103
Deivida niga salena i gilumi.
1 Nopogu bi tubuḡigu tabutabunemo
Bada isana waiyawa yà kasaḡesaḡe.
2 Nopogu tabutabunemo Bada yà kasaḡesaḡe,
bi kauwa visuvisudi i voivoiyedina
matabudi lisigumo yà noḡoti watedi.
3 Bi egu gebogebo matabudi ya noḡonoḡoti kamaḡedi,
bi egu sida matabudimo
yai waiyawasanigu.
4 Tana pekipekidi edi gabumo
ya waiyawasanigu.
Bi ena nuwavaina bagibagina
bi ena launuwatoi ya viteviteguna,
maibena kunubobo dabagumo.
5 Sauginemo niga dobunemo yà miyamiyana,
tana mwali visuvisudi ya vitevitegu.
Bi tubuḡigu ya lailaivaliuna,
maibena boniya lauewalina bi ḡaiḡailisina.
6 Lava edi lava sa kitakita waiyovoyovodina,
taudidi Bada ya sagusagudi
banina ena kauwa didimanina.
7 Maimaituwa ena ogatala Mousis i vite,
te Islael lavedi lisidimo ena ḡailisi ya kamaḡati.
8 Bada tana laulaunuwatoina bi tauwaisagu,
tana mote medimedi makaina,
bi ena ḡoe kenakena nonoḡina.
9 Maimaituwa mote laḡan matabuna eda gebogebo dabedimo imai wavuda,
bi kota ena medi lisidemo mote ima kena nonoḡa.
10 Tada gebogebo nananakidi te voiyedi te maso i kovoḡida,
bi geḡa te mote ima kovokovoḡida.
11 Mabai Bada sa laulauduneyena
ba ena ḡoe lisidimo ya kena nonoḡa.
Bi ena ḡoe i saḡa gulata te mala i waimuli.
12 Tana eda gebogebo ya kaikaikamaḡedina,
manekina lofana maibena aibeu yawaninemo,
te ena lalasi yawaninemo.
13 Tamatamada dobumo sa laulaunuwatoiyedana,
mainana kota Bada, mabai sa vivivilena, ya laulaunuwatoiyedi.
14 Tana i sibe te tada mote ḡaiḡailisida,
banina tana i sibe te gobusemo i voiyeda.
15 Tada eda yawasana maibena ḡawaḡawa ya duga saḡa te ya poki munaḡa,
ee maibena belana busona,
olaolalemo ya tapale bi aubigamo ya ḡoḡosi.
16 Bi yavala ya lausuve te ya suve waibeku,
te mote aiyai ima kita munaḡedi.
17-18 Bi tubulelesa onedi,
mabai Bada sa laulauduneye bi ena waianina sa kaikaididina,
bi ena waiḡake sa noḡonoḡotidi bi sa kaikaiwatedina,
ba ena ḡoe bi ena laukivivisuvisu lisidimo ya kena nonoḡa.
19 Bada ena ani miya malamo i voiye,
bi bai matabuna ya waibadayedi.
20 Temi aneya ḡaiḡailisimi,
Bada ena giuvavasaḡa ko vai bi ko kaikaiwatedina
temi Bada ko kasaḡesaḡe.
21 Aneya malamo miyemiyemi
bi temi mabai ena ḡowana ko voivoiyena Bada ko kasaḡesaḡe.
22 Dobumo bai matabuna i voivoiyemina,
temi Bada ko kasaḡesaḡe.
Bi tagu nopogu tabutabunemo Bada yà kasaḡesaḡe.