A Manru na Pas
anun o Pol torom a taro
Korin
A wasiso talapor mugu
Una pas ri o Pol i tumtumus melet torom a taro Korin, ra i kis tong una papor Masedonia. Una nun a mugano pas torom det, i wasiso dekdek torom det una nundet a petutna. Numur i tulu ru o Taitus torom det. Ra o Taitus i milet melet torom o Pol, i inanosi lena, a taro Korin det sa nukpukus. Ikut, ara taro det nuki lena, o Pol awu sur i, a aposel mulus.
Una pas ri, o Pol i wasiso una wat na utna: A mugano, o Pol i gas uni det nukpukus. A manru, i wasiso melet una Wakak na Wasiso. Ma a mantul nami, i inanos det lena, det in waninar anundet a etabor torom a kum sibo na taro. A manwat nami, i wasiso talapor torom det lena, i a aposel mulus anun o Iesu.
A inawan ina Manru na Pas Korin:
A turturkibin ina buk ri (1:1-11)
A pinapam anun o Pol torom a taro (1:12-7:16)
A etabor torom a taro na lotu sapat o Jerusalem (8:1-9:15)
O Pol i a aposel mulus (10:1-13:10)
A ururop na wasiso anun o Pol torom det (13:11-13)
1
1 Iau o Pol, a aposel anun o Karisito Iesu, una nemnem anun o God, mir nam o Timoti a tisindat, mir tumus a pas ri torom mot a taro na lotu anun o God tiro o Korin, ma torom a taro rop anun o God una papor Akaia.
2 A marmaris ma a malmal tan o God a Tamandat ma a Labino o Iesu Karisito in kis tomo nam mot.
O God a tene umarom
3 Rom 15:5Dat in watung ulabo pas o God a Taman anundat a Labino o Iesu Karisito, ma a Tamandat kai, ra a tene marmaris, ra i ser umarom dat una kum utna rop. 4 I ser umarom met una kum mamaut rop ra met taramo i, sur met kai met in umarom a taro, ra a kum mamaut i los det, nama umumarom ra o God i pitar tari tamet. 5 Sng 34:19Met taramo a kum lamlabino ngunungut ra o Karisito i sa taramo tari, ma lenkutkai ra met taramo a labino umumarom anun o Karisito una numet a nilaun. 6 Met taramo a kum mamaut, sur mot in los a warut uni, ma sur din ulaun mot. Ra o God in umarom met, mot kai mot in taramo i. A umumarom ra mot in taramo i, in udekdek mot sur mot in tur dekdek una kum ngas na ngunungut ri, ra met taramo i. 7 Met nurnur mulus un mot lena, mot in tur dekdek ut, uni met tasmani lena, mot taramo a ngunungut tomo nam met. Lenkutkai ra, mot in taramo a umumarom anun o God tomo nam met.
8 Ap 19:23; 1 Kor 15:32A kum tistisi met, met nemi sur mot in tasman a kum ngunungut ra i los met una kum tamon tong una papor Asia. Met taramo a labino mamaut doko. Ka met dekdek mo, ma ka met nuki mo lena, met in laun. 9 Met nuki lena met in mat mo. A utna ri i wanpat, sur gong met nurnur una dekdeki met ut, met in nurnur kut un o God, i ra i ser ukatutur pas a kum minat. 10 2 Tim 4:18A lingmulus ut, o God i ulaun pas met ra milau met in mat, ma in ulaun melet pas met. Ma met nurnur uni lena, in ulaun pas met una kum bung kuri numugu, 11 ra mot in warut met nama niaring. I mo ra a susut na taro det in watung wakak torom o God, sur met, uni i maris met ra i longoro anundet a kum niaring.
O Pol i pukus a nuknukino una nun a inawan
12 Iri a utna ra met warango met nami: a balamet ke takun met un tu utna, uni met tasmani lena, ka met toro, met muri ut a tokodos na petutna tan o God, una numet a nilaun nin upiso, ma una numet a kinkinis tomo nam mot. Ka met mur a mananos anun a taro, met papam murmuri ut a marmaris anun o God. 13-14 2 Kor 5:12; Pil 2:16Met tumtumus kut torom mot una kum utna ra mot in luk lar pasi, ma mot in talapor uni. Mot sa talapor lilik un met, ikut, a nurnur lena, numur mot in talapor wakak un met. I mo ra mot in warango met, lenkutkai ra met, met in warango mot, una bung ra a Labino in milet melet.
15 1 Kor 16:5-6A nuki lena, a nuknuki mot un met i lenri. Iri a kibino ra numugu a inanos tar mot lena an nanpat torom mot a mugano inawan, ra numur an milet a manru na inawan torom mot, sur an pitar a warut torom mot aru dino. 16 Ra an nan sur utong una papor Masedonia, a nuki lena an lumu tar mot. Numur, ra an milet melet tagitong, an kis melet pas nisamot, sur mot in warut iau una nung a inawan utong una papor Judia. 17 Pepetlai, ra ka wanpat, mot nuki lena, a nuknuk oros kut una nung a inawan pat torom mot? Pepetlai, kutiro mot nuki lena, anung a kum wasiso i elar nama taro tagun a rakrakon bual ra det mulaot un tu utna, ikut ka det pami? Iau ka lenra.
18 O God i lingmulus, lenkutkai ra anumet a wasiso i lingmulus. Ra met mulaot, a kukuraino lena, met in pam sot pasi. 19 Ap 18:5Iau ma o Sailas ma o Timoti, metul warawai torom mot un o Iesu Karisito, a Nutun o God. O Karisito ke ser mulaot ma numur in ipul. Awu. In pam sot pasi ut anun a wasiso. 20 Tam 3:14Uni o Karisito i pam sot pas a kum liliman rop anun o God. Ra un o Karisito kut, dat pet lar pasi sur dat in watungi lena, “Amen,” ma dat in watung ulabo pas o God uni. 21 O God kut i utur dekdek met, ma mot kai, un o Karisito, ma i pilok pas dat sur dat anun a taro ut. 22 Ep 1:13-14; 2 Kor 5:5I sa ubek tar anun a ukinalong un dat sur in talapor lena, dat anunu ut. Ma i ukis a Niono unin balandat, elar nama ukinalong ra numur dat in rakon a kum utna, ra o God i sa waninar tari sur dat.
23 O God ut i tasman iau lena a watung a lingmulus. Ka wan melet torom mot tiro o Korin, uni ka nemi sur a nuknuki mot in maut un lako kum dekdek na wasiso ra an watungi torom mot. 24 1 Pit 5:3Awu sur met nem na warkurai sur a nurnur anumot. Met nemi kut sur met in papam tomo nam mot, sur mot in gas, uni mot sa tur dekdek una nurnur.