7
God Nange Evetu Genembo Inonoda Ijujaetira, Ainda Benunuri.
1 Arie Bajari, nanda God, na nimokena ambo sose fetari dae refena.
Mave na ondi dari dae erera ava, na saghimbe bu, darigaone!
2 O jo sonembae aresa amo,
nanda gitofu raiyoni (lion) da kaugo use,
na bu ya sonemba irae vasa aminda gambu torere tarere ghaoro ambarena.
3-4 Arie Bajari, nanda God, nanda komanakena dara o aito aetena,
o susu tefo nanda gitofu sosighi aetena,
avavaga aetena amo,
5 ninda ghabu sokinimbe, gitofuimi na ondi sandi budo,
atai fati gitoro fonja dikai gambu fase ambaeteni.
6 Arie Bajari, nanda gitofu dubo ekoko use, namokena isoro ari dae erera.
Ava sedo, ere fetedo ninda janje eko da fakinaimi sorega fumbaetesi.
Arie God ere, na soraetesi! Inonoda ijujaso dae resena!
7 Aminguse, evetu genembo isambu bu fu tatedo,
ukuge gosuse, kaifa ase!
8 Bajari nine fu, endada natofo isambu ijujase!
Arie Bajari, na ijujaresa amo, nanda eveva mavego eregosesa ava kotaetesi.
Arie, God Iká Bekáda, na dara eni jo ae ava kotise, nandae “eveva” saetesi.
9 Arie, God evevago a numo beká nimori.
Namanenda kotari a uju ava gosuse ijujeraira da God barago nimori.
Evetu genembo ari eko eraera amo, se doyore!
Aminguse, ari eveva embo ava sonembe!
10 God Iká Bekáda amo, nanda bereri.
God daba aimi, mave nunda geka ningiraira ava, sonemberaira.
11 God nu bekáda bekáda ijujuse,
ari ekoko embo da mino sifo evia inono muturaira.
12 Nenda ari ekoko jo doyae arera amo,
God nemoa dari dae sise, nunda kaiya vegedo,
nunda feva jighi otombe asi bu asugedo,
13 isoro da ambi goroba simbugedo,
feva da goroba mendo buburaghae aimi kato arira.
14 Givu! Ari ekoko embo ne ari eko da emboro rerebuse irera, kotugo, dara use komana derari dae sedo manaka garuse irá gheraera.
15 Avata nenda geka gunguboimi evetu genembo mendeni deraetera aimi, jovereghedo nemoa gambarira.
16 Ainda mino ava buraera.
Kotugo nenda dara eraera ainda bouvu ava jovereghe nemokena asugeraira.
17 Bajari dambu ijujuse, bekáda bekáda mino muturaira aindae, aiyakoe resena.
Na Bajari Iká Bekáda aikena yaruimi didivuse sakai sarena.