3
Solomon nuwauyauya aubaina i waibaḡa
Solomon Bada i wainuvaine gulate bi tamana Deivida ena waiḡake matabudi i kaiwatedi. Bi mwali ḡemota ba tana ḡamoḡamo i laulausewasewayedi bi piupiu i gabugabudi maimaituwa kaikaiyovudi ani lauduneyedi gabudimo. Bi ḡalibona i nawa Gibionmo sewasewa gabuna aubaina bi mba dobuna ba anilaudune gabuna dididiga. Taunana aubaina ḡalibona i nawa bi gabuḡosa puyona sewasewa wapana 1,000 i lausewasewayedi mba gabunemo. Ḡome laubonimo Bada i laumaḡata Solomon lisinemo bi i giuwena gado, “Bai kuna ḡoena ba lisigumo kwai baḡa bi yà vitem.”
 
“Aee, egu Bada bi egu Maimaituwa, kuna voiyegu te tamagu Deivida ena gabu e vai. Bi geḡa te tagu ba gomana yababa mote bai e sibe te bainewa niga lavedi yài badaedi. Bi tagu em taupaula em lava Islael nopodimo kuna vinegu. Bi niga lavedi ba a wapa gulata mote ani iyevina. Taunana aubaina tagu em taupaula nuwauyauya kwa vitegu te em lava yài etadoliyedi bi kota edi pilipilimo giukauwa bi kaiyovu yà vaiye ḡonedi. Bi aiyai kaka bena luvana te niga lavedi wapawapa guletidi ya lau etadoliyedi?”
10 Bi Solomon nuwauyauya i waibaḡaye aubaina teBada i wainuwavisu. 11 Bi i giuwena gado, “Tam mote miya wailofa, waimane gulata ee em ḡaviya waipekidi aubaina ku waibaḡagu. Tam ba waibada kauwa nuwauyauyana aubaina kunai baḡagu, te bainewa egu lava kwai etadoli kauwedi. 12 Taunana aubaina noḡota kauwa bi nuwauyauya ba yà vitem, mote aiyai wala mai i vai ee muliḡa mote aiyai ima vai. 13 Avena te waiguyau mote ku waibaḡaye bi kamaina te yà vitem. Laḡannemo ma miyammo waiḡalibona kuna vai bi isam i didiga, mote mai ḡalibona ḡesaudi vaitedi ḡemoḡemotimi. 14 Bi bamoda kalinagu bi egu waiḡake kwa kaiwata kauwedina maibena tamam Deivida i voivoiyena ba tagu yà voiyem te em miya ya lofa.”
Solomon nuwauyauya i waimaḡati
16 Muliḡa kabaleya waivinidi labu a tava ḡalibona Solomon lisinemo bi ai baḡa te edi pilipili maso i ka didimani. 17 Bi ḡemota i giuna gado, “Egu bada, niga waivinina bi tagu vanuwa ḡemota noponemo ka miyamiya. Tana bi tagu libilibi ke bewedi. 18 Tagu e laubewa te laḡan faiona a kovi kaka egutau gomana i bewa. Ḡome mote aiyai ḡesau bi tama taumaiḡa.
19 “Bi dudubalemo niga waivinina natuna i kenavunu. 20 Taunana aubaina e kenakena kauleya ba i kena moito bi natuna pekipekina i bewa te bwagagumo i waikena bi tagu natugu yawayawasanina i bewa te tana bwaganemo i waikena. 21 Bi olaolalemo dobu i yana kamakaḡe bi e kena moito te maso gomana ei susu bi e kita te gomana i peki bi e kitakita kaukauwe ba tagu mote natugu.”
22 Bi waivini ḡesau i giuna gado, “Geḡa! Gomana yawayawasanina ba tagu natugu bi gomana pekipekina ba tam natum.” Bi waivini dolidolina i giubagibagina gado, “Geḡa! Gomana yawayawasanina ba tagu natugu bi gomana pekipekina ba tam natum.”
Bi ḡome ḡalibona matanemo ai kagiu.
23 Kamaina bi ḡalibona i giuwedina gado, “Walitau kwa giugiu te tam natum yawayawasanina bi emtau natuna pekipekina bi kota ḡesaum kwa giugiu te tam natum yawayawasanina bi emtau natuna pekipekina.”
24 Ḡome te ḡalibona i giuna gado, “Kepata ko vai natome.” Kamaina bi kepata a natome.
25 Bi i giuwedina gado, “Gomana yawayawasanina ko koisena labu te nevana enatau ko vite bi nevana enatau ko vite.”
26 Bi gomana tina otina natuna nuwana i poya kauwe bi ḡalibona i giuwena gado, “Aee, ḡalibona, avena, gomana yawayawasanina waivinina ko vite.”
Bi waivinina ḡesauna i giuna gado, “Geḡa, ko koisena labu te kainuwakava!”
27 Kamaina bi Solomon i giuna gado, “Gomana komai peki bi waivini dolidolina ko vite banina tana natuna.”
28 Maimaituwa Islael lavedi edi ḡalibona nuwauyauya i vite bi lava edi pilipili i kaka didimanidi, taunana aubaina ḡalibona a vivile kauwe.