72
God Nange Kini (King) Esimbugaetira Da Banungariri!
1 Arie God, ni nange sifo ghousa ari dambugo beká use ijujeraesa,
ainda aito ava ijuge, namanenda kini kasama edo aimi ijujare!
Ni nange bekáda bekáda use, natofo ijujeraesa ava, dengoro induduraso,
namanenda kini (king) ningido amingare!
2 Nanda uju, God, ni amingaso, kini nu bekáda bekáda use, ninda natofo kaifa tavo arira.
A kotugo, makasi embo sonemba tefo, nenda sorega kato mo, kini nu kavevera use,
ne kaifa e gogoghombare dae, uju erena.
3 Nanda uju, nunda kaifada vare aminda bayau dighi fasarira,
a kotugo evetu genembo da irari barago ivu durari irarera.
4 Na uju erena, sonembururaso namanenda kini makasi embo ava sorise,
bekáda bekáda use kaifa arira! A kotugo evetu genembo mave makasi embo
kateyavara eraera, aikena gitofu use dari itatama arera.
5 Na uju erena, iji nengae tambunoghae utuda ghousa mavega janimbuse irarera,
ainghae dabade kini nunda natofo kaifa use irarira.
6 Na uju erena, borija kikisa etoda dise nunda esimbugari bu foa gheraira,
kotugo ghasisi vareda dise esimbugari muteari bayau vitiraira aminga ava,
kini nunda natofo kaifa use esimbugari bu furarira.
7 Na uju erena, kini nu ghousa mavego irarira,
evetu genembo aito dambugo beká fugutuse irarera.
A kotugo tambuno ghousa mavega janimbuse irarira,
nunda natofo kena gugua ghayafa sirorari ivugaghae irá ghedo ghaore!
8 Na uju erena, kini da kaifa ari tano eva sovenikena ghedo ya sovenikena buvarira.
Kotugo, uvu (Euphrates) Eiferate ghedo ya enda tano reda irira, aminda buvarira.
9 Na uju erena, nunda gitofu reighi evetu genembo a uvu irae vasada irari emboi
nunda dombuda kauboi dadarigedo numoa tumoi baingharera.
Nundae osogo eraera aimi, foama fororoda dombuimi dari fafasarera.
10 Na uju erena, Spain embo da kini
a kotugo reighi butu butu ainda kini mane
a reighi Sheba nengae Seba ghae da kini mane ainde dabade,
numokena fuyo mutarera.
11 Beká resena, kini mane nanjogo irera isambu,
nunda dombuda kauboi dadariguse tumoi baingharera.
Nunda oro oro ainda evetu genembo isasambu nunda duruda iritirise,
nunda sari ava edo gharera.
12 Makasi embo numokena sonembadae kori seraera ava,
nune bu darigeari jebugeraera.
Natofo mavekena gitofuimi kateyavara eraera,
nébarago numokena sonembadae kori sirureoro sonemberaira.
13 Kini nu joka ari katori, rojari embo a kotugo makasi embodae joka eraira.
Sonemba tefo embo ava sonembeari jo ambae eraera.
14 Natofo sonemba tefo setena ava gitofuimi mema futero tafuse irera ava,
nune seari jebugeraera. A mavekena gitofuimi dari gayari dae eraera,
nébarago dara jokáda saghimbe bu darigheraira.
Ainda beká mo, nenda jebuga numokena teriago bekári.
15 Kini ghousago irare! Na uju erena, reighi Sheba da goldi (gold) ava nundae mutoro barira.
A nundae banungururoro, God numo evovodae esimbugururari irare!
16 Na uju erena, vare isambu eminda bayau dige fasarira.
A kotugo enda jiro fumbari aminda barago, bayau dige fasarira.
Kau Lebanon frovensi iritirira aminga ava vitari garera.
Na uju erena, reighi bogu begaya isasambu, kau ekeda badurugo ava use,
natofo digari beká sirorarera.
17 Na uju erena, kini da binó evovodae irare!
Nunda binó evovodae, kau iji janimbariguse irira, aminga ava irare!
Na uju erena, evetu genembo isambu nunda jokáda esimbugari baeteri,
nunda oro oro isambu sakai numoa sarera.
18 Bajari, Israel embo da God, aindae sakai saore! Nusukako roera durode ava ututeraira.
19 Nunda javo duro usasaghae ava sifo ghousa sakai sise jighoro eredo ghare!
Nunda duró usasaghaeimi enda isasambu afurugare! Ai bekári, a kotugo, Ai bekári!
20 (Eminda tano erena. Jesse da mandi David da banungari tano eviri.)