31
Mema Jokáda Irise God Da Sonembadae Tumondaore!
1 Arie, Bajari na ambo nimokena sose fetari refena.
Erá doyeoso, gitofuimi na dereore!
God ari dambu beká ari kato nimori, ágido namoa gitofukena bu darige!
2 Na nange resena ningi!
Oroko nembo tavaraghe fu, sonembaso jebugaone!
Nanda ambo sose fetari vasa nimori, ava sedo na gagara e!
Nanda sorega kato aso jebugaone!
3 Beká resena, nanda ambo sose fetari vasa, a sorega kato nimori.
Nine nanda emboro ijuguse, giti bu iruraso,
yaono dae beka gagojusesi. Aminguse, iruru yaone!
4 Erá doyeóso, vagho nanda bega se fifitusera, aminda yeóne! Ainda beká mo, nanda jungari vasa nimori.
5 Tofo nanda jebuga nine tavo aso dae sise,
ninda ungoda fifiterena.
Arie Bajari God, ni rea seraesa, ava eraesa.
Ava sedo, na sonembaso jebugarena.
6 Evetu genembo ove mane a god beká irae
tumonde bainghuse irá gheraera ava,
ni gari beghagha beká eraesa.
Avata namo, nanda tumondari Bajari nisuka nimokena fifituse irá gheraena.
7 Ninda dubo bari teriago aindae, ivuga use, riria arena.
Na mema itatama urureono, ni giraesa.
Nanda ghamo jokáda bouvu itatama eraena, ni kasama eresa.
8 Ni na jo doyaso gitofui sandi bu yaeri.
Na emboro evevada fiteso, dubo jamaghae ya foa gheraena.
9-10 Arie, Bajari, nandae joka e! Ai resira, na dara beni.
Na sorara teria futo use, diti kokoi edo yaya resira.
Nanda etu jorujara ghetiri, gevei use, ambari dae urogho erena.
Ainda susu mo, nanda irari isambu memai janje gagojururari,
na jivu menjuga gutise, gofeteni.
Na dubo mema use, fakina dadabetiri rojeteni.
Na geveiimi etu goghorogo erena.
11 Nanda gitofu isasambu, kotugo mokogo mo nanda nano namendi barago nandae seraera,
“Foká tamonda!”
O nanda kokomana mendeni na emboroda tamburaera, nandae oju sumburaera.
12 Ambari embo kotae eraera aminga ava, evetu genembo isasambu na kotae useri.
Namoa kau sena fugari guseri.
13 Beká resena, nandae gitofu use, isi basi sirureoro ningiraena. Tingu tanga isambu gitofu vanembori.
Ne nandae osogo use, namoa ufena daoro ambono dae manaka eregarera.
14 Avata, Bajari, nanda God nimori. Ava sedo, nanda tumondari isambu nimokena fifiterena.
15 Na sifo ghousa ninda kaifada irá gheraena. Namoa sonembedo, nanda gitofukena bu darige! Mave nandae mema erefutera aikena, bu darige.
16 Na ninda saramana katori. Nandae mendo vivi use, kavevera e!
Ninda dubo bari udo refesa aimi, na sonembe jebugaone!
17 Arie, Bajari, ninda sonembadae kori resena. Ava sedo, erá doyeoso na meka geone!
O ari ekoko embo mo, do meka gaore! Nenda beka jighi gotaso guga use ambudo,
ambari embo da vasada yaore!
18 Gungubo kakato isasambu da beka jighi gotaso guga aoro dae resena. Na, ivuga kakato mave meka irae tamoi tamoi use, evetu genembo eveva dere jise, jijivu seraera, aindae resena.
19 Arie, evetu genembo ni igheghi use, irá gheraera ainda e simbugari eveva nanjogo fiteso irira!
Amboda mutaso barera.
Ninda natofo ni tumonderaera,
ava nine gagara edo tavo use nemokena eveva eraesa ava,
evetu genembo isambu kasama eraera.
20 Evetu genembo mendeni ninda natofo daoro amboro dae manaka gayeraera aikena,
nine bu, ninda jungari vasada fitaresa.
Gitofuimi nendae jijivu ekoko saetera aikena,
ne nine bu darigedo, ninda sasoro eveva aminda jungaresa.
21 Bajari dae sakai saore! Gitofui na dari dae sedo,
jimbe birurughusera, avata, nunda dubo bari tomanakogo bekáimi
namokena ijuguse, na sonembetiri jebuguseni.
22 Na nune ondari nunda dombu do darigariá kotise, oju useni.
Avata, nunda sonembadae kori seteno ningido sonembusira.
23 Mave Bajari tumonderaeva, nemokena resena ningivu!
Numoa dubo buvu! Evetu genembo numoa tumonderaera ava Bajari nune gagara eraira.
O ivuga kakato, aikena reju baetera, ava mutarira.
Amo nu mema mutari itatamarera.
24 Ne maveju maveju Bajari gigituse ireva, nemokena resena.
Ghamo gambari fakina eve!