12
Uni Baba Sei
1 Mina dada, toe tau gade ma vegu no una atafu amededi ka moi etagae risi are rei gira rena dudu, uni budari aeyo kana raga renadi, ninegau rededi vene tau gade gade vima dudu, seuya kana una moi buru ridedi dada. 2 Resi Iesu rofu vei mona renadi, kaere bi uni mokena vari gira aena di kora resi moi rorobo iniye redo amiye. Ina bi gabi ada rego mina rofu, satauro di esika esika are rei gira resi maena rofu mokena tora de aesi Sei di ourefeidena amena fata di vana rama rofu ameinu reyo.
3 Mokefa kumo gokai vegu no reyadi vene ina rofu ruda iniye reyadiri, bi are rei gira reyo, ye ya yaku kosika ga resi uka yau ga niyaganedi dada. 4 Yi vegu no rofu beto renari, bi yi dava rausi regika di meda di ruda rena kode. 5 Ye ya mida mida kana, ya egira redo sina bi toto niyadi ba?✡ Job 5.17; Prov 3.11–12
“Nai mida, Varika amiye yaku yi vegu rorobo nibigori, yi mokena moi aita ga re,
ma ago gira magori mina rofu ka kosika ga re.
6 Adina Varika amiye yaku uka mado amiye rofu vegu moi rorobo risi
ini moi dui reyo mida neinei toe mado.”
7 Ya bi toe moina moi rorobo rina rofu are rei gira reyaganedi.* reyaganedi; bura bedakai regedi vonisi, nufa. Sei yaku ini mida mida kana ya rofu redo. Adina goina mida bi ini baba yaku toe mana de redo? 8 Ina yaku ini mida mida noibanu moi rorobo rido, idu ya moi rorobo de rigo vonisi, ya bi ini mida mida iniye de. 9 Kamini mina konori una tau noibanu ka bi uni baba nufa, kaere uni vegu moi rorobo rigamadi ma kikifa reyafa. Ye besa vima di Baba di vava gabireri raga resi ameibobigifa! 10 Adina uni baba ini mokena dada, meda ne tumuri uni vegu moi rorobo riyadi, idu Sei yaku uni buni rofu una moi rorobo rido, ye ini vegu kikifari una vakoi rau reyaganedi. 11 Ini adina mina ituari, vegu moi rorobo rina di esika esika bi tora ma moi ada de redo, idu mina usi gabi ina fafau oteimai mona reyo vene rofu mokena rorobo di uka amuta rena rama aego.
Ni mama resi ago gira mana
12 Mina dada yi siroko rededi vana moi odoro resi yi yau niyadi efuka moi yeiva resi vegu buni di moimai refa!✡ Is 35.3 13 Yi yuka di ida moi rorobo rifa, ye yuka no bi besa no iniye de nigo, idu moi buni rigo.✡ Prov 4.26
14 Amiye tau gadesa uka amuta dudu va amegasa vegu kikifa refa, adina amiye yokoi mina nufa de bi Varika amiye vena de rego. 15 Vei mona refo amiye yokoi yaku Sei di buni tora gade moina rofu fufuta mago baebu; ye ru bi daru gutuna meto bosi toe moi baego ma makai dudu amiye tau moi kino rigo baebu;✡ Deut 29.18 16 ye amiye yokoi koa rego o Esau vegu kikifa de reyo kana rego baebu. Ina yaku iruku yokoi maka rofu ourena mida di baba di gugura asanu rena bi sero reyo.✡ Gen 25.29–34 17 Adina ya ya diba, gokai gabi buni tora gade moigi ura reyori, bi fufuta maro; ne koru dudu isaka nisi maina reyo, idu vegu no feresi moi etagae rina ida bi de baku reyo.✡ Gen 27.30–40
18 Ini adina ya yaku omunari† omunari; bura bedakai mina ago nufa de. beika avaka moina rofu de baeyadi; mina bi ita yama yama redo, mukuna gube, agubo ma miya itu aura,✡ Ex 19.16–22; 20.18–21; Deut 4.11–12; 5.22–27 19 ma kibi kukuroka ma goroka yokoi di ago neideyadi vene yaku niguyaguya reyadi bi dudusa ina vene rofu ago ga niyainedi. 20 Adina ago gira maro neidena rofu are rei gira de reyadi, “Vibani yokoi yaku ka mina omuna avaka moigo vonisi, fore dudu umuyeyaganedi.”‡ Bura bedakai ka o auri dudu imiyaganedi nufa.✡ Ex 19.12–13 21 Ye beika veyadi rofu ori iniye reyadi dada Moses yaku yomakai niyo, “Na bi ori iniye dudu tururu reida!”✡ Deut 9.19
22 Idu ya bi Zion di omuna ma vegu ameibobina Sei di taoniri baeyadi; mina bi oma di Jerusalem. Ka bi Sei di naivo naivo vima tau gade gade rofu baeyadi; mina ada dudu egogo rededi bi yokoi yaku duaiya rena anua rego. 23 Ya bi ourena mida di ekalesia vene rofu baeyadi; ina vene di roka bi omari bura reyadi. Ka bi Sei, amiye tau noibanu moi kota aego amiye, ma moi rorobo iniye riyo mokena rorobo vene di vima rofu baeyadi. 24 Ya bi uka ago ruaka di utari naivo amiye Iesu rofu ma moi faraka reyo dava rofu baeyadi. Mina dava di ago nina bi Abel di dava di ago nina ebu reyo.§ Mina dava di ago nina...ebu reyo: Iesu di dava bi moi vegu rina rofu, Abel di dava kana de.✡ Gen 4.10
25 Vei mona refa ago nido amiye fufuta ga maragane. Adina ina vene yaku konori ago gira maro amiye fufuta magasa ori de diyadi, bi omari ago gira maro amiye fufuta magifa vonisi, de iniye iniye ori de digifa!✡ Ex 20.22 26 Mirona medari ini goroka yaku kono moi tururu reyo, idu gua bi nitore resi niyo, “Na yaku dudusa kono maka moi turu turu bi de regida, idu oma ka moi turu turu regida.”✡ Hag 2.6 27 Mina ago “dudusa” ini adina bi Sei yaku risi moi turu turu reyo beika baika bi moi etagae rigo, ye beika baika moi turu turu de rego bi amegedi.
28 Mina dada, ourefeidena amena sana moi turu turu de rego mina moigifa, ye mina rofu buni tora gade manadi, ye makai kikifa ma ori dudu, Sei di uka moi ada regi ina rofu nivakenadi; 29 ini adina rama uni Sei bi vai kamu redo ita kana.✡ Deut 4.24
✡12:5: Job 5.17; Prov 3.11–12
*12:7: reyaganedi; bura bedakai regedi vonisi, nufa.
✡12:12: Is 35.3
✡12:13: Prov 4.26
✡12:15: Deut 29.18
✡12:16: Gen 25.29–34
✡12:17: Gen 27.30–40
†12:18: omunari; bura bedakai mina ago nufa de.
✡12:18: Ex 19.16–22; 20.18–21; Deut 4.11–12; 5.22–27
‡12:20: Bura bedakai ka o auri dudu imiyaganedi nufa.
✡12:20: Ex 19.12–13
✡12:21: Deut 9.19
§12:24: Mina dava di ago nina...ebu reyo: Iesu di dava bi moi vegu rina rofu, Abel di dava kana de.
✡12:24: Gen 4.10
✡12:25: Ex 20.22
✡12:26: Hag 2.6
✡12:29: Deut 4.24