17
Elaidiya i giu te kalakaladada ya tubuḡa
1 Taugiuwatana Elaidiya* Isa Elaidiya banina ba Bada tana Maimaituwa. Dobu Giled noponemo taun isana Tisbe lavana. Tana i nawa ḡalibona Aḡab lisinemo bi giuwena gado, “Giukauwa, te Islael edi Maimaituwa yawayawasanina bi tagu ena taupaula, isanemo yà giugiu te kwalabu matademo sa natonatona mote nabu ee uba sima yovo te tagu yà giu kaka sa tubuḡa.”
Mba kauwina mainana i tubuḡa. Sauga i lofa kauwa mote nabu bi mote kani.
8 Kamaina bi Bada, Elaidiya i giuwena gado, 9 “Kwa nawa Sidon taunina diyanemo malagai isana Yalefat bi ḡome kwa miya. Bi ḡome ba iwape ya miyamiyana bi kaikana e giuwe te yai kanim.”
10 Kamaina bi Elaidiya i nawa Yalefatmo bi sauginemo taun ganakukuna mataetinemo i tavatava ba iwape i kita i laulaukai bi i waitalayena gado, “Aee, ḡemoḡemotina maso gauba ḡaubona ledumo, kuna ḡini te e tego.” 11 Kamaina bi i nawanawa gauba yaiina aubaina ba Elaidiya i giu munaḡena gado, “Aee, kota buledi kwa vai natome.”
12 Bi iwape ena giu i waimunena gado, “Giukauwa em Maimaituwa yawayawasanina isanemo yà giugiuwem, te tagu mote lisigumo buledi. Bi lisigumo ba falawa ḡaubo otina bi kota olip masina ḡaubona sa kenakena. Bi tagu ba yà laulaukai, te yà nawa vanuwemo bi yà laubuka ḡemota te ka kani bi mulinemo ba kani pekina ka peki.”
13-14 Bi Elaidiya iwape i giuwena gado, “Geḡa, mote kumai nuwaboya! Islael edi Maimaituwa i giu te falawa bi olip masina dubidi mote sima kovi, eete Maimaituwa nabu ya giukamaḡe yovoḡe dobumo. Bi kwa nawa vanuwemo te kuna giugiuna mainana kwa voiye bi dolina buledi ḡaubona aubaigu kwa gei buka. Bi nevana tam bi natum aubaimi kwa buka.”
15 Elaidiya iwape i giugiuwena mainana i nawa bi i voiye. Taunana aubaina laḡan matabuna ba kani i kenakena Elaidiya bi iwape manatuna aubaidi. 16 Bi Maimaituwa taugiuwatana Elaidiya lisinemo i giugiuwapana mainana i tubuḡa te falawa dubina bi olip masina dubina mote a kovi. 17 Laḡan visa a kovi mulidimo iwape natuna i sida gulata te i peki. 18 Kamaina bi iwape, Elaidiya i giuwena gado, “Tam ba Maimaituwa taugiuwatana bai aubaina niga mainana lisigumo kuna voiye. Tam niga ḡome kuna tavana ba egu gebogebo kwa kamaḡatidi bi natugu kwai peki ee?”† Mba sauginemo lava ai sumaḡa te sida bi peki ba Maimaituwa ena kovoḡa gebogebo aubaina. Elaidiya ena miya waivini lisinemo ba Maimaituwa matana i sako yovoḡe te ena gebogebo i kita bi natuna i peki.
19 Bi Elaidiya i giuwena gado, “Natum ku natome.” Bi Elaidiya gomana i avali bi i saḡa noke bena wailabunemo bi Elaidiya ena ani kenamo i waikena. 20 Bi tana, Bada lisinemo i laupalina gado, “Aee Bada, egu Maimaituwa bai aubaina niga pilipilina iwape kuna vite. Tana i waianinegu te ena vanuwemo yà miyamiya bi tam kuna voiye te natuna niganana i peki.” 21 Bi tana ma faiona gomana i ḡomotawi bi Bada lisinemo i laupalina gado, “Aee, Bada egu Maimaituwa, gomana yawasina kwa vite munaḡe!”
22 Ḡome Bada, Elaidiya ena pali i vaiye bi gomana i waiyawasani. 23 Kamaina bi Elaidiya gomana i avali yovoḡe vanuwa dibunemo bi tinana i vite bi i giuwena gado, “Natum kwa kita i yawasana munaḡa!”
24 Kamaina bi iwape i giuwena gado, “Elaidiya, niganana kaka e sibe te tam ba Maimaituwa taugiuwatana bi Bada giuna kuna giugiuwena ba giukauwa.”