Hebrew Embo (O Israel Embo Seraera), Nemokena Reta Gefusera, Amo Eviri.
Buku emo, ghaeko 60-70 A.D. ainda joká aminda, Paul o genembo eniimi gefusira. Nu Israel embokena gefusira. God giti nemokena emboro+ eni nange yama numokena buvaetera, ava afigedo ijugusira. Emboro+ manai amo, Agho Dari kaifa ari da emborori. Avata buku einda jokáda, genembo buku gefusira aimi, emboro+ seka God afigusira, aindae gefusira. Emboro+ seka amo, God setiri Iesu ambiri, nunda ororoimi emboro+ seka afigusira. Buku einda jokáda resira: emboro+ seka ya God kena buvari amo, emboro+ eveva bekári. Emboro+ manai amo jo emboro seka amingo iraeri. Ava Israel embo isambu kasama aoro dae sedo, buku emo gefusira.
Reta Hebrew Embo (O Israel Embo Seraera) Nemokena Gefusera, Ainda Mendo Mendo Mo Eviri.
1:1-3 Genembo mave reta gefusira aimi, nunda natofo Israel embo ategi usira.
1:4—2:18 Keriso mo, nu teriari; o aneya mo, ne veveyakori.
3:1—4:13 Keriso mo, nu teriari; o Moses nengae Joshua ghae mo, ne veveyakori.
4:14—7:28 Keriso nu fristi+ iká bekádari. Fristi+ mendeni mo, jo numongo iraeri.
8:1—9:28 Emboro+ ya God kena buvari Iesu afigusira amo, eveva bekári. Emboro+ manai amo, jo amingo iraeri.
10:1-39 Keriso nunda ororo futusira amo, fakinago bekári. Joba mendeni God kena mutudo ghusera amo, jo amingo iraeri.
11:1-12:29 Namonde tumonduse, God da natofo anakora God tumondedo ghusera, ainda amboda amboda aoro dae sise sisira.
13:1-25 Genembo reta gefusira aimi, geka mendeni mendeni sise, ari eveva aoro dae sedo, tano usira.
1
1 Anakora beká, God namondeda abuamanekena ari mendeni mendeni use, a geka mendeni mendeni sido fusira. Nu ferovetakena geka seari, ne budo namondeda abuamanekena ijugedo ghuseri. 2 Avata oroko ava, nu tofo nunda Mandi dirigetiri ojighira, nunda geka namondekena siri niningerera. Nunda Mandi resena einda fakinaimi, God setiri utu a enda sirorusira. God nunda Mandi mo, sifo amboda roera isasambu, nunda tofo are dae sedo, nune gategusira. 3 Mandi aikena, God da duro a usasa janimberaira. Kotugo, God irira ainda gari kau daba ava, nunda Mandikena irira. Jo dombu eni iraeri. Mandi ainda geka mo, fakinaghaeri. Aimi, nu utu a enda bu jighirise kaifa eraira. Nu evetu genembo da ari ekoko seghe fugutusira ainda amboda, nu utuda vitíra, God Durode ainda ungo gimandukena anumbusira.
1:4-14 God Da Mandi Mo, Nu Teriari, O Aneya Mo, Ne Veveyakori.
4 Aindae sedo, God nunda Mandi da javo tomanako jijighusira. Aneyamane da javo jijighusira amo, veveyakori. Kotugo geka bekári: God da Mandi mo, nu teriari, o aneyamane mo, ne veveyakori. 5 God nunda Mandikena eminge sisira:
“Na Nimamori, orokoá ni nanda Mandi etesi.”
A eni mo eminge sisira:
“Na numamori, a nu nanda Mandiri. Ava saono isagha arira.”
Geka resena emo, jo aneya enikena saeri. Geka emo nunda Mandikena sisira. 6 Eni mo: God nunda Mandi bego enda eminda sirorare dae sedo, dirigari dae use, eminge sisira:
“Nanda aneya, ne isasambu numoá tumonde bainghaoro dae resena,”
nunda Mandi dae aminge sisira. 7 O aneya mo, ne nunda Mandi da duruda irera. Ava ijuguse, nendae eminge sisira:
“Nanda aneya, yaura da kakaugo ava simbugeteno irera.
A nanda saramana kakato, avaraka bubura da kakaugo ava simbugeteno irera,”
aneyadae aminge sisira. 8 Avata nunda Mandikena, God eminge sisira:
“Ni God ri. Nine bajari edo, evovodae ninda natofo kaifa use iraresa.
Ni geka beká sise a ari beká avanembo use, ninda reighi a natofo kaifa use iraresa.
9 Ni geka sembae a ari ekoko ava imboe use, geka eveva a ari eveva avanembo uju eraesa.
Aindae sedo, God ninda God, nane ni gategedo, ivuga aso dae sedo, bino mindafugo nimokena futuseni.
Ninda bino mo mindafugori, kokomana da bino jo ninda amingo iraeri.”
10 A geka eni mo, nunda Mandi rea usira a rea arira, aindae eminge sisira:
“Bajari, giti beká giti, ni enda eteso sirorusira. A ni tofo ninda fakinaimi, utu eteso sirorusira.
11 Utu endaghae manjarira, avata ni evovodae iraresa. 12 Kau embo boka manai ari seka buraera aminga ava, utu a enda manai edo, bakomba ari gido, gaghe esike fitido, utu a enda seka aso sirorarira.
Avata ni jo kau eni ae aresa. Ni kau daba ava iraresa,”
God Afa nunda Mandikena aminge sisira. 13 Avata nunda aneya enikena jo eminge saeri:
“Viti fu, nanda ungo gimandukena anumbe
kaifa ururaso, na ninda gitofu sandi
bundedo, ninda ata duruda fitono fafasaore.”
Geka amo, jo nunda aneya enikena saeri. Nu nunda Mandikena sisira. 14 Ava sedo, aneya resena ainda susu mo, rejori? Ne asisi kau eniri. Ne God sonemberaera, a God ne dirigeari foama, evetu genembo sonemberaera. God evetu genembo mavejoá gategedo, jebuga evovodae irari ava baoro dae sedo sisira ava, aneya maneimi sonemberaera.