140
Genembo Eni God Numoa Kaifa Gagara Are Dae Benunu Sisira.
1 Arie Bajari, namoa ari eko embo aikena sonembe bu darige!
Evetu genembo jiro ghambura aikena na kosege fete.
2 Ne evovodae ari sembae ari dae manaka garuse, sifo ghousa nene gayeoro,
mendeni avo ghoghora tataya kunumberaera.
3 Nenda aviva kau jingabu ekoko ainda kae amingori, geka nenda bekada buvuraira ava,
jingabu jumi da kae da kaugori.
4 Arie Bajari, namoa jiro ghambura embo da ari ekoko aminda kosege fete,
nandae janje ekoko tefo tefo use, namo ambono dae manaka eregarera.
5 Meka irae ivuga kakato namoa ufena dari dae vagho junge fiti simbugerera,
ne asi aimi ivasi ututedo nanda emboro aminda namoa ivasi e bari dae fifituseri.
6 Na Bajari kena resena, “Nanda God nimori.” Arie Bajari, mema use namo sonembaso dae sorara erena, ningi!
7 Arie Bajari, nanda Bajari, nanda sorega ari kato nimori. Isoro jokada na daetera ava, nandae sorega nine usesi.
8 Arie Bajari, ari ekoko embo nenda kotari da uju beká rejo dae use manaka eregarera ava, erá eoso, beká siroreure!
9 Erá eoso, ari eko emboimi nandae ivugai atai feteore!
Namoa kateyavara use, geka ekoko resuterera, nange geka daba aimi jighi jovereghe nemoa gambare!
10 Avaraka imo kokoigo veriverigo ava mutu nenda etoda dudurugare!
Ne bambu goroghe, bako eko aminda vovosegedo vitari bunedo iritirore!
11 Evetu genembo mave kokomana dae aji sise, nenda javoda geka gungubo gesire eraera,
ava aso gogofe gaore! Aso, ghambura evetu genembo aikena, dara dombu eni dombu eni aimi ari sirivo aore!
12 Bajari, namo kasamari, makasi embo rejo dae mema eraera, nine sorise sonembaresa.
A kotugo evetu genembo mave makasikena katiyavara eraera, aikena nine gitofo edo, vara jifegeraesa.
13 Beká resena, mave ni tumonduse ninda sari ava nembo eraera,
ne ninda dombuda jebuga fetirise, nindae aiyakoe sise irarera.