27
Niga Salena Deivida i gilumi.
1 “Bada tana egu yanayana bi yawasana pakana,
taunana aubaina aiyai bena yà naile?
Tana pilipilimo ya moimoito galamegu,
taunana aubaina mote yàma naila.
2 Sauginemo kagu ḡaviya, gebogebo lavedi sa suluvaigu,
bi sa ḡoeḡoe te maso sai pekigu,
ba tedi taudiḡa sai kalabetibeti munaḡedi bi sa kuluva.
3 Bamoda ḡaviya wapewapedi sa dubutawagu,
tagu mote yama naila.
Avena te ḡaviya sa suluvaigu,
bi tagu yaḡolo te Bada yài sumaḡe.
4 Tagu mwali ḡemota Bada yai baḡaye te aubaigu ya voiye:
Tagu e ḡoe kauwe te egu yawasana tabutabunemo em vanuwemo yà miya,
bi yà sibem te tam kuna visu gulata,
bi em vanuwa wai waiyawinanemo yà laupali lisimmo.
5 Sauginemo pilipili e banavidina ba gabu visuvisunemo kwa sako waidavogu,
te em vanuwemo kwa labe kauwegu,
bi kwa sako saḡegu ḡakima lofalofana dabanemo te egu ḡaviya mote sima suluvaigu.
6 Egu ḡaviya kaka sa moito kwaiviviligu,
bi geḡa te kwa sagugu te egu ḡaviya yà lauyovoḡedi.
Bi Maimaituwa em vanuwa noponemo tagu sewasewa yà gabu, tam Bada lisimmo,
tagu mayasisigu boiḡatu yà bibi bi ya sale Bada lisimmo.
7 Bada, laḡannemo yà laupalina ba egu pali kwa vaiye,
kwa launuwatoiyegu bi egu pali kwaimune.
8 Tam kuna giuweguna gado, ‘Kwa nato lisigumo bi kwai baḡa.’
Taunana aubaina niganana lisimmo yà natonato.
9 Tagu em taupaula, mote kuma medi
bi kuma miya tautauliyegu,
mote kuma kandavonegu!
Tam kunai yawasanigu,
bi laḡan matabuna kwa sagusagugu.
Taunana aubaina mote kuma gose kamaḡegu!
10 Bamoda tamagu bi tinagu sa dabokegu,
bi tam Bada kwa giuvaigu.
11 Bada, egu ḡaviya a wapa,
taunana aubaina kwai lovelovegu te yà kaiwatam,
eta didimaninaḡa kwai doligu.
12 Mba ḡaviidi kaiyovu giudimo sa waiwavugu,
tedi sa ḡoeḡoena sa kagebogebogu,
taunana aubaina kuma kita kamaḡedi sima vunugu!
13 Bi ei sumaḡa te Bada kivim lisigumo i visu,
bi niga dobunemo yà miyamiya
ei sumaḡa te kwa sagugu.
14 Taunana aubaina Bada tai sumaḡe,
te ta ḡailisi bi ta laudabatola,
eda sumaḡa ḡaiḡailisina Bada lisinemo ta sako.”