27
God Dae Sakai Sari Da Banungariri.
1 Bajari nu nanda usasa a nanda sonemba ava, nune edo irira.
Na jo mavedae oju ae arena.
Dara dombu eni dombu eni namokena foa ghaetira avata, Bajari nune kosegedo na sonembeari,
sifo evia inono na jo oju ae eraena.
2 Ari ekoko embo isoro ari dae beje buvudo, namo dari dae kato eraera amo,
ne ata dimbeari duraera.
3 Isoro embo dabade tatedo isambu aimi, foa na jimbe birurugharera amo,
na jo oju ae arena, na taká God tumonduse irarena.
4 Roera dabako aindae, Bajari kena benunu sido refena.
Dabako aindae, na uju beká ava eraena.
Amo eviri. Na nange enda eminda jebuga irise,
sifo ghousa Bajari da kamboda iraeteni!
Aminguse, na nunda eveva ava itatamuse, benunu saono, nu nandae dengoro indaeti!
5 Dara da sifoda, nune gagara ari, na numokena ambo sose fetarena.
Nunda Kambo Kakara aminda, na kaifa ururari eveva irarena.
Na kaifa use, nune na ghamana mindafu ainda etoda fitari fetedo, gitofudae jo oju ae arena.
6 Aminguse, nanda gitofu namoá jimbe birurugheraera ava,
nane dedo atai fati fetarena.
Na ivuga use koko sise, joba nunda Kambo Kakara jokáda mutarena.
Na yaru didivuse, Bajari dae sakai sarena.
7 Bajari, na kori nimokena sarena amo, ningaetesi!
Nanda benunu ningido, joka edo mino use sonembaetesi!
8 Ni eminge sisesi, “Fu, nandae tumonde bainghase!” aminge sisesa amo,
nanda ghamo eretiri, mino eminge siseni, “Bajari, na erenare!”
9 Erá namokena jungeose!
Erá namokena janje eko eose!
Erá dirigeóso ninda saramana kato esike yeure!
Arie, Bajari, nanda sonemba kato, ni nanda sonemba edo iriasi.
Erá oroko na dodo dumbudo yeose!
10 Nanda aya afa na dodo dumbudo yarera,
avata Bajari mo, nu na kaifa use irarira.
11 Bajari, ninda uju, na rea aono dae seraesa ava, namokena ijugaetesi!
Ijuguse, giti jijighururu, erá nanda gitofu digari foa namo tambeore dae sise,
nangae emboro evevada deinghaore!
12 Erá na doyeóso, gitofu nenda uju namokena eore!
Ainda beká mo: nanda gitofu foa nandae gungubo sise,
namokena katiyavara eraera.
13 Na kasama erena, na jebuga irono,
ni kavevera ururaso,
na gosuse irarena.
14 Bajari tumonduse irivu!
Numoa tumonduse, erá bunarigo eove!
Bajari tumonduse irivu!