Ḡalibona edi buka wailabuna
Lainuwanega
Ḡalibona edi buka dolidolina bi wailabuna ba Deivida ena waiguyau mulinemo bi bai i tubutubuḡana i giuwatedi. Bi buka dolidolina ba bainewa Solomon tamana Deivida gabuna i vaivaina i giuwata.
Solomon i peki mulinemo ba Islael lavedi a dailidi te dobu labu a tubuḡa. Bi yalousa yawanina ai isana Diuda bi aibadabada ba ai isana Islael.
Sauginemo Diuda ḡalibonidi bi Islael ḡalibonidi, Maimaituwa a vivivile ba nuwauba i kenakena. Wali saugemo ba ḡaliḡalibona mote Maimaituwa a vivile bi a moito vitaledi bi maimaituwa ḡesaudi a laulauduneyedi ba kauwa gebogebodi a tubutubuḡa. Bi sauginemo Islael lavedi Maimaituwa vivilena a kaisakona ba taugiuwatana i giugiukamaḡedi. Bi ḡaliḡalibona edi buka wailabunemo, taugiuwatana laukai otina ba Elisa. Tana kauwidi i voivoiyedina ba lava Maimaituwa ena sagumo. Bi tana lava i giuwedi te Maimaituwa sa laudune munaḡe.
Maimaituwa ena lava i kovoḡidi bi edi ḡaviya i wai aninedi te a pani a nawedi. Bi kauwina Islael lavedi lisidimo i gei tubuḡa kaka muliḡa Diuda lavedi. Bi Maimaituwa mote ena lava i waianinedi te maso a munaḡa edi dobu otinemo eete kwalabu 70 a kovi.
Lauvina
Waibada labu Islael bi Diuda 1:1-17, 41
Taugiuwatana Elisa ena titikuna 1:1-17, 41
Diuda bi Islael ḡalibonidi edi titikuna 8:16—17:4
Asaliya edi ḡalibona Sameliya tauninina bi Islael lavedi edi waibadamo i kaikamaḡedi bi i pani nawedi 17:5-40
Diuda ḡalibonidi edi titikuna 18:1-21, 26
Ḡalibona Esekaiya ena waibadamo i waitubu te i nawa ḡalibona Dosaiya enai bada sauginemo i tava 18:1—21:26
Diuda edi ḡaliḡalibona kovikovidi edi titikuna 23:31—24:20
Babilon ḡalibonana Yelusalem bi Diuda dobuna lavedi i pani nawedi 25:1-30.
2
Bada Elaidiya i nawe malamo
1 Sauginemo Bada maso yavala vilivilitoto Elaidiya i saḡe i nawena malamo ba Elaidiya bi Elisa Gilgal a ḡose bi a nawa. 2 Bi ḡome Elaidiya, Elisa i giuwena gado, “Niga ḡome kwa miyamiya, Bada i giukamaḡegu te yà nawa Betel.”
Geḡa te Elisa i giuwena gado, “Bada miyamiyana isanemo yà giugiu te mote yàma gosem.” Taunana aubaina labuidi a nawa Betel.
3 Bi ḡome taugiuwatana dubudi Betelmo a miyamiyana Elisa a giuwena gado, “Kuna sibe ee geḡa te niganana Maimaituwa em bada ya nawe malamo?”
Bi Elisa i giuwedina gado, “Ei, e sibe bi koma giugiuwata.”
4 Kamaina bi Elaidiya, Elisa i giuwena gado, “Elisa, niga ḡome kwa miyamiya, Bada i giuwegu te yà nawa Deliko tauninemo.”
Bi geḡa te Elisa i giuna gado, “Bada miyamiyana isanemo yà giugiu te mote yàma gosem.” Kamaina bi a nawa Deliko.
5 Bi Deliko tauninemo taugiuwatana dubudi a miyamiyana a tava Elisa lisinemo bi ai talayena gado, “Kuna sibe ee geḡa te niga laḡanina ba Maimaituwa em bada ya nawe malamo?”
Bi Elisa i giuwedina gado, “Ei, e sibe bi koma giugiuwata.”
6 Kamaina bi Elaidiya, Elisa i giuwena gado, “Elisa niga ḡome kwa miyamiya bi Bada i giuwegu te yà nawa Diyoudan gaubinemo.” Bi Elisa i giuwena gado, “Bada miyamiyana isanemo yà giugiu te mote yàma gosem.”
Kamaina bi labuidi a nawanawa, 7 ba taugiuwatana dubudi nopodimo olooloto wapedi 50 muliḡa a nawa. Bi Diyoudan gaubina diyanemo Elaidiya bi Elisa a vamoito bi taugiuwatana ba ḡotona manekemo a vamoito bi tedi a wai kitawatedi. 8 Bi Elaidiya ena kwama i kaikamaḡe, i vilinoku bi kwamanemo gauba i kwapu. Kamaina bi gauba i nuwadaili te doḡa ḡasaḡasalinaḡa labuidi a damana noi nevanemo.
9 Sauginemo noi nevanemo a tava, Elaidiya, Elisa i giuwena gado, “Kwa giuwegu bai aubaim yà voiye, muliḡa kaka Bada ya nawegu malamo?”
Bi Elisa i giuwena gado, “Aee, ḡailisi wailautawina lisimmo kwa vitegu bi gabum yà vai te taugiuwatana edi bada.”* Islael lavedi edi vaivaimo gomana tautuwaḡa gagasa wailautawina ya vai. Elisa mba taunana Elaidiya lisinemo ya waibaḡaye te maso gabuna i vai.
10 Bi Elaidiya i giuwena gado, “Kauwa dididiga kunai baḡaye. Bamoda kwa kitagu bi Bada ya vai naweguna, kaka bai kunai baḡaena kwa vai. Bamoda mote ima tubuḡa ba geḡa.”
11 Tedi etaḡa ai giugiu bi a nawanawa te osi bi seliot mavavavanidi ai maḡemoti te Elaidiya bi Elisa i dailidi. Bi yavala vilivilitoto i yovo te Elaidiya i vilivai te i nawe malamo. 12 Elisa mainana i kitakita ba i binauna gado, “Aiyoi Tamagu! Tamagu! Islael edi seliot bi osi tauvelauyedi tagu e kitedi.” Bi Elaidiya mote i kita munaḡe. Kamaina te nuwaboya matailina ba ena kwama i lisi labu.
13 Bi sauginemo Bada, Elaidiya i nawenawe ba ena kwama i kuluva doḡamo. Ḡome Elisa kwama i vai bi i munaḡa, Diyoudan gaubina diyanemo i moito. 14 Bi tana Elaidiya ena kwama i kuluva bi i vaivaina, kwamanemo gauba i kwapu bi i binauna gado, “Bada, bamo, Elaidiya ena Maimaituwa?” Sauginemo Elisa gauba i kwapukwapu ba i nuwadaili bi i damana munaḡa noi nevanemo.† Niga kauwina ya kakamaḡati te Elisa ba Elaidiya epaiyanina tana Elaidiya ena ḡailisi bi ena waibada ya vai (Ḡaliḡalibona edi buka dolidolina ko kita 19:19).
15 Bi Delikomo ḡome taugiuwatana dubudi bi tedi ḡotona manekemo, a kita te bai i tubuḡa bi a giuna gado, “Elaidiya ena ḡailisi ba niganana i damana Elisa lisinemo!” Kamaina bi a nawa Elisa lisinemo bi matanemo a laudune yovo doḡamo, 16 bi a giuwena gado, “Tama ḡaiḡailisimai bi wapamai 50. Bi kwai aninemai te ka nawa em bada ka tavuḡe. Bada Aluwina male em bada i avali nawe oya dabanemo e gwagwamo i sako.” Bi Elisa i giuwedina gado, “Geḡa, koma nawa.” 17 Bi tedi a lauyaviyavi bi a voiye te i waidabauba taunana aubaina i waianinedina gado, “Kamaina ko nawa.” A nawa bi laḡan faiona ai tavutavu bi mote a banavi. 18 Bi Elisa Delikomo i miyamiya bi sauginemo a tava munaḡa ba i giuwedina gado, “E giuwemi te maso mote ko nawa.”
*2:9: Islael lavedi edi vaivaimo gomana tautuwaḡa gagasa wailautawina ya vai. Elisa mba taunana Elaidiya lisinemo ya waibaḡaye te maso gabuna i vai.
†2:14: Niga kauwina ya kakamaḡati te Elisa ba Elaidiya epaiyanina tana Elaidiya ena ḡailisi bi ena waibada ya vai (Ḡaliḡalibona edi buka dolidolina ko kita 19:19).