Ruth
di buka
Ago di ini adina
Ruth di sina sina amuta nufa bi Ourefeidena vene tora di ruda reyadi di medari. Ruth, kaere bi Moab rema yokoi, bi Israel rumana meyo. Ini maruka muyeyori, Ruth bi ini radini Israel rema ma Israel di Sei rofu uka maro. Kamini ini usika ourena di utari gutuna bi rumana ruaka meyo ma David, kaere bi Israel di kini buni vayavaya yokoi maka, di bobada niyo.
Ourefeidena vene tora di oteimana sina bi Sei di vene fufuta maradiri no yaku maro. Ruth, kaere bi yava ika rema, yaku Sei rofu mokena vari gira aeyo. Makai resi Sei yaku buni tora gade maro ma ina yaku ini mokena vari gira aena venesa yokoiri niyo.
Beika sina ideri
Naomi Ruth sa Bethlehem taoniri dairiyadi 1.1–22
Ruth bi Boaz baku reyo 2.1—3.18
Boaz Ruth meyo 4.1–22
1
Elimelech ini rema midasa Moab gaganiri roku reyadi
1 Senagi senagi, mirona ituari ourefeidena vene tora amegamadiri,*Kini de ameyo. adabo minari negau niyo. Bethlehem amiye yokoi Judah ri, ini rema ma rumana mida remanusa, Moab gaganiri roku reyadi. 2 Mina amiye di roka bi Elimelech ma ini rema di roka bi Naomi, ma ini mida remanu di roka bi Mahlon ma Chilion. Ina bi Ephrathah vene, Bethlehem taoni, Judah gagani vene. Ma disi Moab gaganiri amegamadi. 3 Amegamadiri, Naomi di maruka Elimelech muyeyo, ma ini rumana mida remanusa amegamadi. 4 Moab rema meyadi, ini roka bi Orpah ma Ruth. Lagani vana ufo amegamadiri, 5 Mahlon ma Chilion ka muyeyadi ma Naomi bi maruka ma mida de inike amegamo.
Naomi ma Ruth Bethlehem ri dairiyadi
6 Gabi Moab ri neideyo bi Varika amiye yaku amiye di rauna moyari aedesi iruku rau regamo. Naomi ini radini remanusa mina gagani ferei digi dogo reyadi. 7 Ini radini remanusa, ini amegamadi sana feresi Judah gagani di ida moiyadi. 8 Kamini Naomi yaku ini radini remanu rofu niyo, “Ya remanu yi nono di yavari dairigedi. Varika amiye buni tora gade ya rofu moi ogau rebigo, na rofu ma yi muyenari regamadi kana. 9 Varika amiye ya remanu rofu yi gado variyaganedi rumana bouna ya mago.”
Kamini ina remanu fuka reyo ma rema remanu isaka nigasa 10 niyadi, “Una bi yi vene rofu yasa gogo dairigifa.”
11 Idu Naomi yaku niyo, “Dairifa nai vefa vene. Beika maina nasa baegedi? Ye nai rumana mida be moigida, ma yi maruka nigedi ba? 12 Rautu dairifa, nai vefa vene. Na bi rumana moina rofu, kamini ugava niyaka. Gokai beika nai mokenari uka mokedo gua urusari maruka nufa mida evata rigida 13 ma ina tora nigedi vonisi, ya bi ina tua de regedi. Ya bi na tua de resi de megedi ba? Ide, nai radiyaka, na rofu bi vegu gira tora, yi vegu kana de, ini adina Varika amiye na rofu gedu maro.”
14 Mina neideyadiri dudusa isaka niyadi. Kamini Orpah yaku ini radini fuka resi yuata niyo, idu Ruth yaku ini radini moi gira reyo. 15 Naomi yaku niyo, “Na ve kumo, yi nabore bi dairido ini vene ma ini sei†sei; ba sei vene. rofu. Ini vegu kana re.”
16 Idu Ruth nikabai reyo, “Ya feresi dairigida na ni guba ga re. Goidu digiya na ka digida, ma goidu amegiya na bi yasa amegida. Yi vene bi nai vene ma yi Sei bi nai Sei. 17 Goinari muyegiya na ka muyegida, ma mironari na guri aegedi. Varika amiye yaku kaunava gira gira na maraine, muyena yaku maka una gaima rigo vonisi.”
18 Naomi yaku Ruth veyori, bi inasa dina vata rego, mina resi dairiyainedi ni guba de reyo.
19 Ye ina remanu disi Bethlehem ri okiyadi. Bethlehem okiyadiri, rautu vene vesi tururu reyadi ma rema vene yaku ago ni tona dudu niyadi, “Aee, mirona bi Naomi ba?”
20 Ina vene rofu niyo, “Naomi vo nisi nai roka ga nifo, idu nai roka Marah‡Naomi….Marah: Hebrew agori Naomi bi “safi” idu Marah bi “gira.” nifo, adina Varika amiye Vava yaku nai vegu di ida moi gira reyo. 21 Na bi gugura fore nufa diyaka, idu Varika amiye yaku notoka na moi dairiyo. Beika resi Naomi roka nidedi? Adina Varika amiye yaku esika na maro, Varika amiye Vava yaku no na fafau aeyo.”
22 Ye Naomi, ini Moab radini Ruth ya ota risi Moab gagani feresi Bethlehem ri dairiyadi, barley§barley: Ina bi witi, koni o raisi asini. ini butu butu rena di medari.