118
Gitofu Sosighi Edo God Kena Aiyakoe Siseri.
1 Arie, Bajari dae aiyakoe sevu, ainda susu mo nu evevago bekári, a nunda dubo bari a kavevera evovodae irira.
2 Natofo Israel embo geka eminge sevu, “Nunda dubo bari a kavevera mo evovodae irira.”
3 God da fristi mane isambu eminge sevu, “Nunda dubo bari a kavevera mo evovodae irira.”
4 Evetu genembo God dae igheghi use, numoa tumonde baingheraeva, isambu eminge sevu,
“Nunda dubo bari a kavevera mo evovo dae irira.”
5 Na memai jarutuse Bajari namo sonembare dae seteno, nune sonembedo na vujegetiri kotae ya foa gherena.
6 Bajari mo nangae dabade irera, na jo itako oju ae arena, mave eni jo namokena mema mutae arera.
7 Bajari mo nanda tofori. Namo nune sonemberaira.
Na gosurono, mave namokena gitofu ututeraera ava dedo atai duboda fafategarira.
8 Bajari tumonduse sonemba tambari mo evevagori.
Endada evetu genembo kena gaiga gayari mo jo eveva iraeri.
9 Bajari tumonduse sonemba tambari mo evevagori.
Endada giti jijighigari kena gaiga gayari mo jo eveva iraeri.
10 Gitofu digarigo aimi namoa koseguseri, avata Bajari da fakina aimi nemoa sosighi useni.
11 Nene kosekase guse, namoa jimbe birurughuseri, avata Bajari da fakina aimi nemoa sosighi useni.
12 Namoa kosekaseguse, kau fafakena aimi ari guse burughe buvurutuseri.
Avata arivo gambu burughedo sekago totoigo soana eraira aminga ava use dadabuseri.
Bajari da fakina aimi nemoa sosighi useni.
13 Namokena teria futo fati fero, aimi na rojiseni, avata Bajari na sonembusira.
14 Bajari mo nanda fakina da susuri a na javono numoa gateraena. Nune sonembetiri na jebuguseni.
15 Ningivu! God da natofo nenda dobo jokáda iritirise gitofu sosighi e bari da kuvai sise fumbu arugerera,
“Bajari da fakina tomanakogo beká aimi sonembetiri namaneda gitofu sosighi useri.”
16 Bajari da fakina tomanakogo isoro jokada sonembetiri gitofu dedo, atai duboda fafatiguseri.
17 Na jo ambae irise, Bajari rea usira ava, vironu sido yarena.
18 Na dara usena aindae, Bajari etiri na mema itatama useni, avata jo doyari na ambaeri.
19 God da tafaroro kambo da guro mane nandae afifigevu, ya jokada tere Bajari dae aiyakoe saone!
20 Emo Bajari da gurori. Bajari mavedae “eveva” sarira, ainembo foa terarera.
21 Bajari, nanda benunu ningido sonembusesa aindae, nimokena sakai resena.
Nine eteso, na gitofu dedo atai duboda fafatiguseni.
22 Ghamana eni, kambo itari kakatoi imboe edo fugutusera ava,
Bajari nune budo tutumbi dae sedo fiti simbugedo, aminda tuturo edo, nunda kambo itari dae erira.
23 Emo Bajari da ariri. Namonde gido dudukugherera.
24 Sifo emo Bajari nunda gitofu dedo atai duboda fafotusira,
namonde isasambu ivuga use dubo jamaghae yaru divore!
25 Arie Bajari, namane sonembe jebugaore! Arie Bajari, namane sonembururu, rea gigiterera ava beká sirorare!
26 Orokaiva, buvuruteresare! God ni esimbugetiri, nunda javoda refesa.
Bajari da tafaroro kambo eminda fetirise, namane ne isasambu esimbugerera.
27 Bajari mo nu God ri. Nunda usasa namondekena janimberira.
Ika fafatu jore ungoi bambu ambo gaya ambo gaya gaedo, olta kakara aminda jimbe birurughuse divore!
28 God nane tumonde baingheraena, amo nimori. Nindae aiyakoe resena.
Na evetu genembo isasambukena ninda eveva kau mavego ava vironu sarena.
29 Evetu genembo isambu, Bajari dae aiyakoe sevu!
Ainda susu mo nu evevagori, a nunda dubo bari a kavevera mo evovodae irira.