1 Mina dada, Sei yaku beika redo mina tari refa, ini uka mado mida mida kana. 2 Resi uka mana dudu nana refa, Keriso kana, kaere bi Sei rofu aira ma sisika buni orina kana, una uka masi una dada ini vegu maro.✡Ex 29.18; Ps 40.6

3 Idu koa rena, udu o vegu no tau gade bi yi utari ga ameyaganedi, Sei di vene rofu bi buni de dada. 4 Ago kino ma ni tavoi tavoi o iko boma ago ka ga nibifa, adina mina kana ago ya rofu bi buni de. Idu ya bi Sei rofu buni tora gade mabifa. 5 Adina mina vei mona resi diba nidedi, koa redo amiye, vegu no nufa amiye o moke moke moido amiye, kaere bi ofa sei nivakedo, ina bi Keriso ma Sei di ourefeidena amena sanari adina amiye de nigo.

6 Amiye yokoi yaku ni tavoi tavoi rena ago dudu ga ya eru reyaine, adina Sei di gubuyo iniye obe rededi vene, fafau mina vegu dada baedo. 7 Mina dada, mina kana beika yokoi rededi venesa bi auta ga refa. 8 Adina ari yokoiri ya bi mukunari amegamadi, idu ya bi gua Varika amiyesa vabarari amededi; kamini vabara di mida mida kana nana rebifa. 9 Adina vabara*vabara; bura bedakai Vima nufa. di meko bi buni vayavaya, mokena rorobo ma ago rama tau noibanuri baku rededi. 10 Varika amiye yaku beika bi ura rego, mina maina refa. 11 Mukuna di vegu rei tavoi tavoi auta ga refa, idu ka moi ogau rifa. 12 Adina mina vegu suiri rededi bi maena dada ago de nigifa. 13 Idu beika tau noibanu vabara rofu moi ogau rigori, bi vei mama regedi; 14 adina beika tau noibanu bi vabara dudu moi ogau ridedi.†beika tau noibanu bi vabara dudu moi ogau ridedi; o vabara yaku beika tau noibanu moi ogau rido. Mina dada yomakai niyo:

15 Mina dada, ya gokai nana rededi vei mona rebifo, diba de nufa vene kana dudu bi de, idu diba nufa vene kana. 16 Meda yasa amedediri, vegu buni rei mona rebifa, mina bi no rededi ari dada.✡Col 4.5 17 Mina resi ada de kana ga refa, idu Varika amiye di beika ura redo ka diba nifa.

18 Resi waini tau irina dudu ya kaya yi vegu moi no rena ga refa, idu Vima yaku ya vata baeyaine. 19 Ya kaya ya kaya Sei di roka moi odoro rina sina, yauta ma vima di kikifa yauta nigasa yi uka meko ideri, Varika amiye rofu kukuroka buni refa.✡Col 3.16–17 20 Resi beika baika tau noibanu dada, uni Varika amiye Iesu Keriso di roka dudu toga toga Baba Sei buni tora gade mafa.

21 Keriso‡Keriso; bura bedakai Sei nufa. di ori dudu ya kaya ya kaya ekure rebifa.

22 Odima vene, yi maruka vene rofu ekure refa, Varika amiye rofu rededi kana.✡Col 3.18; 1 Pet 3.1 23 Adina maruka bi ini odima di ada, makai kana Keriso bi ekalesia vene di roaita di ada; ina ka bi ini moi vegu rido amiye. 24 Ye ekalesia vene yaku Keriso rofu ekure rededi kana, odima vene ka ini maruka vene rofu beika baika noibanuri ekure rebigedi.

25 Maruka vene, yi odima vene uka mabifa, Keriso yaku ekalesia vene uka masi ini vegu ina rofu maro kana.✡Col 3.19; 1 Pet 3.7 26 Ago di koru dudu rafei moi ruaka riyo, ye makai ina rofu moi akeke riyaine. 27 Ye ina yaku mina ekalesia vene vabara nufa iniye masi oteimaraine, ini kino yokoi de, ro musina de, o mina kana deda yokoi nufa de, ye kikifa ma butigi yokoi de amebiyagane. 28 Mina ida dudu maruka vene yaku iniye ini roaita uka madedi kana, ini odima vene ka uka mabiyagane. Amiye kaere ini rema uka mado, bi iniye ka uka mado. 29 Amiye yokoi yaku iniye ini roaita ura de reyo, idu ina yaku iruku masi uka mana dudu dogo redo, Keriso yaku ekalesia vene redo kana, 30 adina una bi ini roaita§Bura bedakai ka ma nena nufa. di vene. 31 “Mina di adina rumana yaku ini nono baba feresi ini remasa gogo nisi ina remanu bi roaita yokoi maka nigedi.”**ini nono baba feresi...: Mina bi Jew vene di toutou kana.✡Gen 2.24 32 Mina sui ago bi tora iniye, ye mina ago nida bi Keriso ma ekalesia vene di. 33 Kamini ya yokoi yokoi iniye uka mado kana, ini rema uka maraine, ye odima yaku ini maruka emagui reyaine.