63
God Dae Uju Beká Aore!
1 Arie God, nanda God nimori. Nanda janje nimokena afigedo gherena.
Nanda janje joka isasambuimi nindae uju beká erena.
Kau enda kareva irae kainghari beká betira sasarigariguse nanda asisi nindae uju use angasa angasa gherira.
2 Ninda vasa kakara aminda isagha aso gaeteni.
Ninda fakina, a duro kakaraghae ava ijugaso gari uju erena.
3 Ninda dubo bari, a kotugo kavevera mo, numo bekári, jo roera eni enda eminda amingo iraeri.
Na aindae sedo nindae sakai sarena.
4 Na sifo ghousa nindae aiyakoe sido ya ambarena.
Na nanda ungo jighono erorurari nimokena banunguse irá gharena.
5 Ninda dombuda fetirise, nanda asisi kirumu berugaso mindi inono arira. Nindae roro use yaruimi sakai sise irarena.
6 Na avari vasada fasirise, nimoa koteraena, tumba soro ghousa nimoa kotise fase irá gheraena.
7 Ni sifo ghousa na sonemberaesa aindae, ninda ghabu itumo duruda irise, na ririaghae yaru seraena.
8 Na nimokena gangono ururono, ninda ungoimi na kaifa e tavo ururaso, jebuga irá gheraena.
9 Mave namoa daoro ambono dae kato eraera, ne ambari embo da vasada ya vovosegarera.
10 Ne isoro tataya use, daoro sirivo arera. Nenda tamo gambari sino maneimi mindarera.
11 God sonembureari nunda gitofu de atai fatiraira aindae, kini (king) riria use irá gheraira.
Mave God da javoda beka gajarera aimi, nundae sakai sise, nunda javo jighoro erarira.
O gungubo kakato mo, God sari ambarera.