Samuwel ena buka wailabuna
Lainuwanega
Niga bukana ba Deivida ena waibada ya giugiuwe. Laidalolo 1 te 4 ba bainewa Diuda lavedi taudiḡa i wai badayedina lalasi yawannemo. Bi kota laidalolo 5 te 24 ba bainewa Diuda bi Islael lavedi beubeu yawannemo miyemiyedi vaitedi i wai badayedi, taunana ya giugiuwe. Niga bukanemo kota tana kana ḡaviya Islael noponemo bi kota dobu ḡesaudi i wai ḡaviyedina kota ya giugiuwe. Bi ya wailoveda te bainewa Deivida, Maimaituwa i wai nuwavaine bi i wai sumaḡe. Bi kota ena gebogebo bi ena kaigwaḡa ḡesaudi kota ya wailoveda. Bi ta kita te Maimaituwa bainewa Deivida i kovoḡi bi kota bainewa i lau kuvasa bi Maimaituwa ena gebogebo i noḡotikamaḡe. Bi Deivida kota pilipili wapewapedi i banavidi laḡannemo Islael lavedi i wai badayedi bi Maimaituwa i moito galame ena giuwapa Deivida bi ena dam lelesina lisidimo i noya wataye (2 Sam 7:11-16 ko kita).
5
Deivida Islael edi ḡalibona
1 Waibabada Islael noponemo Deivida vaitena Ḡiblon malagainemo ai ḡemotidi bi a giuwena gado, “Tama tam em dam isuna. 2 Wala nove Sol aubaimai i wai ḡalibonana sauginemo, tam taunana Islael edi tauwaiḡaviya kuna lau etadoliyedi bi kuna waiḡaviya. Bi Bada i giuwemna gado, ‘Tam taunana egu lava Islael kwa labedina mai sipu taulabedi ya labelabedina mainana. Kota tam mainana Islael lavedi kwai badaedi.”
3 Ḡome Islael babadidi a tava Ḡiblon malagainemo ḡalibona Deivida lisinemo. Bi tana waianina i voiyena lava bi Bada matedimo. Ḡome babada olip masinemo Deivida dabanemo buyobuyo a ḡini bi ai mataile te tana Islael edi ḡalibona.
4 ✡ 1 Ḡali 2:11Deivida ena kwalabu ba 30 bi i wai ḡalibona bi kwalabu 40 nopodimo Islael i waibadaedi.