20
Iesu di vava di nikaitena
(Mt 21.23–27; Mk 11.27–33)
1 Meda yokoiri, Sei nivakena yava ideri, amiye oteimasi ago buni nirausi regamori, bi Sei ma amiye utari naivo vene di varika vene, ago gira oteimana vene, ma tora vene ina rofu bosi are regasa 2 nikaiteyadi, “Una ni, beika vava dudu mina vegu reisa? Ma kaere yaku mina vava ya maro?”
3 Ma nikabai resi niyo, “Nai nikaitena ka bi yokoi maka. Na nifa, 4 John di babatiso rena di vava bi oma gutuna ba amiye gutuna deyo?”
5 Ye iniye iniye nidodi resi niyadi, “ ‘Oma gutuna,’ nigifa vonisi, ina yaku nikaitego, ‘Ma beika resi ina rofu mokena vari gira de aeyadi?’ 6 Idu ‘Amiye gutuna,’ nigifa vonisi, amiye tau fore dudu una umuyegedi, adina mokededi bi John bi Sei di ago nido amiye yokoi.” 7 Ye nikabai reyadi, “Una una toto bi goinari gutuna deyo.”
8 Ma niyo, “Na yaku ka makai de ya nigida na bi beika vava dudu mina vegu reida bi.”
Waini meko muro nari rena vene di mokena ago
(Mt 21.33–46; Mk 12.1–12)
9 Kamini amiye rofu mina mokena ago nigi kora reyo: “Amiye yokoi waini meko di muro varisi muro nari rena vene be ini nanaka moigika nimasi yava ika oto diyo.✡ Is 5.1 10 Mina usi butu rena di meda okiyori, bi ini moimai rei tavoi redo amiye yokoi muro nari rena vene rofu nifeideyo ma waini meko vareyo mina bi butu reyainedi. Idu bi mina moimai rei tavoi redo amiye ubobo resi vana notoka nifeideyadi. 11 Kamini dudusa ini moimai rei tavoi redo amiye yokoi ina vene rofu nifeideyo, idu ka bi ubobo resi ni moi maena resi vana notoka nifeideyadi. 12 Dudusa yokoi nifeideyo, mina bi uru regode niyo mini. Mina ka ubobo resi etofaro makuyadi. 13 Ye waini meko di muro biyaguna amiye yaku niyo, ‘Beika bi regida? Nai uka maida mida nifeidegida; bi matagini regedi baeko!’ 14 Idu muro nari rededi vene yaku vesi iniye iniye nidodi resi niyadi, ‘Mina bi muro biyaguna amiye nigo. Nesi umuyenadi, ma beika baika ini baba yaku ferego bi uni nigo!’ 15 Ye waini meko muro etofarori makusi umuyeyadi.
“Ye waini meko muro biyaguna amiye bi ina vene rofu gokai beika be rego? 16 Ina bi baesi muro nari rededi vene umuyesi muro bouna vene mago.”
Amiye yaku mina sina neideyadiri, bi niyadi, “Makai bi ga ogau niyaine!”
17 Idu ina vene vesi niyo, “Ye mina bura reyo bi beika?✡ Ps 118.22
‘Yava akuna vene moi kekevata uyadi fore
bi yava moi gira redo fore iniye niyo.’
18 Mina fore fafau kaere amiye yaregedi bi ode tumu tumu regedi, ma mina fore kaere fafau yarego bi mina amiye ufoyoma rego ma budoka nigo.”
Takesi fei rena di nikaitena
(Mt 22.15–22; Mk 12.13–17)
19 Ma mina meda nemoko makari ago gira oteimana vene ma Sei ma amiye utari naivo vene di varika vene yaku ina moi gira regika ida maina reyadi, adina diba niyadi mina mokena ago ina vene fafau niyo. Idu amiye rofu ori resi 20 Iesu vei mona resi ini ura bi Rome vene di gavana di ourefeidena ma vava gabireri aegedi. Dada amiye be fore masi nifeideyadi, kaere bi sina buni buni kana dudu niyagane. Idu rama iniye bi, Iesu ini ago nigori ni eru regedi. 21 Ye baesi ina rofu niyadi, “Oteimana amiye, una una diba ya bi sina rama maka nisa amiye. Ya bi amiye gokai kana bi de mokeisa, idu sina rama dudu maka Sei di ida oteimaisa. 22 Una ni, Caesar rofu takesi fore fei rena bi uni ago gira rofu rorobo ba ide?”
23 Idu bi sena ini eru rena vegu vei mama resi niyo,* Bura bedakai ka Beika resi na ebene rededi? nufa. 24 “Siriva fore yokoi na oteimafa. Bi kaere di vima ma roka nufa?”
Ye nikabai reyadi, “Caesar di.”
25 Kamini niyo, “Beika Caesar di, bi Caesar mafa, ma beika Sei di, bi Sei mafa.”
26 Beika ago niyo rofu amiye di nemokori eru regika anua reyadi; ini ago dairi maro rofu tururu reyadi, dada bere niyadi.
Muyenari dadi rae rena di nikaitena
(Mt 22.23–33; Mk 12.18–27)
27 Kamini Sadducee vene be, kaere bi dadi rae rena fufuta maradi, bi Iesu rofu baeyadi.✡ Acts 23.8 28 Resi nikaitegasa niyadi, “Oteimana amiye, Moses yaku una rofu bura reyo bi: ‘Amiye kaere ini dubuini muyesi ini rema ferego, idu mida bi koina, mina amiye bi ini obu mesi ini dubuini di mida moiyainedi.’✡ Deut 25.5 29 Yokaru bi dubuiyaka 7 amegamadi. Ourena bi rema meyo, idu muyeyo, mida yokoi de. 30 Ini usi vata niyo amiye ka makai 31 ma mina usi amiye ka makai meyo. Mina vegu yokoi maka mina dubuiyaka 7 tau noibanu rofu vata niyo—ina tau noibanu mida de muyeyadi. 32 Gabi koukou mina rema ka muyeyo. 33 Mina dada dadi rae renari, ina bi kaere di rema nigo, adina bi amiye 7 tau noibanu yaku meyadi?”
34 Ma Iesu yaku nikabai reyo, “Gua medari amededi rema ma rumana bi mededi, 35 idu kaere vene Sei yaku niyo bi buni bi muyena gutuna dadi rae resi mina meda baegori ameyaine, bi iniye iniye de megedi. 36 Adina dudusa muyegi anua regedi; ina bi dadi rae rena di mida mida, ye Sei di naivo naivo vima kana nisi ini mida mida nigedi dada. 37 Idu mirona imiye yabo tafa di sinari bi Moses yaku ka una oteimaro, muyena vene bi dadi rae regedi, adina bi Varika amiye rofu niyo bi ‘Abraham di Sei, Isaac di Sei ma Jacob di Sei,’ vo niyo.✡ Ex 3.6 38 Ye ina bi vegu ameibobina di Sei, diya muyena vene di Sei. Ini mokenari tau noibanu bi vegu amededi.”
39 Ago gira oteimana vene be yaku nikabai resi niyadi, “Oteimana amiye, nikabai rei mona reyo!” 40 Adina dudusa nikaitegika de regamadi.
Keriso di nikaitena
(Mt 22.41–46; Mk 12.35–37)
41 Idu nikaitesi niyo, “Gokai bi nidedi Keriso bi David di tutubena? 42 Adina David iniye yaku Psalms bukari bura reyo,✡ Ps 110.1
‘Varika amiye yaku nai Varika amiye rofu niyo:
Nai vana rama eta rofu ameinu re
43 bogo na yaku yi tuma vene yi yuka aena sana kana rigida mamo.’
44 Mina dada David yaku ‘Varika amiye,’ vo niyo, ye gokai ida dudu ina bi ini tutubena?”
Iesu yaku ago gira oteimana vene fafau nidiba reyo
(Mt 23.1–36; Mk 12.38–40)
45 Amiye tau yaku neidegamadiri, ini usi dina vene rofu niyo, 46 “Vei mona refo ago gira oteimana vene rofu, kaere varuka doba dudu nana regika ma maketiri amiye yaku ago buni dudu matagini reyagane, ma usa usa yavari ma irakuna sanari amena sana ka buni torari ura rededi. 47 Ina vene yaku obu vene di gugura ka duma resi ofa dudu usa usa doba nioteimadedi. Mina kana vene, ini kaunava bi tora iniye!”