66
Genembo Eni God Numoa Nange Sonembusira Aindae, Aiyakoe Sisira.
1 Evetu genembo isambu, God da javo jighoro erorurari, ivugai fumbu arugaore!
2 Yaruimi isimbuse, God nunda javo durode ava jighoro erorurari, nundae sakai saore!
3 Sevu, “Arie God, ni rea ututeraesa evia gido, ghamo kenghari ungo ata dadadagheraira.
Ninda fakina teriago beká ava gido, ninda gitofu ojuimi ninda dombuda tumoi baingheraera.
4 Evetu genembo endada iritirera isasambu, nimoa tumonde bainghaeraera.
Ne nindae yaru sise, sakai seraera, ne yaruimi javono nimoa gatise seraera.”
5 Fuvu gaove, God rea evetu genembo dae etiri,
nenda gae gitida gi dudukughusera, ava kotovo dae sise resena.
6 Nune etiri, eva gasumbetiri atai enda bekáda fete sembiseri.
Susu aindae namane aminda fete ivugaimi vure jasiseri.
7 Nu fakinago bekári, ava sedo nu evovodae irise, oro nunda nunda ava ditimi jighi jijinimberaira.
Gogore, osogo ari kakato nimokena osogo jo ae aoro dae resena.
8 Arie, endada nunda oro oro nemokena resena, ningivu, God tumonde bainghuse, sakai saore!
Sakai beka teriago siruroro, isambu ningore!
9 Nune kaifa iri namonde jebuga irera, a kotugo namonde jo doyari duraeri.
10 Arie God, ni namane bu dere gosusesi. Kau siliva (silver) avarakada itioro,
jeka voseari beká vanembo buraera amingava,
nine namane dere gosusesi.
11 Nine namane bu feso, ninda vaghoda teteruseri. Namanenda gukada mema bouvugo ava fifitigusesi.
12 Nine eteso, namane gitofuimi fati jasedo iseri,
mema tafusera evia inono evetu genembo avarakada mema a kotugo usegha da mema tamburaera amingori.
Avata oroko nine eteso namane digutuse, iti susu fafode irera.
13 Na ninda kambo Jerusalem aminda joba nimokena dungari dae tige yarena,
na nimokena joba rea mutari beka gagojusena, ava mutarena.
14 Na dara jokáda irise, nimokena rea mutari sisena ava, mutarena.
15 Na sino fuka unduse irena, ava olta (altar) da dungoro dae joba bu furarena.
Na borumukava da kandana o gouti (goat) eini ava de ojedo dungono, imbosi nimokena utuda viti yarira.
16 Fuvu, ningove! Natofo maveju maveju God tumonde baingheraeva, fuvu, ningove!
Na nemokena God nandae rea usira ava sarena.
17 Na numokena sonembadae kori siseni. Na yaru nunda javoda sakai sise, didivuseni.
18 Nanda dara jo vujegae aetena amota, Bajari nanda benunu jo ningae aetira.
19 Avata na geka beká resena, God na sonembusira, na rea sise banungusena, nu niningusira.
20 God dae sakai resena, ainda beká mo, na banungusena amo, nu jo ningi ningae da kaugo aeri,
a nunda dubo bari a kavevera namokena jo doyaeri.