1  Bada, Mousis i giuwena gado, 2 “Libilibi oloolotodi tautautuwaḡa ba ko vine kamaḡedi tagu aubaigu. Libilibi oloolotodi tautautuwaḡa Islael noponemo bi ḡamoḡamo geigei tubuḡidi oloolotodi ba Bada aubaina.”

11 “Bada kaka ya kapotiyovomi niga dobunemo bi Keinan lavedi edi dobu ya vitemi, wala emi magumagula bi temi lisimimo i giugiuwapana mainana. Laḡannemo ya vitemina, 12 ba natunatumi oloolotodi tautautuwaḡa bi ḡamoḡamo geigei tubuḡidi oloolotodi Bada ko vite, mba tana aubaina. 13 Sipu natuna ko vai bi donki natuna olotona ko kune munaḡe. Bamoda mote koma kune ba donki iwana ko puneki. Bi natunatumi oloolotodi tautautuwaḡa matabudi ko kunekune munaḡedi.

14 “Laḡan muliḡa natunatumi sai talayemina gado ‘Bai aubaina niga mainana ta voivoiye?’ Ba temi niga mainana ko giuwedi, ‘Tama Idip dobunemo ke wai taupaula yababa bi Bada ena ḡailisi dididiginemo i kaikamaḡemai. 15 Bi geḡa te ḡalibona nopona i ḡaiḡai gulata bi mote i waianinemai te ka nawa. Taunana aubaina Bada libilibi oloolotodi tautautuwaḡa bi ḡamoḡamo oloolotodi Idip noponemo i wai pekidi. Taunana aubaina ḡamoḡamo olotona geigei tubuḡina kalaulau sewasewayena ba libilibi tautautuwaḡa ka kunekune munaḡedi.’ 16 Niga vaivaina ta voivoiyena ba mataila, te bainewa Bada ena ḡailisimo Idip noponemo i kapotiyovoda. Mba maibena mataila nimemimo bi solatapemimo.”

20 Islael lavedi Sakot a gose bi dobu isana Etam kalakalalelena isunemo a ḡalavu. 21 Bi Bada suwalemo Islael lavedi i laulau etadoliyedina maibena giyou pwatapwatana. Bi dudubalemo ba maibena kai vavanina pwatapwatana i lailaiyanedi. Taunana aubaina tedi suwala bi dudubala a nawanawa.