5
5:1-5 Namonde God Da Mandi Iesu Ava Tumonduse, Fakina Arera.
1 God Genembo dirigari furare dae sisira amo, Iesu ri. Geka ava, mave tumonderaira amo, nu God da mandi o gagara edo irira. A mave genembo eni ava dubo barira amo, nu genembo ainda sasingu barago dubo barira. 2 Avori, namonde God dubo ruruse, nunda Geka a Agho Dari kaifa arera amo, namonde kasama arera, namonde nunda sasingu barago dubo ruruse irarera. 3 Kotugo, namonde God dubo buraera ava, nange ijugururoro isagha ari gaeteri? Namonde emingaore! Namonde nu dubo ruruse, nunda Geka a Agho Dari kaifa use irarera. A nunda Agho Dari namondekena jo fakarago iraeri. Namonde ari da kaugori. 4 Ai resira amo: God da sasingu, ne irari eko enda eminda irira ainda fakina ava, nene de atai fati fetari sarera amo, inono arira. Ne Iesu Keriso tumonduse, amingarera. 5 Iesu nu God da Mandi ava, mave tumondarira amo, nu nusukako irari eko endada irira ainda fakina ava, de atai fati fetarikena barago, inono arira.
5:6-12 Emboro God Afakena Amo, Iesu Numori. Emboro Eni Tefori.
6 Iesu Keriso fusira, resena emo, nu uvu ororoghae fusira. Nunda tano uvu ororoghae aimi, ijugetiri namonde kasama erera: nu God da Mandiri. Nu jo uvu vanemboimi furaeri. Nu nange nange uvuimi bafataito usira, a nange nange nunda ororo avereguse ambududurusira ava gido, namonde kasama erera: nu God da Mandiri. Kotugo, Iesu mo, nu God da Mandi ava, God da Asisi barago namondekena ijugeraira. Ainda beká mo: geka beká da susu, amo God da Asisi numori. 7-8 Ava sedo, tano isambu etodaba naká aimi ijugeraira amo, Iesu nu God da Mandiri. Tano setena amo, God da Asisi, a uvu ororoghaeri. A nenda ijuga mo, jo nunda nunda iraeri, dabakori. Amo, Iesu nu God da Mandiri. 9 Avori, namonde evetu genembo da osa sari ava tumonderaera; ava sedo, namonde God da osa sari barago tumondaeteri. Ainda beká mo: God da geka fakinaghaeri. O evetu genembo da geka mo, jo amingo iraeri. Ava sedo, tano etodaba naká setena ava, God nune tofo mandi nunda Mandi Iesu dae ijugetiri isagha usira; ava sedo, tano rea ijugeraira ava, namonde tumondarera. 10 A mave God da Mandi tumondarira amo, nu nunda dubo jokáda evia itatamarira: tano rea ijugeraira amo, geka bekári. O mave God da osa sari evia jo tumondae arira amo, nu inono, God gungubo sariá sarira. Ainda tuka mo: God nu tofo mandi rea nunda Mandi dae sisira ava, gungubo sariá sise, nu jo tumondae eraira. 11 God nunda Mandidae rea sisira amo, eviri. God namondekena jebuga evovodae irari futusira da susu mo, nunda Mandiri. 12 God da Mandi, mave bu nunda dubo jokáda fitari nune kaifa ururari irarira amo, jebuga resena emo, nu anakora budo irira. O mave God da Mandi jo bae arira amo, nunda jebuga barago, jo bae arira.
5:13-21 God da Sasingu, Nenda Irari Kau Emingori.
13 Ne mave God da Mandiá tumonduse, nundae javono gateraeva, nemokena resena, ningivu! Ne aminge tumonduse, anakora jebuga evovodae irari torughe ruruseva ava itatamedo, kasama e gogoghombaovo dae sise eregefena. 14 Namonde God da dombuda fetedo, tumo faingharera. Ainda beká mo eviri: namonde kasama erera, namonde God da uju ava ari dae kotise, rejodae benunu sarera amo, nu ningarira. 15 Kotugo namonde sifo reda banungarera amo, nu anakora dengoro jave ningarira. Avori, namonde ava kasama use itatameraera: namonde rejodae benunu sarera amo, nu anakora mutari barera.
16 Namonde ari ekoko mendeni mendeni use, jo ambae arera. Ninda namendi eni ari eko eni ururari garesa amo, ninda namendidae sise, God kena banungaso ningido, nunda jebuga ninda namendikena mutarira. Avata ari eko eni irira, ava use irarera amo, namonde sifo gombuda ambari ava torugharera. Ninda namendi, ari eko resena evia ururari garesa amo, jo nundae banungaso dae sae arena. 17 Ari ekoko isasambu mo, ekokori. Avata setena, daba ava sari dae erena. Ari ekoko isasambu eraera amo, namonde dara God da dombuda eraera. Avata ari ekoko mendeni mendeni use, jo ambae arera.
18 Eregoseva: namonde kasama erera, God da sasingu ne jo ari ekoko use irae arera. Ainda beká mo: God da Mandi kaifa ururari, Satan jo foa ne dederururari ari ekoko use irae arera.
19 A namonde kasama erera: evetu genembo a reighi isambu endada irera amo, Satan da sari ningariri. Avata kotugo, namonde kasama erera: namonde mo, God da tofori. Yari budo givu!
20 A kotugo, namonde kasama erera: namonde God beká ava kasama aoro dae sedo, God da Mandi fira namondeda munju afigetiri dubo koteraera. A namonde oroko God de dabade tatedo irera amo, namonde nunda Mandi Iesu Keriso barago namonde tatedo irera. Amo jo bunae arera. Numo God beká, a nu jebuga evovodae irari da susuri. Yari budo givu!
21 Nanda sasingu, ove kevari a gode mendeni mendeni gi darigedo ghevu! Erá tumonde baingheove dae resena. Yari budo givu!
Avori, nanda geka tano eviri.