15
Godote Kuititi Sa:ba:ni Koko Temeteme Hopo Habamo Da:poelamemene Ba:be Komo
Ba:bema: naeno baiditi hiya:ma: deda:hanami ba:be komote wiboheno, nale Godokono Hunu Habalo eta konomo hanohano komo ba:ma ka:na umimo, ebeno sa:ba:ni nopopa:te hopo habanapa:tamo sa:ba:ni koko temeteme komo kikalamema: ba:bolo la:mota:hanuya:. Hibila, iba:te kuititi tetenomolo hopo habamo ba:bi temeteme komo poelame da:wibomene, ba:ba tetelo Godokono konomo mauba komote atumu kowiboma:ne.
Ba:bene nale a:la:mina beya bobo konomote ditanui ba:bo umimo, ba:be ipuwane hegela a:la:wa:hiya komate ikulihuya:, koe keba ka:nala:ka: ba:ba ka:nala. Ba:gala ba:be beya bobo tamelo da:la:mota:hanui, nale ba:bi hibima: midipa:te Godokono dolopo ibino kokotolo pola:lama:nalo kulamimo, ba:bi tawakalubi ba: puya:te Hiya:nomo Holoholo Ilinoeno wato kikipo da:lawiya: ba:bi tuputupupila, iyo, ba:ba:te alaholoho ipuwalo ba:be Ilinoeno holoholo ida:da:li ba:gala ebeno mahiloeno 666 naba a:kubahilamiya:. Ba:bema: Mosesete kebe ohale ebeno oko namutudawa Godoko adikumima: dododiya:, ba:be ohale ba: atumu Sipi-goe Deha:potoeno ohalela, ba:bi tuputupupa:te ba:be ohale ba alapiho ba:ma ka:na ga:luya:,
“Kodawa Godo, ama: ba: Helonomodawalata!
Ama:le kebe koko komo dododilina
ba:bi komo ba: hanohanohibinomola!
Ama: kapiya ba: emedena teteno Ko Gawadalagilata!
Amia:no ododili gabo
ba: tuputupunomola ba:gala hibinomola!
O Kodawa, ama: kapiyate Hido-talona Dawama: eda:nata,
ba:bema: hiliyonomo tawakaluba:te ama: tolemelo
amia:no mahilo hunamo badipatenakomena:!
Iyo, amia:no tuputupu ododili komo
hopo habanapa:tamo a:hawakalilamiya:ta,
ba:bema: hiya:hiya: hoponapi hiliyonomate
ama: adikumima: kopelameholema:na:!”
Ba:bene ba:be komo da:wibui, Godokono sipi-goe tama alokoa:mida Talona Genamate Yunapino iniwala:godolo da:la:nami, ba:be Genama nale Hunu Habalo ba:ma ka:na umimo, ba:be Genama tetenomolo ditana ba:be Talonanomo Haba Godote dito a:hiya:midui. Ba:bema: puya:godolo helo ditanui sa:ba:ni koko temeteme hopo habamo kopoelamema:, ba:bi sa:ba:ni nopopa:te Talona Genama guni ba:bo pikuliya:, ibi alonomo hidohido kaliko pupulila, ba:gala ibino bodolo tetelo da:pola:lama:nui ba:bi kawali ba: huiya kokonomo ilinala. Ba:bene Godokono netewa-netewa Hiya:nomo Nopopi ipuwane eta kapiyate ba:moi sa:ba:ni nopopa:tamo puluhukuti iba:tamo sa:ba:ni golodo kalili dito pikalami, ba:bi kalili ba: emedena tetelo demedena ba:be Kodawa Godokono konomo mauba komamo tabuilamela. Ba:ba tetelo Godokono konomo alo ba:gala ebeno helote ebeno Talona Genama ba tabuimi ahutate konomamo ba:bo odolui, ba:bema: hibila, sa:ba:ni nopopa:te hopo habamo koko temeteme da:poelamemena:, ba:be oko iba:godolo upula:heno etate ba:be Talona Genama guamo a:pa:ga a:kamodobamene.