51
Laḡan ḡemota ḡalibona Deivida, Ulaiya mwanena isana Besiba i lauwaiviniye, taunana aubaina Maimaituwa taugiuwatana Neitan i giu matai kauwina dabanemo bi Deivida i laukuvasa bi niga palina i gilumi Maimaituwa lisinemo.
1 “Aee, Bada, kwa launuwatoitoiyegu
em ḡoe kenakena nonoḡina luvanemo.
Bi em launuwatoimo
egu gebogebo milana kwa koḡa kamaḡe.
2 Egu gebogebo kwa koḡa kamaḡedi,
maibena lava gala milemiledi sa koḡekoḡedina.
3 Egu kauwa gebogebodi yà noḡotiwatedi,
bi laḡan matabuna sa taitai noḡonoḡotigu.
4 Tagu gebogebo taumḡa lisimmo e voiye,
egu kauwa matammo i gebo.
Taunana aubaina kuna giuweguna gado, ‘Tam gebogebo kuna voiye!’ Mba kuna giukauwa.
Sauginemo kuna kovoḡiguna, mba kauwa didimanina kuna voiye.
5 Tagu gebogebo vaitena tinagu bwaganemo,
bi gebogebo vaitena tinagu i bewagu.
6 Bi kuna ḡoe te em giukauwa taunana maso nopogu i waiwanavu,
bi kunugu maso em nuwauyauya kunai wanavu.
7 Egu gebogebo kwa koḡa kamaḡedi bi yà sabusabu,
kwa koḡagu bi yà yana gulata.
8 Kwa giuwegu te egu gebogebo kuna noḡotikamaḡedi
bi giukauwemo yài nuwavisu.
Tam kuna lauyovoḡegu, bi niganana kwa voiyegu te yai nuwa visu munaḡa.
9 Egu gebogebo kuma kitekitedi,
bi egu mila matabudi kwa koḡa kamaḡedi.
10 Aee, Bada nuwapou valivaliuna kwa vitegu,
bi Aluwim ḡaiḡailisina nuwapougumo kwa sako.
11 Bada tagu lisimmo yà miyamiyana mote kuma kwavivaigu yàma nawa,
bi lisigumo em Aluwa Waiyawa mote kuma kaikamaḡe.
12 Em yawasanamo kwa laivaliugu, maibena dolinemo kuna waiyawasaguna mainana,
bi kwa voiyegu te nuwagu tabutabunemo yà vivilem.
13 Mba mainana kaka gebogebo lavedi em eta yai lovedi,
te sa nuwavitala lisimmo.
14 Oo Maimaituwa, tagu e nima kwasina,
kwai yawasanigu bi kwa moito galamegu,
kaka ma yasisigu em kauwa didimanidi yà sale watedi.
15 Oo, Bada mudugu kwa taukoni,
te yà kasaḡesaḡem.
16 Tagu ḡamoḡamo yà lausewasewaye lisimmo bi tam mote em ḡowana mba taudidi.
Tam mote sewasewa mba mainana kitedi kuma ḡoeḡoedi.
17 Tam sewasewa laukaina kwa ḡoeḡoena,
ba laḡannemo tagu yà sako yovoḡe munaḡegu bi yài waibaḡam te egu gebogebo kwa noḡoti kamamaḡedi.
Oo, Maimaituwa, laḡannemo lisimmo yà laukuvasana mote kuma miya tautauliyegu.
18 Bi Saiyon malagaina kwa kavisuvisu bi ena lava kwa sagudi,
bi Yelusalem ganakukuna kwa laivaliu munaḡedi.
19 Bi lava nopodi visuvisudimo sa lausewasewa bi tam lisidimo kwai nuwavisu,
bi sewasewa tabudi bi tabudi lisimmo sa gabudi,
bi kau olta dabanemo sa lausewasewayedi.”