3
Ya:suti Kokoto Hapu Hoeme Dubu Da:hiduimiya:
Ma:t 12:9-14; Luk 6:6-11
Eta tetelo Yu tawakalubino baidi ibubulamehole genamamo Ya:suti gala da:kanodoluya:, kokoto hapu hoeme dubuti ba:bolo na:lutiya:. Ba:bene ba:be haboeno Pa:lisi kapiyuimipa:te Ya:suku baidi kodakodalo umitiya:, ebete okoha: talona hegelalo ba:be lumagi hiduimilo iba:te ebe kubadawama: koga:lama:. Ba:ba tetelo Ya:suti kokoto hapu hoeme dubutamo na:goiya:, “Ama: mahigate, mamo na:pa:.” Ba:bene Ya:suti ba:be napa:tamo na:goiya:, “Aeno tutumu tabote kebe talona komo kiya:tua:mena? Ale okoha: hegelalo hido komo o kuba komo ba:kododima:? Tawakalubi ba:ka:hiduilamema: o ba:ka:kubahilamema:?”
Iba:te huiya tabo kaga:luya:ha:, ba:bema: Ya:suti maubate ibino wato kodakoda komo umilamete, ba:be mabuma: ibi tepo menemena:go ba ulamehole ba:be dubutamo na:goiya:, “Amia:no kokoto na:hogamina,” ba:bene ebete kokoto da:hogaminuya: ebeno kokotote ba:bo hiduya:. Ba:be mabuma: Pa:lisi kapiyuimipa:te maubahago tolamete, ba:ba tetenomolo iba:te Ko Gawadalagi Helodikono kapiyuimipa:go tabo ba:bo nega:luya: Ya:suku anakapumima:.
Hiliyonomo Tawakaluba:te Ya:suku Umima: Da:pelamiya:
7-8 Ba:ba tetelo Ya:suti ebe ta:matapa:go Ga:lili Bobamo gala na:katuya:, ba:bene Yu tawakalubi hiliyonomate ba:be komo uliti iba:te Ga:lili hopone, Yudiya hopone, ba:gala Yelusalema ko habane pelameholete ebe ba:bo ta:matuya:. Ba:gala komo tawakalubi hiliyonomate hiya:hiya: muhulu hopone atumu a:kapelameholiya:, ba:ba:te Idumiya hopone, Yodane Tuli hapuni, Taya ko habane, ba:gala Saidono ko habane pelameholiya:. 9-10 Ba:bene ibi ipuwalo Ya:suti temetema:gopi hiliyonomo da:hiduilamiya:, komo temetema:gopi hiliyonomate ba:be komo ba iya:tawaha ebe ologihoma: emokatihuilo da:pelamiya:, ba:be mabuma: Ya:suti ebe ta:matapi na:goelamiya: iba:te boge kadahemema:, ba:bi tawakaluba:te ibino emokatihui komamo ebe kubahimikapoma:.
11 Ba:ba tetelo kuba gobogobagopa:te Ya:suku duminakui, iba:te ebeno nato mabamo da:pegudinakui ga:ga:lo na:ga:lanakuya:, “Ama: ba: Godokono Gudulata!” 12 huiyatiya Ya:suti ibi koamo kiyahalamenakui, mabu ebe ubihinola iba:te ebeno komo hawakalimi.
Ya:suti Ebeno 12 Oelamepi Dubu Da:ka:lamiya:
Ma:t 10:1-4; Luk 6:12-16
13 Ba:ba tetelo Ya:suti eta haka hunamo da:nodoluya:, ebete ebeno ubi tawakalubi ebetamo peka:lamiti, iba:te ebetamo ba:bo tolamiya:. 14 Ba:bene ebete ibi ipuwalo 12 dubu uwatete iba:tamo na:goiya:, “La: ba: naeno oelamepilata. Nale la: buwatemata la:le nago kemedenama:, ba:bema: nale la: Godokono tabo olamagimima: koelamema:nemata, 15 ba:gala na la:tamo helo kikalamema:nemata la:le kuba gobogobo tawakaluba:godone konoelamema:.”
16 Ya:suti 12 dubu duwatiya:, ba:moi ba: ibino mahilola.
Saimonoko, Ya:suti ebetamo eta Pita mahilo bikamiya:.
17 Sebedikono gudu Ya:imesiko ba:gala ebeno ekawi Yoneko, Ya:suti ibi netewapa:tamo Bowanagese mahilo bikalamiya:, ba:be mahiloeno ipuwa ba: ‘Alomo Ga:lawata Dubula.’
18 A:nduluku ba:gala Pilipiko,
Batolomuku ba:gala Ma:tiyuku,
Tomasiko ba:gala A:lapiyasikono gudu Ya:imesiko,
Ta:diyasiko ba:gala Saimonoko. Ba:moe eta Saimono ebe ubila kapela Loma gabomani tawakaluba:go ba alaholo iba:te ebeno Ka:inane hopo ba:bo komiya:pama:.
19 Ba:gala Ya:suti Keliyotanapi Yudasiko atumu a:kalawiya:, ba:moe dubu ba: galane tetelo Ya:suku anakapumipi dowalubiliya: ba:be dawala.
Ya:suku Ba:gala Biyelesibuluku*Biyelesibuluku ba: Saitanakono eta nopodawala, ebete Yu tawakalubino hopolo Saitanakono hopodawama: eda:nami, atumu Tabo tawakalubino hopolo Galega:ko bemedena. Ibino Komo
Ma:t 12:22-32; Luk 11:14-23; 12:10
20 Ba:bene Ya:suti genamamo da:tuya: tawakalubi hiliyonomate ebetamo pelamete gala eba:go da:kapekapiyuya:, ba:bema: Ya:suku ba:gala ebe ta:matapi baa: nahama: kamodobuya:ha:. 21 Ba:ba tetelo ebeno ekaka:te ba:be komo uliti ebe adabuima: ba:bo tolamiya:, mabu tawakaluba:te iba:tamo ba:ma ka:na ga:luya:, “Ebe daedaela.”
22 Ba:bene Godokono Tutumu iya:tulamepi Yelusalema ko habane da:pelamiya:, ba:bi dubate na:pega:luya:, “Biyelesibuluku ebegodolo bemedena, iyo, ebete kubakuba gobogoboeno Kodawoeno heloamo oelamenako, Godokono heloamoha:!”
23 Ba:bene Ya:suti tawakalubi ebetamo ka:lamiti komo uwi ba iya:tulame na:goiya:, “Saitanate ebeno kubakuba gobogobo lumagigodone ba:koelamemene? Ao, a:koelama:mene. 24 Numa:la:, haba kapiya tawakaluba:te tetedo dadikanalemena: ba:be habate kokubama:ne, 25 ba:gala genama kapiya tawakaluba:te tetedo dadikanalemena: ba:be genamanapa:te a:kemedenamena:, ibino genamate ba: atumu kakakubama:ne. 26 Ba:bema: Saitanakono ukui ba:ma ka:nala, ebete ebeno kubakuba gobogobo tawakaluba:godone a:koelama:mene, mabu keba tetelo ebete ba:ba ka:na dewagelemene ebeno oko owati helote kowiboma:ne, iyo, ebeno kuititi bitana.
27 “Numa:la:, Saitanako ba: eta helo dubu keba ka:nala:ka: ba:ba ka:nala, ba:gala ebete pilolo duwatiya: ba:bi tawakalubi ba: ebeno genamoeno ilinala. Ba:bema: tawakaluba:te ba:mako helo dubuino genamamo ogomote ebeno ilina uwatemema: ubi dihatemena:, iba:te dopamo ebe hala:mo matuhumihote, ba:bene ebeno ilina ba:bo kuwatemema:na:.
28 “Na la:tamo hibi tabo begoemo, tawakalubino hiya:hiya: hiliyonomo kuba komo Godote egebolelamete adodohole iya:tawala, ba:gala tawakaluba:te Godoko ubiha:ma: da:ga:lamena:, ba:bi kuba tabo komokomo Godote egebolelamete kadodoholelamema:ne. 29 Huiyatiya kebe lumagiti Godokono Gobogoboeno ododi komoma: kubama: da:goemene, Godote ba:be lumagino kuba egebolemete a:kadodomenamene, ebete emedena tetelo ebe kubadawama: ba:goenakomene.”
30 Ba: hibila, ba:moe komo Ya:suti goiya: mabu ba:bi tawakaluba:te ebeno komoma: ba:ma ka:na ga:luya:, “Ebe kuba gobogobagoenola.”
Ya:sukunu Menoko Ba:gala Ebeno Ekaki
Ma:t 12:46-50; Luk 8:19-21
31 Ba:bene Ya:sukunu menoko ba:gala ebeno ekaki iba:te ebe umima: da:pelamiya:, iba:te genama tamelo ba pela:mota:hana, ebete iba:tamo pema: tabo ba:bo noemiya:. 32 Ba:ba tetelo tawakalubi hiliyonomate Ya:suku tamelo na:pola:nuya:, ba:bene iba:te ebetamo na:ga:luya:, “Numa:, amia:no menoko ba:gala ekaki iba:te genama tamelo ba:pepola:na. Ibi ubila ama:.”
33 Ya:suti iba:tamo na:huiyuya:, “Naeno menoko potela:ka:, ba:gala naeno ekaki puya:tela:ka:?” 34 Ba:bene ebete tawakalubi ebe tamelo da:pola:nuya: ulamete na:goiya:, “Ba:moi ba: naeno menokobila ba:gala naeno ekakila. 35 Pote Godokono ubi komo dododimini, ba:be lumagi naeno menokola ba:gala naeno ekawila.”

*3:19: Biyelesibuluku ba: Saitanakono eta nopodawala, ebete Yu tawakalubino hopolo Saitanakono hopodawama: eda:nami, atumu Tabo tawakalubino hopolo Galega:ko bemedena.