34
God Da Sonembadae Sakai Saore!
1 Na sifo evia inono, God kena aiyakoe sise irarena.
Na nundae sakai sise irarena, sifo nanjigo aminda nundae sakai sari jo doyae arena.
2 Nu rejo nandae usira ava kotise, nundae sakai sise irarena.
Evetu genembo mave gitofuimi deoro dara jokáda irise mema itatameraeva amo nembarago, nundae sakai sirurono ningido, ivuga evu!
3 Bajari nu teria beká ava sedo, ne na sonembedo, Bajari da bino aindae osa sise sakai saore!
Nunda javo aindae sakai dabade saore!
4 Na Bajari kena benunu seteno ningido, na vujegetiri,
nanda oju isambu dadabe tefo usira.
5 Evetu genembo mave gitofuimi deoro,
dara jokáda irise mema itatameraera amo,
ne Bajari kena dombu fainghedo ivuga eraera.
Aminguse, ne jo sifo nanjigo aminda dubo mema ae arera.
6 Evetu genembo fakina tefo embo aimi, numokena kori seoro, nu ningiraira.
Ningido, ne dara ainda jokáda ava sonembuse, saghimbe buraira.
7 Evetu genembo mave Bajari kakara use tumonderaera ava,
nunda aneyaimi kaifa use, saghimbe buraera.
8 Bajari da kavevera ava, ni tofo mandi, itatame gi!
Evetu genembo mave numokena ya nunda sonemba itatamururoro ne kaifa arira amo, ne ivuga beká ava arera.
9 Bajari da natofo isambu, nemokena resena. Bajari kakara use tumondevu!
Evetu genembo mave nunda geka ningiraera amo, ne rejo baetera ava budo, inono edo irera.
10 Raiyoni (lions) bayaudae ighoi itatamuse tava eraera,
avata evetu genembo mave Bajari da geka ningiraera amo,
ne inono beká ava arera, roera eveva enidae dubo mema jo ae arera.
11 Nanda kokomana, evetu genembo seseka, fuvu, sirurono ningove!
Niningururovo, ne nange Bajari kakara use tumondaeteva ava, ijugaono ningareva!
12 Ne endada ivugaghae irari uju eraeva, ai?
Ne eminda ghousa jebuga irise, ivugaghae irari uju eraeva, ai?
13 Avori, erá aji seove,
a erá gungubo seove!
14 Ari eko da emboro ava imboe edo gukai futuse,
ari eveva avanembo use irivu!
Mainungari da emboro ava,
fakina use ininighae tava evu!
15 Bajari nu, evetu genbembo ari eveva a dambu eraera ava, kaifa use, nenda kori ningiraira,
a nenda irari ava, giraira.
16 Avata evetu genembo mave ari ekoko eraera ainde, nu osogo edo tataya use deraira.
Amingurureari, ne amburaera amo, evetu genembo ne jo kakara use kotae eraera.
17 Avata evetu genembo ari eveva a dambu eraera amo, ne Bajari kena kori sirureoro ningiraira.
Aminguse nu, ne dara ainda jokáda ava sonembuse, saghimbe buraira.
18 Evetu genembo mave dubo mema use irera aikena, Bajari foa utua feteraira,
a evetu genembo mave bune jarutuse, fakina jo bae eraera ava, nune sonemberaira.
19 Genembo eveva mo, nu dara digari ainda mema itatameraira,
avata dara isambu rea itatameraira ainda jokáda, Bajari foa nu budo sonemberaira.
20 Bajari nu sonembuse kaifa e gogoghomburureari, nu eveva irá gheraira,
jo nunda etu eniko degagae arira.
21 Ekoimi foa, evetu genembo ari ekoko eraera ava, deari amburaera.
A evetu genembo mave ari eveva embo imboe eraera amo, ne ainda bouvu fufuse mino eko buraera.
22 Avata Bajari nunda natofo sonembarira.
Mave numokena ya, nunda sonemba a kaifa ari aindae uju eraera amo,
ne nunda sonemba ruruse, mino eko jo bae arera.