12
Islael lavedi Liyabwam ai ḡaviye
1 Islael lavedi Sikem malagainemo Liyabwam a labelabe te maso i tava bi a vine te edi ḡalibona. 2 Sauginemo Nabet natuna Yelobwam niga giuna i vaivaiye ba tava munaḡa i ḡoe. Tana wala ḡalibona Solomon i naile kamaḡe te i nawa Idipmo i miyamiya. 3 Taunana aubaina Islael babadidi ena giu a giukamaḡe te ya tava munaḡa. Yelobwam bi Islael lavedi a nawa ḡalibona Liyabwam lisinemo ai ḡemotidi bi a giuwena gado, 4 “Tamam Solomon tama noya dididiga i vitemai. Bi niganana tam niga vitana kwa voiye te ya tekateka kaka em waibada dibunemo ka miya.”
5 Bi ḡalibona Liyabwam edi giu i waimunena gado, “Ko munaḡa bi laḡan faiona ko vitegu te yài nuwa noḡonoḡota kaka ko tava munaḡa te yà giuwemi.” Ḡome te lava a munaḡa.
6 Kamaina bi Liyabwam magumagula i giuwedi a tava ai ḡemotidi, tedi mabai tamana ma miyanemo bi aubaina a noyanoya bi noḡota didimanemo a sagusaguna i waitalaedina gado, “Bai giuna ko vitegu te noi lavedi yà giuvitedi?”
7 Bi magumagula a giuwena gado, “Bamoda tam niga lavedi kwa sagudi bi bai sa waibaḡamna kwa voiyena ba tedi em waibada dibunemo sa miya nonoḡa.”
8 Bi geḡa te Liyabwam magumagula kalinedi mote i vaiye bi tana i nawa ena kimta lava valivaliudi lisidimo. Mabai tana aubaina a waitaupaulana. 9 Bi i waitalayedina gado, “Islael lavedi bainewa yà giuwedi? Tedi sa giugiuweguna gado, ‘Ema noya kwa voiye te ya tekateka mote mai tamam ena saugemo.’ ”
10 Kamaina bi lava valivaliudi niga mainana a giuvitena gado, “Tedi sa waibaḡamna gado, ‘Ema noya kwa voiye te ya tekateka,’ ba tam niga mainana kwa giuwedi, ‘Tagu nopogu i bagibagi kauwa mote mai tamagu. 11 Tamagu noya dididiga i vitemi bi kota tagu noya dididigi otina yà vitemi. Tana madamo i kwapumi bi tagu ba mada wai gedegedelidimo yà kwapumi.’ ”
12 Laḡan faiona a kovi bi Yelobwam bi lava matabudi Liyabwam lisinemo a tava, ḡalibona i giugiuwedina mainana. 13 Bi geḡa te ḡalibona Liyabwam magumagula edi giu mote i vaiye, taunana aubaina tana giu bagibaginemo lava i giuwedi. 14 Bi tana lava valivaliudi edi giu i kaiwata bi lava i giuwedina gado, “Tagu ba nuwagu bagibagina mote mai tamagu! Tamagu noya dididigina i vitemi bi tagu ba noya dididigi otina yà vitemi. Tana madamo i kwapumi bi tagu ba mada wai gedegedelidimo yà kwapumi.”
15 Bi niga mainana i tubuḡana ba Bada ena ḡowana luvanemo banina dolinemo taugiuwatana Aḡida Silowa lavana, Bada i giugiuwena mainana Nabat natuna Yelobwam i giuvite.* Niga giuna ba Ḡaliḡalibona edi buka dolidolina 11:29 noponemo ko kita. Taunana aubaina ḡalibona mote lava kalinedi i vaiye.
16 Sauginemo Islael lavedi a kita te ḡalibona mote kalinedi i vaiye ba a giuwena gado,
“Tada mote Diyesi natuna Deivida ena dam isuna!
Tada mote tana ena dam isuna.
Islael lavada ḡesauda ta munaḡa eda dobuḡa,
Deivida itana Liyabwam ena lava otidi taudiḡa yai badayedi!”
Kamaina bi Islael lavedi a munaḡa edi malagaiḡa. 17 Bi ḡalibona Liyabwam Islael lavedi mabai Diuda damna noponemo a miyamiyana i wai etadoliyedi.
18 Oloto isana Adonilam, tana ḡalibona ena taubagibagi edi bada bi Liyabwam Adonilam i giukamaḡe Islael lisidimo te maso i natomedi lisinemo bi geḡa te Islael lavedi ḡakimemo a laipeki. Bi sauginemo ḡalibona Liyabwam peki giuna i vaivaiye ba ena seliotimo i miya saḡa bi i velau i nawa Yelusalem. 19 Mba sauginemo Islael damna noke aibadabada yawannemo miyemiyedi, Deivida ena dam yalousa yawannemo a miyamiyana ai ḡinanedi. Mba waiḡinenina i kena te niganana.
20 Bi sauginemo Islael lavedi a vaiye te Yelobwam Idipmo i miyamiyana i tava munaḡa, ba lava a giuwedi ai ḡemotidi bi a giuwe te i nato bi a sako te yai badaedi. Bi tedi mabai Diuda damna noponemo a waibadana tedi Deivida ena tubulelesa taudiḡa a labedi.
Yelobwam Maimaituwa i laukasaḡaiḡaiye
25 Bi Yelobwam Ifleim dobuna noponemo Sikem taunina dididigina i gana wai kwaivivili bi ḡome i miya.† Ganana semetimo a pati wai kwaivivili. Bi kota i nawa Penuwel taunina ganakukuna i pati wai kwaivivili.
26-27 Laḡan ḡemota Yelobwam niga mainana i wai nuwa noḡonoḡota gado, “Islael lavedi matabudi sa nawa Yelusalemmo, Maimaituwa ena vanuwemo edi puyo sa lau sewasewayedi Bada lisinemo. Niga lavedi noke ḡome sa nawanawana male nuwedi sa vitaledi te Diuda damna edi ḡalibona Liyabwam lisinemo sa nawa bi tagu sai pekigu bi tana sa voiye te gabugu ya vai bi nove yalousa yawanina matabuna ya labe.”
28 ✡ Pot 32:4Taunana aubaina ena tauwaibabada vaitedi ai ogatala bi koikoitau kau aluwidi labu goldimo i voiyedi bi lava i giuwedina gado, “Noke ko nawanawana Yelusalem ba manekina i lofa. Niga emi maimaituwa, tedi taunana Idipmo a kapotiyovomi.” 29 Kamaina bi ḡemota Betelmo i waimoito bi ḡesauna Denmo i waimoito. 30 Avena te maneka bi a nawa Denmo bi kau natuna goldimo voivoiyena a laulauduneye, taunana aubaina lava gebogebo a voiye.
31 Bi Yelobwam anilaudune vanuwidi oya dabedimo i ḡaledi bi dam ḡesaudimo pilisi i vinedi, tedi mote Livai damnemo.
Bi mba sauginemo ḡalibona Yelobwam Islael i waibadaye bi ḡalibona Liyabwam tana Diuda i waibadaye. Bi Liyabwam Diuda i waibadayena kwalabu 17 nopodimo. Bi Diuda lavedi maimaituwa kaikaiyovudi a lau lauduneyedi bi Idip lavedi a nato bi ai ḡaviyedi te a lauyovoḡedi bi edi waiguyau ḡoneḡonedi, Maimaituwa ena vanuwemo bi ḡalibona ena ani miyamo ḡonaḡona visuvisudiḡa a nawedi. Liyabwam bi Yelobwam laḡan matabuna a waiḡasiḡasi.
Sauginemo ḡalibona Liyabwam i peki ba natuna Aḡida i saḡa gabuna i vai bi kwalabu faiona Diuda i waibadaye. Bi tana kota ḡalibona Yelobwam vaitena a waiḡaviya. Bi sauginemo i peki ba natuna Asa gabuna i vai bi kwalabu 41 nopodimo Diuda lavedi i waibadayedi. Bi tana ba ḡalibona visuvisuna bi Maimaituwa i laulauduneye bi Diuda lavedi maimaituwa kaikaiyovudi i waiḡaviyedi. Bi tana kota Islael lavedi edi ḡalibona Baḡasa vaitena laḡan matabuna ai ḡasiḡasi. Bi sauginemo ḡalibona Asa i peki ba natuna Diosafat gabuna i vai bi Diuda i waibadaye.
Bi Islael noponemo Yelobwam natuna Nadab ba ḡalibona gebogebona bi mabai mulinemo a waibadana ba a gebogebo gulata. Bi tana kwalabu labu nopodimo Islael lavedi i waibadayedi. Baḡasa i miya moito te Nadab bi Yelobwam ena dam lavedi matabudi i waipekidi. Bi Baḡasa i saḡa ḡalibona gabuna i vai bi kwalabu 24 nopodimo i waibada bi i peki. Bi natuna Ela ena gabu i vai bi Islael lavedi kwalabu labu i waibadayedi. Kamaina bi Ela ena tauwaiḡaviya isana Dimli i miya moito te i wai peki bi taunaḡa i sako saḡe te ḡalibona. Bi tapalolo ḡemota i kovi mulinemo Islael lavedi edi tauwaiḡaviya edi bada isana Omli a sako saḡe edi ḡalibona. Ḡome te Dimli taunaḡa i waipeki munaḡe. Bi Omli kwalabu 12 nopodimo i waibada. Mulinemo tana natuna Aḡab i saḡa tamana gabuna i vai. Bi kwalabu 22 nopodimo Islael lavedi i waibadayedi.