ilinoeno mahilo ka:mihino tabo hibilo ba:ma ka:na na:goiya:, ‘Iyo, na kododima:nemo,’ ba:gala keba tetelo ama: eta komo ododi modoboha:ma: deda:mena:, wadiyala ama: eta hibi tabo ba:ma ka:na na:goiya:, ‘Ao, na a:kododa:mo.’ A:iye! Komopa:te amia:no tabo hibima: komidima: ama:le amia:no tabo heluimima: eta tabo akagaa:la:, mabu ba:bako tabo olamagi komote Saitanagodone kopema:ne.”
Ama:tamo Kuba Dododinako Ba:be Lumagitamo Kuba Akododa:la:
Luk 6:29-30
38 Ba:bene Ya:suti gala na:kagoiya:, “Tawakaluba:te Godokono eta tutumu ba:ma ka:na diya:tulamenakui, la: uliya:mata. ‘Eta lumagiti amia:no baidi da:kubahimimini, ama: huiyatiya ebeno baidi kokubahimimima:na:ta. Ba:gala eta lumagiti amia:no lalo da:wakaa:midalemene ama: atumu ebeno lalo kowakaa:midalemema:na:ta.’ 39 Huiyatiya ba:ma tetelo nale eta tabo bekagoemo. Pote ama:tamo kuba dododinako ebe akaduhima:la:, ba:ma ka:na ebete ama: tu hapu tatakolo danagalimimina:, wadiyala ama: pele hapu ebetamo na:kikamiya:. 40 Ba:gala kebe lumagiti amia:no atuino ilina lawema: ubi ihatelo ama: tabo anagiya:mida habamo magatama: da:goemene, wadiyala ebetamo dito nikamiya: ba:gala ba:be atu tetelo amia:no sete ilina akamawada:la:, ama:le ebetamo malemalelo dito na:kikamiya:. 41 Ba:gala eta gabomani dubuti ebeno ilina kapiya kilomita tatalidopamo agatamema: ama: da:goememena:, wadiyala ama: kalakalago ebeno ilina netewa kilomita muhuludopamo aguti eba:go na:tuya:. 42 Ba:gala kebe lumagiti amia:no eta ilinama: ama: da:toemehomena:, wadiyala ama: ebetamo malemalelo nikamiya:. Iyo, etate eta tetelo ama:godone ilina lawete gala ama:tamo ikamema: da:kagoemene, wadiyala ama:le ebe nowalubiya:.”
La:go Alaholohopi Malemalelo Emalagidole Komo
Luk 6:27-28,32-36
43 Ba:bene Ya:suti gala na:kagoiya:, “Tawakaluba:te ba:ma ka:na diya:tulamenakui, la: uliya:mata. ‘Ama: amia:no hopodalagi malemalelo nemalagidolona, huiyatiya pote ama:go dalaholona ama:le ba:bako lumagitamo mauba kubaha:.’ 44 Huiyatiya ba:ma tetelo nale eta tabo bekagoemo. La:tamo dalaholohona, wadiyala la: ibi malemalelo nemalagidolenala:, ba:gala la:tamo temeteme dikalamena ibi Godotamo na:wadiya:paa:latelenakuya:la: ebete ibi hidamo kowalubilinama:. 45 Ba:mako ododi komodo la: Hunu Haboeno Nabiwino gugudima: beda:hanamata, mabu ebete ebeno hegeloeno alo ba:gala ebeno wegoloeno a:la:li kuba tawakalubi ba:gala tuputupu tawakalubi iba:tamo kapimilo pikalamenako. 46 Puya:te la: malemalelo demalagidolena, la: ba:bi tawakalubi kapiya demalagidolenama la:eno ukui keba ka:nala:ka:? Ba:be mabuma: Godote la:tamo hido huiya ba:kikalametamena:? Ao, mabu mani pilolo uwatepa:te atumu ibino mabulubi kapiya emalagidolenaka! 47 Ba:gala la: la:eno tawakalubi kapiyatamo hidohido komo dododilinama la:eno ukui keba ka:nala:ka:? La: ba:bi hidohido ododili ipuwado komo tawakalubi ba:ka:gogoleoma? Ao, mabu hibima: midiha:pa:te atumu ibino tawakalubi kapiyatamo hidohido komo ododilinaka! 48 Ba:bema: la:eno ododili ipuwalo hidonomamo nemedeniya:la:, la:eno Hunu Haboeno Nabiwi keba ka:nala:ka: ba:ba ka:na, mabu ebegodolo eta kapiya kuba kitanaha:.”