36
Evetu Genembo Da Dubo Joká Ekoimi Bedo Edo Irira.
1 Ari ekoko embo da janje jokáda ari eko aimi misurugururari,
nu God imboe use, God dae igheghi itako jo ae eraira.
2 Ainda susu mo, nu tofo numokena sarira, “Na jiro raugo bekári, ágido,
na rea eraena, God jo tambudo dombuda sari da kaugo iraeri.”
3 Nunda geka isambu ekoko beká sise,
gungubo teria futo seraira.
Nu dubo kotari da emboro kosasaghuse, nu sifo nanjigo aminda kotofu da ari ava jo ae eraira.
4 Nu kambo jokáda fase irise, kotari ekoko kotise fase irá gheraira.
Nu tofo numoa bu sembaeda fifituse, ari eko ari da goroto nanjogo foa gheraira ava, itako jo darigae eraira.
God Veka Eveva Eraira Kau Emingori!
5 Arie Bajari, ninda dubo bari teriago bekári, utu tambudo irira.
Ninda beka gajari nanjogo aresa, ava evovodae kaifa udo yaresa, tano tefori.
6 Doriri ghousa vitaira utuda vaghuse fetirira, ainda ghousa jo ave kasama arigo iraeri.
Aminga ava, God ari dambu ava nembo eraira ainda kafuru,
jo mave tambae arira. Kotugo, nu evetu genembo bekáda bekáda ategi eraira da aito fugari mo,
amingori, tano tefori. Sino fuka a evetu genembo barago nine kaifa eraesa.
7 Arie God, ninda dubo bari evovodae eraesa amo, numo bekári.
Evetu genembo isambu ninda ghabu duruda tereoro, nine gagara eraesa.
8 Kirumu nine berugeraesa ava nene mindiraera.
Nine seoso, ninda esimbugari, usegha buvuraira aminga ava namanekena bejedo foa gheraira.
9 Jebuga da susu mo nimori, nimokena ghedo foa gheraira.
Ninda usasa jarageraira aimi, namane sifo sevo eregosera.
10 Evetu genembo ni kasama erera ava evovodae dubo budo ghe!
Kotugo evetu genembo ari dambugo eraera aikena ninda jebuga ghasido yaresa!
11 Erá doyeoso, gegenembo ivuga kakatoimi na deore!
Evetu genembo ekoko barago, erá doyeoso, na ondioro sumbione!
12 Arie givu! Evetu genembo ekoko reda du fafasetera. O, gi!
Ominda burudughe fafasedo, erari erebunera.