2 Kolonikol
Niga bukedi gilugilumidi 1 bi 2 Kolonikol titikunidi ba ḡemoḡemotidi mai 1 bi 2 Samuwel bi ḡaliḡalibona edi buka 1 bi 2. 1 Kolonikol ba ḡalibona Deivida Bada ena vanuwa Yelusalemmo i ogatalena titikunina. Deivida Pilipilisi i giuwedi te maso Bada kalinana a kaiwata. 2 Kolonikol noponemo ba Islael ḡalibonidi edi vaivai ya giugiuwe. Bi kota bainewa Solomon ena taubagibagi Bada ena vanuwa Yelusalemmo a ḡalaḡalana. Solomon i peki mulinemo bi dobu i wai badayena lavedi, a daili munaḡedi te dobu labu a tubuḡa. 2 Kolonikol noponemo kota dobudi bi ḡalibonidi edi noyanoya i giuwata. Ḡaliḡalibona visa ota visuvisudi ba Maimaituwa a voteyeteye. Bi ḡesaudi ba ḡalibona gebogebodi. Tedi mote Bada ena waiḡake a kaiwatedi bi maimaituwa kaikaiyovudi a kaikaiwatedi. Niga ḡalibonidi edi lava a laulaukivi gebogeboyedi, taunana aubaina Bada ḡaviya i wai aninedi te niga dobudi labu a lauyovoḡedi bi ai pekidi.
36
Diuda lavedi giuwapa Bada matanemo mote a kaididi
14 Edi babada pilipilisi bi lava matabudi Bada matanemo mote ai patutu kauwa. Tedi dobu ḡesaudi lavedi edi vaivai gebogebodi a kita vaidi bi a kaikaiwatedi bi Yelusalemmo Pali vanuwina waiyawa nopona a kamilamila.
15 Edi magumagula edi Bada, Maimaituwa giu i giukamaḡe taugiuwatana lisidiḡa te lava sa tainuwataudi banina lava i launuwatoiyedi. 16 Bi tedi Maimaituwa taugiuwatana ai gwaigwaiyedi, kalinedi mote a vaiyedi bi a viviledi. Tedi niga mainana a voivoiyedi aubaina Bada ena medi ena lava lisidimo i didiga gulata bi mote aiyai ḡemoḡemotina ima gudu.
Babilon lavedi Yelusalem a ka gebogebo
17 Taunana aubaina Maimaituwa Babilon lavedi edi ḡalibona Nebukednesa i voiye te ena tauwaiḡaviya vaitedi a nato bi Diuda edi olooloto valivaliudi ai pekidi. Bi ḡesaudi a kwavi nawedi te pali vanuwinemo. Te lava valivaliudi bi magumagulidi, oloolotodi te waiwaivinidi ḡesaudi ai pekidi bi mote a launuwatoiyedi. 18 Bi Maimaituwa ena vanuwa ḡonaḡonana wainuwavaivaidi bi ḡalibona ena waibabada edi ḡonaḡona nananakidi te keikeilikidi matabudi a nawedi. 19 Bi Maimaituwa ena vanuwa a gabugolu bi malagai dididiga Yelusalem ganakukuna a dou suwasuwa, vanuwa nananakidi a gabudi bi ḡonaḡona wainuwavaivaidi matabudi a kagebogebodi.
20 Bi Diuda lavedi mabai mote a wai pekidi, taudidi a pani nawedi Babilonmo te ḡalibona aubaina ai taupaula. Bi ḡome a waitaupaulana eete Pesiya dobuna waibada i vai. 21 Laḡannemo Islael lavedi edi dobumo a miyamiyana ba mote bamo kwalabu ḡemota doḡa a kitakamaḡe i wai yawasi lubu. Taunana aubaina laḡannemo a pani nawedi Babilonmo ba mulidimo kwalabu 70 nopodimo mba doḡana i waiyawasi,* Waiyawasi lanḡanna giuna ba Livai 25:1-7 i giugiuna luvanemo doḡa i waiyawasi. maibena taugiuwatana Delimaiya i giugiuna luvanemo.
22 Pesiya ḡalibonina Saelus ena waibada kwalabuna dolidolinemo, Bada niga kauwina taugiuwatana Delimaiya i giugiuwena mainana i tubuḡa. Bada, Saelus i lauetadoliye te ena giuvavasaḡa letedi i gilumidi bi bamo dobudi i waibadayedina dobudiḡa leta i giukamaḡedi.
23 Pesiya ḡalibonana Saelus niga mainana i giu, “Bada, mala Maimaituwana dobu ena waibada matabuna i vitegu bi kota i vinegu te Diuda noponemo, Maimaituwa ena vanuwa, Yelusalemmo yà ḡala. Temi mabai Bada ena lava ba niganana ko munaḡa Diuda bi tana ya labemi.”

*36:21: Waiyawasi lanḡanna giuna ba Livai 25:1-7 i giugiuna luvanemo doḡa i waiyawasi.