7
Iselala ata bahata 144,000 kebiamo silu otovelu.
1 Hoto katealeu uoholisege di elehasege anelu abuita abuita keau vatae dei abuita abuita keve lavisi heluka abuita abuita kebia matagevege keau bae davala baluga isi vatae onobenobemo utuai aiogevelivebene. 2-3 Ige di tota elehasege vaniu velemamale keve anelu moleu ukolikoli Dilava ke silu mole mai lohonu. Keu isiviale ke mai Dilava esemu kebia valimo otovei. Iale keu anelu abuita abuita kebia baita hohavei loui aove, “Lainaho davala baluga isi vatae onobenobe aiogevelive. Isege nahi vasohuta Dilava esemu kebia valimo silu otovegeto bae heluka boegevege abu bae tai vata aiogevei.” 4 Abu Dilava esemu kebia valimo silu otovege uoholige abu di namihai avoe, “Iselala ata bahata no silu otoveale keau moagaveu koseale uani handele voti voa taoseni (144,000). 5-8 Uani handele voti voa taoseni kebia valada abuike koea.
Diuda valadamo 12,000
Lubeni valadamo 12,000
Gadi valadamo 12,000
Asa valadamo 12,000
Natali valadamo 12,000
Manasa valadamo 12,000
Simioni valadamo 12,000
Livai valadamo 12,000
Isaka valadamo 12,000
Sebulani valadamo 12,000
Dioseba valadamo 12,000
Benidiameni valadamo 12,000.”
Anelu keau kateai loui di namihalu.
Ata moagamoagaeau ogo taete vaeveale
9 Hoto katealeu uoholige di elehasege ata bahata, vata bahata, hoto bahata kemo ata degomoleau lohoale Kosive telonata Mamoeveta heiabemo lavisi ua. Keau ata moagamoaga seleve. Iale ataeau bae kebia dodavelivebene. Keau ogo taete vai idi mole niue vana ke nahate matagevelu. 10 Abu baita holahai loui avoe, “Nahie Dilavau telonamo ugulamoale keu Mamoe keti nahi malevei ukolikoli nahiovelu.” 11 Anelu bahata keau oe nehebia voa (4) ni moagate isi eloda kebia evilikahavoi telonae heimo abu kome bokoai vata bisi holuiavoi Dilava hoesehavolu. 12 Isi loui avoe,
“No Kosive, hoto seleveike ko.
A ataga, a lulele, a nego, a vuvune keabuna vani bahata ugei.
Iale ataeau vani bahata a hoesehavoi a ivi ebagevai guligulilahage keu duave.
Hoto seleveike ke.”
13 Hoto keu uoholige eloda moleu di namihai avoe, “Olete abulike uoke ogo taete valu. Isi keau oleve loholu.” 14 Ige di namihai kosea, “Baluga, di hilokaholinu. Isito au hilokanu.” Di kateai louge keu loui avoe, “Keau vatae vatehani baluga kemoike abu loholu. Keau Mamoe tahota abu ogo totoeveike vage ogoeabe keau taelahalu. 15 Katealemoike abu vani bahata Dilava telona ke vudimo lavisi dubuve tumumo hoesehavoma. Abu kateisege telonamo ugulamoale ke biageu kebia giginagevema. 16 Iale abu bae tota vaelahai enulahalivebene. Ige vaniu bae tota tumuai kebia aiogevelivebene. 17 Kosealemo Mamoe ketana mamoe nalievemale ata ke nahate vai kebia nalievei. Mamoe keu telona kemo umale auna kebia holoevei uli holisi e hana keve tige abuna ukolikoli e seleve isi. Isege Dilavana kebia nimetava bahata ulihage auna uoholisi.” Eloda keu kateai loui di namihanu.