Diyoba
Lainuwanega
Niga ba oloto visuvisu guletina bi wainuwatoi wapewapedi i banabanavidina, titikunina i gilumi wata. Diyoba bi ena lava vaitedi bainewa mba wainuwatoidi a noḡoti waitetedi. Diyoba ena pilipilimo ba ena lava ai noḡota bena kage bai i voiye wai gebodi bi dabedimo te Maimaituwa ya kovokovoḡi. Tana i sibe te mba mote giukauwa bi yaḡolo te Maimaituwa i wai sumaḡe. Bi i ḡoeḡoena maso ena wainuwatoina banina i sibe kauwe. Niga giluminemo ba Maimaituwa, Diyoba ena wainuwatoi banina mote i giuvite bi kota i wailove te ena ḡailisi bi ena nuwauyauya ba i saḡa gulata. Bi yai maḡati te lava sa sibe. Sauginemo Diyoba, Maimaituwa ena ḡailisi bi ena nuwauyauya banina i sibesibe ba ena wainuwatoimo, waiuvala i kaisako bi Maimaituwa i lauduneye. Giluma damona ba Maimaituwa, Diyoba ena sidamo i wai yawasani, natunatuna wapawapa i vite bi i voiye te i waiguyau munaḡa. Diyoba ena wainuwatoi banina ena lava mote a sibe kauwe aubaina Maimaituwa i kaipasinedi.
1
Diyoba bi ena vanuwa lavedi
1 Usa dobunemo oloto isana Diyoba i miyamiya, tana Maimaituwa i laulauduneye bi i vivivile kauwe. Bi lava visuvisuna bi tana i wai kita kauwa te mote gebogebo ima voiye. 2 Bi natunatuna oloolotodi wapedi 7 bi waiwaivinidi faiona, 3 bi ena sipu ba 7,000, kamelo 3,000, bulumakau 500 bi donki waivinidi 500. Bi ena taupaula wapawapa bi aibeu yawaninemo ba tana taunaḡa i waiguyau gulata.
4 Diyoba natunatuna oloolotodi ḡemoḡemotaḡa, edi laḡan i kena tava te a soisoi bi nuvunuvudi faiona a giuvaidi te vaitedi a kanikani bi a tegotego ḡemota. 5 Mba soidi mulidimo Diyoba natunatuna i giuwedi a nato lisinemo bi ḡemoḡemotaḡa aubaidi i laulausewasewa. Banina i wai noḡotana gado bamoda soi noponemo gebogebo sima voivoiye, taunana aubaina Maimaituwa matanemo i kavisuvisudi.
Seitan Diyoba i wai laulubu
6 Laḡan ḡemota noke malamo aneya a tava Bada lisinemo bi mododimo Seitan kota i lovotava. 7 Bada, Seitan i wai talayena gado, “Tam bamo maiḡa kuna tava?”
Seitan, Bada ena giu i wai munena gado, “Tagu dobu e kwaikwaivivili bi bai matabuna i tubutubuḡana e kitekitedi.”
8 Ḡome Bada, Seitan i wai talayena gado, “Egu taupaula Diyoba kuna kita? Tana ba lava visuvisu kauwina mote mai aiyai dobumo. Tana ena kauwa a didimana, ya laulauduneyegu bi ya kitakita kauwe te gebogebo mote ima voiye.”
9 Ḡome Seitan, Bada ena giu i wai munena gado, “Mm banina tam Diyoba kwa labelabe kauwe aubaina ya vivivilem. 10 Bi tam laḡan matabuna, tana bi ena vanuwa lavedi bi edi ḡonaḡona matabudi kwa kitakitawata kauwedi. Bai ya voivoiyena ba ena noyana kwa kakavisuvisu te dobumo ena ḡamoḡamo sa wapawapa. 11 Bamoda Diyoba ena ḡonaḡona matabudi kwa ka amoḡidina male ya kuvalim.”
12 Kamaina bi Bada, i giuwena gado, “Kamaina mwali matabuna lisinemo ba nimammo yà sakosako bi Diyoba tubuḡina mote kuma kagebogebo.” Ḡome te Setan, Bada i gose kamaḡe bi i nawa.
Diyoba pilipili i banavidi
13 Laḡan ḡemota Diyoba natunatuna oloolotodi bi waiwaivinidi matabudi tuwaḡedi ena vanuwemo a soisoi. 14 Bi laḡanna ḡemotina, kota tauwainoyanoya i tava Diyoba lisinemo bi i giuwena gado, “Em taupaula bulumakau vaitedi daibimo a suwasuwata* Tedi edi suwata ba tabuna mote mainana tada, tedi yoke bulumakau a soludi bi doḡa a suwesuweti. Yoke ba anisuwatemo bulumakau gadodi a dulidi bi a solusoludi. bi diyedimo donki a yabayaba, 15 bi Siba lavedi ḡome a tava te ḡamoḡamo matabudi a danenedi bi em taupaula matabudi ai pekidi. Bi tagu tauguḡa e naila te e nato au giuwemmo.”
16 Yaḡolo tauwainoyanoya i giugiu ba tauwainoyanoya, wailabuna giu i tavaitena gado, “Namanamali i yovo te sipu dubudi bi taulabedi matabudi i kalaḡosedi. Tagu tauguḡa e naila e nato au giuwemmo.”
17 Kota yaḡolo tauwainoyanoya i giugiu ba tauwainoyanoya wai faionina giu i tavaitena gado, “Taudanene dubudi faiona Babilonḡa a nato, te em kamelo a danenedi bi taupaula matabudi ai pekidi. Tagu tauguḡa e naila e nato au giuwemmo.”
18 Ḡome yaḡolo tauwainoyanoya giugiu ba tauwainoyanoya wai 4-na giu i tavaitena gado, “Natunatum oloolotodi bi waiwaivinidi tuwaḡedi olotona ena vanuwemo a soisoi. 19 Mote lofana te kaibitibiti yavalina kalakalalele yawaninaḡa i saḡa te vanuwa matabuna i suve lolo bi vanuwa i nuwagolu yovo te natunatum matabudi i waipekidi. Tagu tauguḡa e naila te e nato au giuwemmo.”
20 Ḡome te Diyoba ma nuwaboyana i miya moito ena gala i lisi bi dabana i ḡali. Bi tuwapekana doḡamo i wai tupagwaliḡe bi Maimaituwa i lauduneye. 21 Bi i giuna gado,
“Kavakavagu e tubuḡa
bi kavakavagu yà peki.† Niga giuna banina ba gado ya munaḡa malamo.
Bada bai matabuna tauvitegu,
bi kota tauvai munaḡena.
Bada isana ta kasaḡesaḡe.”
22 Niga kauwidi gebogebodi a tubuḡa nopodimo Diyoba mote Maimaituwa i wai wavu.